ރާއްޖޭގެ ފުޓްބޯޅަ މި ވަގުތު އޮތީ ބިންމަތީގައި ކަމަށް ވިކްޓަރީ ސްޕޯޓްސް ކުލަބުގެ ކޯޗު ސޮބާހު މުޙައްމަދު ބުނެފިއެވެ.
ޓީވީއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަދައްކަމުން ސޮބާ ބުނީ މި ވަގުތު ހާލަތުގެ ގޮތުން ރާއްޖޭގެ ފުޓްބޯޅަ ނަގާ ކޮޅަށް ޖެހުމުގައި ބޭރުގެ ތަޖުރިބާކާރުންގެ ލަފަޔާ މަޝްވަރާ ބޭނުންވާ ކަމަށެވެ. ސޮބާ ބުނީ ރާއްޖޭގެ ލީގުގައިވެސް އެއްވެސް ސީރިއަސް ކަމެއް ނުފެންނަ ކަމަށާއި، ބޭނުންވީމަ ލީގު ބްރޭކް ކޮއްލުމާއި، ކުޅުންތެރިން ބޭނުންވީމަ ކުޅެންއެރުން ފަދަ ހާލަތްތަށް ކުރިމަތިވާ ކަމަށެވެ.
ސޮބާ ބުނީ ކުޅުންތެރިންނާއި ކުލަބުތަކުގެ މެނޭޖްމެންޓުން މިކަންކަން ސަމާލުކަން ނުދޭނަމަ ގައުމީ ޓީމުގައި ކިތަންމެ މޮޅު ކޯޗެއް ހުރި ކަމުގަވީނަމަވެސް ގައުމީ ޓީމަށް ކުރިޔަށް ނުދެވޭނެ ކަމަށެވެ. އަދި ރާއްޖޭގެ ކުލަބުތަކުގެ ތެރެއިން ރަނގަޅަށް ތައްޔާރުވީ އެންމެ ކުލަބެއް ކަމަށާއި، ކުލަބުތަކުން ފުޓްބޯޅައާ މެދު ސަމާލުކަން ނުދީ ރާއްޖޭ ގައުމީ ޓީމުގެ ނަތީޖާތަކެއް ރަނގަޅެއް ނުވާނެ ކަމަށްވެސް ވަނީ ބުނެފައެވެ.
"ދަނޑަކަށް ސަޕޯޓަރުންނެއް ނުވަދޭ، އަނެއްކާ އަޅުގަނޑުމެންނަށް މި ފެންނަނީ ކުޅުންތެރިންގެ ރޫހުވެސް ދަނޑުމަތީގައި ފަނޑުކޮށް، ބަޔަކަށްޓަކައި މިކަން ކުރަންވެސް ކުޅުންތެރިންނަށް ނޭނގޭ. މެޗުތަކުގައި އެ ނާތީޖާއެއް ނުފެނޭ.ސޮބާހު މުޙައްމަދު
ސޮބާ ބުނީ ކުލަބަތަކަކީ ކުޅުންތެރިންނަށް ފައުންޑޭޝަން އަޅައިދޭ ތަންކަމަށާއި ކުލަބުތަކުން ހަރުދަނާ މަސައްކަތްތެކެއް ނުކޮށް ފުޓްބޯޅައިން ފެންނަން ބޭނުންވާ ބަދަލު ނުފެންނާނެ ކަމަށެވެ.
ގަލޮޅު ދަނޑުން ސަޕޯޓަރުން ނުފެންނާތީ މެޗުތަކުގައި ކުޅުންތެރިންގެ ފަރާތުން ގައުމީ ރޫހު ފެންނަލެއް މަދުކަން ސޮބާ ވަނީ ފާހަގަކޮށްފައެވެ. ގައުމީ ޓީމުގެ ނަތީޖާ ރަނގަޅު ކުރަން ބޭނުންކަމުގަވާނަމަ ރާއްޖޭގެ ޒުވާން އުމުރުފުރާތަކުގެ ކުޅުންތެރިންނަން ބައިނަލްއަގުވާމީ މެޗުތުކުގެ ތަޖުރިބާ މުހިންމު ކަމަށް މި ސީޒަންގައި ވިކްޓަރީ ހަވާލުވި ކޯޗު ވަނީ ބުނެފައެވެ.