ޔުއެފާ ޗެމްޕިއަންސް ލީގުގެ ގްރޫޕް ސީގައި ރޭ ސްޕޯޓިން ބްރާގާ ބަލިކޮށް، ގަދަ 16 ބުރުން ރެއާލް މެޑްރިޑް ޖާގަ ހޯދައިފިއެވެ.
އަމިއްލަ ދަނޑުގައި ކުޅުނު މެޗުން ރެއާލް މޮޅުވީ 3-0 ގެ ނަތީޖާއަކުންނެވެ.
މި މެޗުގައި ބްރާގާއިން ގިނައިރު ބޯޅަ ގެންގުޅުނު ނަމަވެސް، ގިނަ ހަމަލާ އުފައްދާފައިވަނީ ރެއާލުންނެވެ. ނަމަވެސް މެޗުގައި ލަނޑު ޖަހާނެ ފުރަތަމަ ރަނގަޅު ފުރުސަތު ލިބިގެންދިޔައީ ބްރާގާއަށެވެ. އެގޮތުން މި މެޗުގެ ހަވަނަ މިނެޓުގައި ބްރާގާއަށް ޕެނަލްޓީއެއް ލިބުނު ނަމަވެސް، އެ ޓީމުގެ އަލްވާރޯ ޖާލޯ ފޮނުވާލި ޕެނަލްޓީ ރެއާލުގެ ގޯލްކީޕަރު ވަނީ ދިފާއުކޮށްފައެވެ.
އެއާއެކު މެޗުގެ 27 ވަނަ މިނެޓުގައި ރެއާލުން ވަނީ ލީޑު ނަގާފައެވެ. ރޮޑްރީގޯ ތަނަވަސްކޮށްދިން ފުރުސަތެއްގައި މި ލަނޑު އެ ޓީމަށް ކާމިޔާބުކޮށްދިނީ ބްރަހީމް ޑިއާޒެވެ. މި މެޗުގައި ރެއާލްގެ ދެވަނަ ލަނޑު 58 ވަނަ މިނެޓްގައި ވަޒްކޭޒް ތަނަވަސްކޮށްދިން ފުރުސަތަކުން ޖަަހައިދިނީ ވިނީޝިއުސް ޖޫނިއާއެވެ. އަދި އެ ޓީމުގެ ފަހު ލަނޑު އޭގެ ތިން މިނެޓު ފަހުން ވިނީޝިއަސް ޖޫނިއާގެ އެހީއާއެކު ކާމިޔާބުކޮށްދިނީ ރޮޑްރީގޯއެވެ.
މި މޮޅާއެކު ގަދަ 16 ބުރުގެ ޖާގައެއް ރެއާލުން ހޯދިއިރު، މިއީ ރެއާލުން ޖެހިޖެހިގެން ޗެމްޕިއަންސް ލީގުގެ ނޮކްއައުޓް ބުރަށް ދަތުރުކުރި 27 ވަނަ ފަހަރެވެ. މި މޮޅާއެކު އެ ޓީމު ތާވަލުގެ އެއްވަނައިގައި ކުޅުނު ހަތަރު މެޗުންވެސް މޮޅުވެ 12 ޕޮއިންޓާއެކުގައެވެ. މި ގްރޫޕުގެ ދެވަނައިގައި ނާޕޮލީ އޮތީ ކުޅުނު ހަތަރު މެޗުން ލިބުނު ހަތް ޕޮއިންޓާއެކުއެވެ. މި ގްރޫޕުގައި ރޭ ކުޅުނު މެޗުގައި ނާޕޮލީ ވަނީ ޔޫނިއަން ބާލިންއާ ވާދަކޮށް 1-1 ގެ ނަތީޖާއަކުން އެއްވަރުވެފައެވެ.