މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި މުބާރާތް ބާއްވާ ޤައުމު ކަމަށްވާ އިންޑިއާއިން ފަސޭހަކަމާއެކު ދެކުނު އެފްރިކާ ބަލިކުރިއިރު، އެ ޓީމުގެ ތަރި ވިރާޓް ކޯލީ ރިކޯޑަކާ ހަމަކޮށްފިއެވެ.
ކޮލްކަތާގައި ހުންނަ އެޑެން ގާޑެންސް ސްޓޭޑިއަމުގައި އިއްޔެ ކުޅުނު މި މެޗުން އިންޑިއާ މޮޅުވީ ފަސޭހަކަމާއެކު 243 ލަނޑުންނެވެ.
މި މެޗުގެ ގުރު ދިމާވުމުން އިންޑިއާ އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ފަސް ކުޅުންތެރިން ނުބައިވެގެން ވަނީ 326 ލަނޑު ހަދާފައެވެ.
އެ ޓީމުން އެންމެ ރަނގަޅަށް ކުޅުނީ ނުބައިނުވެ 121 ބޯޅައިން 101 ލަނޑު ހެދި ކޯލީއެވެ. މިއާއެކު ކޯލީ ވަނީ އޭނާގެ 35 ވަނަ އުފަން ދުވަހު، ބައިނަލްއަޤުވާމީ އެއް ދުވަހުގެ ކްރިކެޓުގައި އެންމެ ގިނަ ސެންޗަރީ ހެދި ސަޗިން ޓެންޑުލްކަރުގެ ރިކޯޑާ ހަމަކޮށްފައެވެ. އިއްޔެ ކުޅުނު މެޗުގައި ކޯލީ ހެދި ސެންޗަރީއަކީ އޭނާގެ ކެރިއަރުގެ 49 ވަނަ ސެންޗަރީއެވެ. ކޯލީ އޭނާގެ 49 ވަނަ ސެންޗަރީ ހަމަކުރީ ޓެންޑުލްކަރު ކުޅުނު މެޗުތަކުގެ އަދަދަށްވުރެ 174 މެޗު މަދުން ކުޅެގެންނެވެ.
ޖަވާބުގައި ދެކުނު އެފްރިކާ ކުޅެން އަރައި 27.1 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ އެންމެ 83 ލަނޑެވެ. މި އިނިންގްސްގައި އިންޑިއާގެ ރަވިންދްރަ ޖަޑޭޖާ ވަނީ ނުވަ އޯވަރުގައި 33 ލަނޑަށް ފަސް ވިކެޓް ނަގާފައެވެ. އަދި އެ ޓީމުގެ މުޙައްމަދު ޝަމީ އާއި ކުލްދީޕް ޔާދަވް ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.
10 ޤައުމު ވާދަކުރާ މި މުބާރާތުގެ ސެމީގެ ޖާގައެއް އިންޑިއާއިން މީގެ ކުރިންވެސް ކަށަވަރުކޮށްފައިވާއިރު، މި މޮޅާއެކު އެ ޓީމުން ވަނީ މުބާރާތުގައި މިހާތަނަށް ކުޅުނު ހުރިހާ މެޗެއްވެސް ކާމިޔާބުކޮށްފައެވެ. އެއާއެކު އިންޑިއާ އޮތީ ތާވަލުގެ އެއްވަނައިގައި ކުޅުނު އަށް މެޗުން ލިބުނު 16 ޕޮއިންޓާއެކުއެވެ. ދެވަނައިގައި އޮތް ދެކުނު އެފްރިކާވެސް ސެމީއަށް ދަތުރުކޮށްފައިވާއިރު، އެ ޓީމަށް ވަނީ އަށް މެޗުން 12 ޕޮއިންޓް ލިބިފައެވެ.