އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި ނެދަލަންޑްސް އަތުން އެންމެ ފަހުގެ ޗެމްޕިއަން އިންގްލަންޑް މޮޅުވެއްޖެއެވެ.
މަހަރާޝްޓްރާ ކްރިކެޓް އެސޯސިއޭޝަން ސްޓޭޑިއަމުގައި ކުޅުނު މި މެޗުން އިންގްލަންޑް މޮޅުވީ ފަސޭހަކަމާއެކު 160 ލަނޑުންނެވެ.
މި މެޗުގެ ގުރު ދިމާވުމުން އިންގްލަންޑް އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ނުވަ ކުޅުންތެރިން ނުބައިވެގެން ވަނީ 339 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 84 ބޯޅައިން 108 ލަނޑު ހެދި ބެން ސްޓޯކްސް އާއި 74 ބޯޅައިން 87 ލަނޑު އެއްކުރި ޑޭވިޑް މަލަންއެވެ. މި އިނިންގްސްގައި ނެދަލަންޑްސްގެ ބަށް ޑަ ލީޑޭ ވަނީ 10 އޯވަރުގައި 74 ލަނޑަށް ތިން ވިކެޓް ނަގާފައެވެ.
ޖަވާބުގައި ނެދަލަންޑްސް ކުޅެން އަރައި 37.2 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ އެންމެ 179 ލަނޑެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 34 ބޯޅައިން 41 ލަނޑު ހެދި ޓޭޖާ ނިޑަމަނޫރޫ އާއި 42 ބޯޅައިން 38 ލަނޑު އެއްކުރި ސްކޮޓް އެޑްވާޑްސްއެވެ. މި އިނިންގްސްގައި އންގްލަންޑުގެ މުއީން އަލީ އާއި އާދިލް ރާޝިދު ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ތާވަލުގެ ހަތްވަނައަށް އިންގްލަންޑް ކުރިއަށް ޖެހިލިއިރު، އެ ޓީމަށް ވަނީ ކުޅުނު އަށް މެޗުން ހަތަރު ޕޮއިންޓް ލިބިފައެވެ. އަދި ފުލުގައި އޮތް ނެދަލަންޑްސްއަށްވެސް އަށް މެޗުން ހަތަރު ޕޮއިންޓް ލިބިފައިވާއިރު، އިންގްލަންޑަށް ކުރި ލިބެނީ ނެޓް ރަން ރޭޓުންނެވެ.