ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މިހާރުގެ މެނޭޖުމަންޓުގެ އިތުބާރު ގެއްލިފަވާ ކަމަށާއި، ދިވެހި ފުޓްބޯޅަ ކުރިއަށްގެންދިޔުމުގައި އިޚުލާސްތެރިކަމެއް ނެތް ކަމަށް "ސޭވް އެފްއޭއެމް" ހަރަކާތުން ބުނެފިއެވެ.
ޓީވީއެމުން ގެނެސްދިން "ކުޅިވަރު ވިންދު" ޕްރޮގްރާމުގައި "ސޭވް އެފްއޭއެމް" ހަރަކާތުގެ ފަރާތުން ވާހަކަދައްކަމުން ތަޖުރިބާކާރު ނޫސްވެރިޔާ އަބްދުﷲ އަޒްމީން ބުނީ އެފްއޭއެމް ވަރަށް ރަނގަޅަށް މީގެ ކުރިން އެކި ދުވަސްވަރު ހިންގި ކަމަށާއި، އެހެން ނަމަވެސް މިހާރު ދިމާވެގެން އުޅެނީ އެފްއޭއެމް ރަނގަޅަށް މެނޭޖުނުކުރެވުމުގެ މައްސަލަ ކަމަށެވެ. އަދި އެފްއޭއެމުގައި އިސްކޮށް ތިއްބެވި ބޭފުޅުން ކަންކަމަށް އިޖާބަނުދޭ ކަމަށާއި، މިއަދު ފެނިގެންދަނީ ކަމެއް ކަމަށް ނުހެދުމުގެ ނަތީޖާ ކަމަށްވެސް ބުންޏެވެ.
އަޒްމީން ވަނީ އެފްއޭއެމް މިފަހަކަށް އައިސް ހިނގަމުންދަނީ އިދާރީ ގޮތުން އެންމެ ރަނގަޅަށް ނޫން ކަމަށް ތުހުމަތުކޮށްފައެވެ. އޭނާ ބުނީ އިދާރީ ގޮތުން ރަނގަޅު މީހުން އެފްއޭއެމުގައި ތިބި ނަމަ، މިއަދު މިހާލަތުގައި މުސާރަ ނުދެވުނަސް، އެހެން ކަމެއް ނުވިޔަސް އެފްއޭއެމް އޮންނާނީ މިއަށްވުރެ ރަނގަޅު ހާލަތުގައި ކަމަށެވެ. އަދި ސަރުކާރުގެ އެއްބާރުލުމެއް ނެތި އެއްވެސް ޤައުމެއްގައި ފުޓްބޯޅަ ކުރިއަރައިގެން ނުދާނެކަން އަޒްމީން ވަނީ ފާހަގަކޮށްފައެވެ.
އަޒްމީން ބުނީ ސަރުކާރުގެ ސިޔާސަތުތައް ތަންފީޒުކުރުމަށް އެފްއޭއެމުން މަސައްކަތް ކުރަން ޖެހޭ ކަމަށާއި، ހުރިހާ ކުޅިވަރެއް ހަމަހަމަކުރުމުގެ ސިޔާސަތުގެ ދަށުން ކަންކުރުމުގެ ނަތީޖާ މިއަދު ފެނިގެން މިދަނީ ރާއްޖޭގެ އެއް ނަންބަރު ކުޅިވަރު ފުޓްބޯޅަ ހަލާކުވުން ކަމަށެވެ. އަދި ހުރިހާ ކުޅިވަރެއް ހަމަހަމައެއް ނުކުރެވޭނެ ކަމަށްވެސް އަޒްމީން ވަނީ ފާހަގަކޮށްފައެވެ. އަޒްމީން ބުނީ އެފްއޭއެމުގެ މިހާރުގެ މެނޭޖްމެންޓަށް އިތުބާރު ނެތް ކަމަށާއި، ކަންކަން ރަނގަޅުކޮށްފާނެ ކަމަށް އޭނާއަށް ޤަބޫލުވެސް ނުކުރެވޭ ކަމަށެވެ. އެގޮތުން މިހާރުގެ މެނޭޖުމަންޓުން ކަންކަން އިސްލާހުކުރުމުގައި އެއްވެސް އިޚުލާސްތެރިކަމެއް ނުފެންނަ ކަމަށްވެސް ވަނީ ބުނެފައެވެ.
"ފުރަތަމަ ކަމަކީ އެފްއޭގެ މިހާރުގެ މެނޭޖުމަންޓަށް އިތުބާރެއް ނެތް. ކަންކަން އިސްލާހު ވެދާނެ ކަމަކަށް މިދިޔަ މުއްދަތުގައި ނުފެނޭ. އެއީ ވަރަށް ގިނަ ފަހަރު މަތިން އެފްއޭއެމުން ބުނެފި މިވެނި ކަމެއް ރަނގަޅު ކުރާނަމޭ، އިދާރީ ކަންކަން ރަނގަޅު ކުރާނަމޭއަބްދުﷲ އަޒްމީން
އަޒްމީން ވަނީ ސާފް ޗެމްޕިއަންޝިޕުން އެފްއޭއެމް ފެއިލްވުމާއި، ފީފާ ވޯލްޑް ކަޕް ކޮލިފައިން ގުރޫޕް ސްޓޭޖަށް ކޮލިފައިނުވެ ދިވެހި ޓީމު ކެޓިއިރު، އެފްއޭމުން ޓީމަށް ކޮށްދިނީ ކޮންކަމެއްތޯ ސުވާލުކޮށްފައެވެ. އަދި އެފްއޭއެމުގައި ނެތީ ދިވެހި ފުޓްބޯޅައަށް އިޚުލާސްތެރި ބައެއް ކަމަށާއި، އެ ބަޔަކާއެކު ކުރިއަށްދިޔުމަކީ އުނދުގޫވާނެ ކަމެއް ކަމަށް އަޒްމީން ވަނީ ފާހަގަކޮށްފައެވެ.
އެފްއޭއެމަށް ފީފާ އާއި އޭއެފްސީން އަދި އެނޫންވެސް ގޮތްގޮތުން ދޭ ފައިސާ، އެތަނުގެ ވެރިން ނަހަމަގޮތުގައި ބޭނުންކުރާކަމުގެ ތުހުމަތުގައި ފުލުހުން ވަނީ އެ އިދާރާއަށް ވަދެ ތަޙުޤީޤުގެ ބޭނުމަށް ބައެއް ތަކެތި ގެންގޮސްފައެވެ.
އެއާއެކު އެފްއޭއެމުން ނެރުނު ބަޔާނުގައި ވަނީ އެ އިދާރާ ފުލުހުން ރެއިޑުކޮށް ތަޙުޤީޤަށް ބައެއް ސާމާނު ގެންދިއުމުން، ދުވަހުން ދުވަހަށް ކުރަންޖެހޭ މަސައްކަތް ހުއްޓިފައިވާ ކަމަށާއި، ދިވެހި ޕްރިމިއަރ ލީގާއި ރޭވިފައިހުރި އެހެން މުބާރާތްތައްވެސް ކުރިއަށް ނުގެންދެވޭނެ ކަމަށެވެ.