ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އަސާސީ ގަވާއިދު އިސްލާހުކޮށް، އައު އިންތިޚާބެއް ބޭއްވުމަށް ފާސްކޮށްފިއެވެ.
މިގޮތަށް ފާސްކޮށްފައިވަނީ މިދިޔަ ހުކުރު ދުވަހު ބޭއްވި ވީއޭއެމުގެ އަހަރީ ކޮންގްރެސްގައެވެ. ވޮލީގެ އަހަރީ ކޮންގްރެސް ބޭއްވިއިރު، އެ އެސޯސިއޭޝަނުން މިދިޔަ އަހަރުތަކުގައި ގަވާއިދާ އެއްގޮތަށް އަހަރީ ކޮންގްރެސް ބާއްވާފައެއް ނުވެއެވެ. އެއާއެކު ލިޔެކިޔުން ހަމަނުވެގެން އުވާލާން އިޢުލާންކުރި ޖަމުޢިއްޔާތަކުގެ ތެރޭގައިވެސް ވީއޭއެމް ހިމެނުނެވެ.
ބޮޑު މެދުކެނޑުމަކަށްފަހު މިދިޔަ ހުކުރު ދުވަހު ވީއޭއެމުގެ އަހަރީ ކޮންގްރެސް ބޭއްވިއިރު، މި ކޮންގްރެސްގައި ވަނީ އެ އެސޯސިއޭޝަނުގެ އަސާސީ ގަވާއިދަށް ގިނަ ބަދަލުތަކެއް ގެނެސްފައެވެ. އެގޮތުން އެންމެ ފުރަތަމަ ފާސްކޮށްފައިވަނީ ކޮންގްރެސްގައި ވޯޓުލެވޭ މެންބަރު ކުލަބުތަކުގެ އަދަދެވެ.
އެގޮތުން މިދިޔަ އަހަރުތަކުގައި ގަވާއިދާ އެއްގޮތަށް ވޮލީބޯޅަ މުބާރާތްތައް ބާއްވާފައި ނުވާތީ، ވީއޭއެމުގައި ރަޖިސްޓްރީކޮށްފައިވާ ފުރިހަމަ މެންބަރު ހުރިހާ ކުލަބަކަށް ވޯޓުލުމުގެ ފުރުސަތު ދިނުމަށް ވަނީ ފާސްކޮށްފައެވެ. އެހެންކަމުން ވީއޭއެމުގެ ފުރިހަމަ މެންބަރުންގެ ގޮތުގައި ހިމެނޭ 16 ކުލަބަށް ވޯޓުލުމުގެ ހައްގު ވަނީ ލިބިފައެވެ.
މިއާއެކު މި ކޮންގްރެސްގައި ވީއޭއެމުގެ އަސާސީ ގަވާއިދަށް ބަދަލުތައް ގެނައިރު، އެ އެސޯސިއޭޝަނުގެ އިންތިޚާބުގައި ވޯޓުލާ އުސޫލަށް ވަނީ ބަދަލެއް ގެނެސްފައެވެ. އެގޮތުން މީގެ ކުރިން ވީއޭއެމުގެ އިންތިޚާބުގައި އެ އެސޯސިއޭޝަނުގެ ކޮމިޝަންތަކުގެ މެންބަރުން ހޮވުމަށް ކުލަބުތަކުން ވޯޓުލާއިރު، ވީއޭއެމުގެ ހިންގާ ކޮމިޓީއަށް ހޮވެނީ އެ ކޮމިޝަންތަކުގެ ޗެއާމަނުންނެވެ. އެކަމަކު އެ މާއްދާއަށް ގެނައި ބަދަލާއެކު، ދެން ކުލަބުތަކުން ވޯޓުލައިގެން ހޮވާނީ ވީއޭއެމުގެ ހިންގާ ކޮމިޓީގެ މެންބަރުންނެވެ. އަދި ވީއޭއެމުގެ ކޮމިޝަންތަކަށް މެންބަރުން އިންތިޚާބުކުރުމުގެ ބަދަލުގައި، އެ މެންބަރުންނަކީ ހިންގާ ކޮމިޓީން އައްޔަންކުރާ ބައެއް ކަމަށް ވަނީ ފާސްކޮށްފައެވެ.
ދެން ގެނައި އަނެއް ބަދަލަކީ ވީއޭއެމުގެ ފުރިހަމަ މެންބަރު ކުލަބުތައް ކަނޑައަޅާ އުސޫލަށް ގެނައި ބަދަލެވެ. އެގޮތުން މީގެ ކުރީގެ ގަވާއިދުގައިވާ ގޮތުން ވީއޭއެމުގެ ފުރިހަމަ މެންބަރު ކުލަބަކަށް ވެވޭނީ ހަތަރު އަހަރުގެ ތެރެއިން ތިން އަހަރު ގަވާއިދުން މުބާރާތްތަކުގައި ކުޅޭ ކުލަބުތަކަށެވެ. އެކަމަކު އަލަށް ފާސްކުރި ބަދަލާއެކު ޖެހިޖެހިގެން ދެ އަހަރު މުބާރާތްތަކުގައި ވާދަކުރާ ކުލަބުތައް ވީއޭއެމުގެ ފުރިހަމަ މެންބަރު ކުލަބެއްގެ ގޮތުގައި ކަނޑައެޅޭނެއެވެ. އަދި ޖެހިޖެހިގެން ދެ އަހަރު މުބާރާތްތަކުގައި ވާދަނުކޮށްފިނަމަ، ފުރިހަމަ މެންބަރު ކުލަބެއްގެ ހައިސިއްޔަތު ގެއްލި، ވަގުތީ މެންބަރު ކުލަބަށް ބަދަލުވާނެ ކަމަށްވެސް ހިމަނާފައެވެ.
ވީއޭއެމުގެ އަސާސީ ގަވާއިދަށް ގެނައި މި އިސްލާހުތަކާއެކު، ކޮންގްރެސް ބާއްވާތާ 10 ދުވަހުގެ ތެރޭގައި ވީއޭއެމުގެ އައު އިންތިޚާބެއް ބޭއްވުމަށްވެސް ވަނީ ފާސްކޮށްފައެވެ. އެހެންކަމުން މި މަހުގެ 13 ވަނަ ދުވަހުގެ ކުރިން ވީއޭއެމުގެ އައު އިންތިޚާބެއް ބާއްވަން ޖެހޭނެއެވެ.
ވީއޭއެމުން އައު އިންތިޚާބެއް ބާއްވަން ފާސްކުރިއިރު، އެ އެސޯސިއޭޝަނުގެ ރައީސްގެ މަގާމަށް މުޙައްމަދު ރަނޭޝް އިންތިޚާބުކޮށްފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައެވެ.