މި އަހަރުގެ ދިވެހި ސާފް ލީގުގެ ޗެމްޕިއަންކަން ހުސެއިން އަރީފް (އިބޫ) ހޯދިއިރު، ފުރަތަމަ ޖޫނިއަރ ސާފިން ލީގުގެ ޗެމްޕިއަންކަން ކަޔާން އަބްދުﷲ އަރީފް ހޯދައިފިއެވެ.
ލީގު ޗެމްޕިއަންކަން އިބޫ ހޯދީ 3590 ޕޮއިންޓާއެކުއެވެ. މިދިޔަ އަހަރުގެ ލީގު ޗެމްޕިއަން ހޯދި އަޙްމަދު އާގިލް (އަންމަޑޭ) މި ފަހަރު ދެވަނައަށް ދިޔައިރު، އޭނާއަށް ލިބިފައިވަނީ 3340 ޕޮއިންޓެވެ. އަދި ތިންވަނައިގައި އޮތް ނަޖާހު މުޙައްމަދު (ކަބޯ) އަށް ލިބިފައިވަނީ 3070 ޕޮއިންޓެވެ.
މި އަހަރުގެ އެންމެ ފުރަތަމަ މުބާރާތް ކަމަށްވާ ގދ. ގައްދޫ ކަޅެގަލެކޮޑާގައި އިބޫ ވަނީ ކުއާޓާ ފައިނަލުން ބަލިވެފައެވެ. އެ މުބާރާތުން އޭނާ އަށް 610 ޕޮއިންޓް ލިބުނުއިރު، މ. މުލީގައި ބޭއްވި މުލީކޮޅު ރާޅުގަނޑުގައި އިބޫ ވަނީ ދެވަނަ ހޯދައިގެން 860 ޕޮއިންޓް ހޯދާފައެވެ. އަދި ކ. ހިންމަފުށީގައި ބޭއްވި ގާމާދޫކޮޅު މުބާރާތާއި، ކ. ތުލުސްދޫގައި ބޭއްވި ރަންދާ ރާޅުގަނޑުގައި ޗެމްޕިއަންކަން ހޯދައިގެން އިބޫ ވަނީ އެއިން ކޮންމެ މުބާރާތަކުން 1000 ޕޮއިންޓް ހޯދާފައެވެ.
އެހެން ނަމަވެސް މާލޭ ރާޅުގަނޑު ސަރަހައްދުގައި ކުރިއަށްދިޔަ ޤައުމީ ސާފިން މުބާރާތް ކަމަށްވާ ރަންނަމާރި ޗެލެންޖް 1445 ގެ ސެމީ ފައިނަލުގައި އިބޫ ވަނީ ހޫދު އަޙްމަދު އަތުން ބަލިވެފައެވެ. ސެމީގެ ހީޓުގައި ހޫދު ވަނީ ޖުމްލަ 13.34 ސްކޯ ކޮށްފައެވެ. އިބޫއަށް ހޯދުނީ 11 ޕޮއިންޓެވެ.
މީގެ އިތުރުން ޖޫނިއާ ސާފިން ލީގު ކަޔާން ކާމިޔާބުކޮށްފައިވަނީ ރަންނަމާރި ޗެލެންޖުގެ ޖޫނިއާ ބައިގެ ޗެމްޕިއަންކަމާއެކުއެވެ. ރަންނަމާރި ޗެލެންޖުގެ އިތުރުން ކަޔާން ވަނީ ހިންމަފުށީގައި ބޭއްވި ގާމާދޫކޮޅު ރާޅުގަނޑުގެ ޖޫނިއާ ބައިން ޗެމްޕިއަންކަމާއި، ގައްދޫ ކަޅެގަލެކޮޑާ އާއި މުލީގައި އޮތް މުލީކޮޅު ރާޅުގަނޑު އަދި ތުލުސްދޫގައި ބޭއްވި ރަންދާ ރާޅުގަނޑުގެ ސެމީ ފައިނަލުގައި ވާދަކޮށްފައެވެ.
އިއްޔެ ކުރިއަށްދިޔަ ރަންނަމާރި ޗެލެންޖުގެ ޖޫނިއާ ބައިގެ ފައިނަލް ހީޓުގައި މުޙައްމަދު އިނާން އަބްދުލް ހަންނާނާ ވާދަކޮށް ކަޔާން ވަނީ 12.25 ގެ ސްކޯއެއް ހޯދާފައެވެ. އަދި ފުރަތަމަ ރާޅަށް 6.75 ގެ ސްކޯއެއް ހޯދިއިރު، ހަތަރުވަނަ ރާޅަށް ވަނީ 5.50 ސްކޯއެއް ހޯދާފައެވެ. ފައިނަލުގައި އިނާނަށް ޖުމްލަ އެއްކުރެވުނީ 7.75 ގެ ސްކޯއެކެވެ.