ލާމަރުކަޒީ ނިޒާމުގެ ހިނގެވުން ހަރުދަނާ ކުރެއްވުމަށްޓަކައި ޤާނޫނަށް އިޞްލާޙެއް ހުށައަޅުއްވަން ތައްޔާރުވެވަޑައިގަންނަވަމުން ގެންދަވާކަމަށް އެލްޖީއޭގެ ރައީސް އަދި ހޯމް މިނިސްޓަރ ޢުމަރުނަޞީރު ވިދާޅުވެއްޖެއެވެ. ހޯމް މިނިސްޓަރ ޢުމަރު ނަޞީރު މިހެން ވިދާޅުވީ ސިޓީ އަދި އަތޮޅު ކައުންސިލްތަކުގެ ތިންވަނަ މަހާސިންތާ ފެއްޓެވުމުގެ ގޮތުން މިއަދު ބޭއްވެވި ޖަލްސާގައި ވާހަކަދައްކަވަމުންނެވެ.
ސިޓީ އަދި އަތޮޅު ކައުންސިލްތަކުގެ މަހާސިންތާއަކީ ލާމަރުކަޒީ ދާއިރާތަކުގެ ތަރައްޤީގެ ޙާލަތު ދެނެގަތުމަށާއި، ލާމަރުކަޒީ އުޞޫލުން ހިންގެވުމުގައި ހުރި ދަތިތައް ދެނެގަތުމާއި، އެކަންކަމާމެދުކަމާބެހޭ ފަރާތްތަކުގެ މެދުގައި މަޝްވާރާކުރައްވައި، ޙައްލެއް ހޯއްދެވުމުގެ ގޮތުން ބާއްވަވަމުން އަންނަ މަހާސިންތާއެކެވެ. އަދި ކުރީގެ މަހާސިންތާތަކުން ނިންމެވިކަންކަން ތަންފީޒުކުރެވުނު މިންވަރު ބެއްލެވުމާއި އިދާރީގޮތުން ކަންކަން ފަސޭހަކުރެއްވުމަށް ކުރެއްވިދާނެ ކަންކަން ދެނެގަތުންވެސް މިމަހާސިންތާގެ މަޤްޞަދުތަކުގެ ތެރޭގައި ހިމެނެއެވެ.
މިނިސްޓަރ ޢުމަރު ނަޞީރު ވިދާޅުވީ ލާމަރުކަޒީ ނިޒާމު ރަނގަޅަށް ހިނގާނީ އެ ނިޒާމްގައި ހިމެނޭ ހުރިހާ ފަށަލައެއްގައި ހިމެނޭ މީހުންވެސް އެއް އަމާޒަކަށް މަސައްކަތްކޮށްގެންކަމަށެވެ. މިގޮތުންމިހާރު ދިމާވެފައިވާ އެންމެ ބޮޑު ގޮންޖެހުމަކީ ލާމަރުކަޒީ ނިޒާމުގައި ހިމެނޭ ސަރުކާރާއި، ސީޓީ ކައުންސިލްތަކާއި އަތޮޅު ކައުންސިލްތަކާއި، ރަށު ކައުންސިލްތަކާއި، އެލްޖީއޭ އަދި ޒިންމާދާރު އިސްވެރިންނަށް ގުޅިގެން އެކީގައި އެއް އަމާޒަކަށް މަސައްކަތް ނުކުރެވުންކަން މިނިސްޓަރ ފާހަގަކުރެއްވިއެވެ.
img:http://s1.psmnews.mv/images/660x400/14590874622919.jpg|އެލްޖީއޭގެ ސީއީއޯ ފާރޫގް މުހައްމަދު ހަސަން / ފޮޓޯ: ޕީއެސްއެމް ނިއުސް
މިނިސްޓަރ ވިދާޅުވީ ލާމަރުކަޒީ ނިޒާމް ހަރުދަނާ ކުރެއްވުމަށް ޤާނޫނަށް ގެންނަވާ އިޞްލާޙު ޑްރާފްޓް ކުރެއްވުމުގެ މަސައްކަތް ނިމިފައިވާކަމަށާއި، ކުރިޔަށް އޮތްތާނގައި ކަމާބެހޭ ފަރާތްތަކާއެކު މި ޑްރާފްޓާ ބެހޭގޮތުން މަޝްވަރާކުރުމަށްފަހު، މި އިޞްލާޙު ރައްޔިތުންގެ މަޖިލީހަށް ފޮނުއްވާނެކަމަށެވެ.
މިމަސައްކަތު ބައްދަލުވުމުގައި ސަރުކާރުގެ އެކި ވުޒާރާތަކުން ކުރަމުންދާ މަސައްކަތްތަކާ ބެހޭގޮތުން ކަރުދާސްތައް ހުށައެޅުއްވުމާއި އެ ވުޒާރާތަކާއި ކައުންސިލްތަކާ ގުޅިވަޑައިގެން މަސައްކަތްތައް ކުރިޔަށް ގެންދެވޭނެ ގޮތްތަކާ ބެހޭގޮތުން މަޝްވަރާކުރެވިގެންދާނެއެވެ. މަހާސިންތާ ފެއްޓެވުމުގެ ގޮތުން ފުރަތަމަ ކަރުދާސް ހުށައެޅުއްވީ ޖެންޑަރ މިނިސްޓްރީންނެވެ. މިފަހަރުގެ މަހާސިންތާގައިވެސް ސިޓީ އަދި އަތޮޅު ކައުންސިލްތަކުގެ އިސްވެރިންނާއި ކައުންސިލްތަކުގެ ޒިންމާދާރު އިސްވެރިން ބައިވެރިވެވަޑައިގަންނަވައެވެ. މަހާސިންތާގެ ބައިވެރިން ފާހަގަކުރައްވަނީ މިމަހާސިންތާއަކީ ލާމަރުކަޒީ ނިޒާމު ހަރުދަނާކުރެއްވުމަށް ލިބިގެންދާ މުހިންމުފުރުޞަތެއްގެ ގޮތުގައެވެ.
ރާއްޖޭގެ ސަތޭކައަށްޑިހަ އަށްރަށެއްގައި ލާމަރުކަޒީ ނިޒާމުގެ ދަށުން ދުއިސައްތަ ނުވަ ކައުންސިލްއޮވެއެވެ. މިކައުންސިލްތަކުގައި ޖުމްލަ އެއްހާސް ހަތްދިހަ އަށް ކައުންސިލަރުން ޙަރަކާތްތެރިވެވަޑައިގަންނަވައެވެ.