މަގުމަތީގެ ރައްކާތެރިކަމާމެދު އަހުލުވެރިކުރެއްވުމުގެ ކެމްޕެއިން، މިއަހަރުވެސް އެލައިޑް އިންޝުއަރަންސް ކޮމިޝަނާ ގުޅިވަޑައިގެން ހިންގަވަން މޯލްޑިވްސް ޕޮލިސް ސަރވިސްއިން ނިންމަވައިފިއެވެ.
މިކަމުގެ އެމްއޯޔޫގައި މިއަދު ވަނީ ދެފަރާތުން ސޮއިކުރައްވާފައެވެ. މިއަދު އިސްކަންދަރު ކޮށީގައި ބޭއްވެވި ރަސްމިއްޔާތުގައި އެލައިޑްގެ ފަރާތުން އެމް.އޯ.ޔޫގައި ސޮއިކުރެއްވީ ކުންފުނީގެ ޖެނެރަލް މެނޭޖަރ އަހްމަދު ރިޔާޒީއެވެ. މޯލްޑިވްސް ޕޮލިސްގެ ފަރާތުން ސޮއިކުރެއްވީ ޑެޕިއުޓީ ކޮމިޝަނަރ އޮފް ޕޮލިސް އަހްމަދު ސައުދީއެވެ. މިކެމްޕަށް ހިންގާ ހުރިހާ ޚަރަދެއްކުރުމަށް ހަމަޖެހިގައިވަނީ އެލައިޑް އިންޝުއަރަންސްގެ ފަރާތުންނެވެ.
"ފުރާނައިގެ ނުރައްކަލަށް- ރައްކާތެރި ދުވެލި ޚިޔާރުކުރައްވާ" ޝިއާރުގައި ހިންގަވާ ކެމްޕެއިން މިއަހަރު ކުރިޔަށް ގެންދަވަން ހަމަޖެހިފައިވަނީ އެޕްރީލް ނުވަތަ މެއި މަހުގެ ތެރޭގައި ހައްދުންމަތީގެ ގުޅިފައިވާ ރަށްތައްކަމުގައިވާ ފޮނަދޫ، ކައްދޫ، މާންދޫ އަދި ގަމުގައިކަމަށް ޕުލުހުން ހާމަކުރައްވައެވެ. މިޕްރޮގްރާމްގެ މައިގަނޑު އަމާޒްކަމުގައި ކަނޑައަޅާފައިވަނީ ޢާންމުނަށް އެކްސިޑެންޓްގެ ނުރައްކާތެރިކަން ވިސްނައިދީ، އެކްސިޑެންޓުތައް ހިނގާ ސަބަބުތައް ބުނެދީ، އެކްސިޑެންޓް ހިނގުން މަދުކުރުމަށް އަދި ހިނގާ އެކްސިޑެންޓްގެ ނުރައްކާތެރިކަން މަދުކުރުމަށްކަމަށް ޕޮލިހުން ވިދާޅުވިއެވެ.
މި އެއްބަސްވުމުގައި ސޮއިކުރެއްވުމުގެ ރަސްމިއްޔާތުގައި ވާހަކަފުޅުދައްކަވަމުން އެލައިޑްގެ މާރކެޓިންގ މެނޭޖަރ ނިއުޝާޒް ޝަރީފް ވިދާޅުވީ މޯލްޑިވްސް ޕޮލިސްއާއެކު ފާއިތުވިދިޔަ ދެ އަހަރުގައި ކުރިޔަށް ގެންދެވުނު ރޯޑް ސޭފްޓީ އެވެއަރނެސް ޕްރޮގުރާމްތަކަކީ އެދެވޭ ރަނގަޅު ޕްރޮގުރާމްތަކެއް ކަމަށެވެ.