މި އަހަރުގެ ދިވެހި ސާފް ލީގުގެ ފަހު މުބާރާތް އަދި ޤައުމީ ސާފިން މުބާރާތް ކަމަށްވާ ރަންނަމާރި ޗެލެންޖް 1445 ގެ ޗެމްޕިއަންކަން އަޙްމަދު އާގިލް (އަންމަޑޭ) ހޯދައިފިއެވެ.
މިއީ މިދިޔަ އަހަރުގެ ލީގު ޗެމްޕިއަންކަން ހޯދި އަންމަޑޭ، ރަންނަމާރި ޗެލެންޖުގެ ޗެމްޕިއަންކަން ހޯދި ފުރަތަމަ ފަހަރެވެ. މާލޭ ރާޅުގަނޑު ސަރަހައްދުގައި ކުރިއަށްދިޔަ މި މުބާރާތުގެ ފައިނަލް ހީޓުގައި އަންމަޑޭ ވާދަކުރީ 2021 ވަނަ އަހަރުގެ ފައިނަލުގައި އޭނާ ބަލިކުރި ހޫދު އަޙްމަދާއެވެ.
އިއްޔެ ހެނދުނު ކުރިއަށްދިޔަ ފައިނަލް ހީޓުގައި އަންމަޑޭ ވަނީ ޖުމްލަ 9.75 ގެ ސްކޯއެއް ހޯދާފައެވެ. ހޫދަށް ލިބުނީ ޖުމްލަ 8.50 ގެ ސްކޯއެކެވެ. އަންމަޑޭ އެންމެ ގިނައިން ސްކޯކުރީ ދެވަނަ ރާޅާއި ފަހު ރާޅުގައެވެ. އެގޮތުން ދެވަނަ ރާޅަށް ހަ ޕޮއިންޓް ހޯދިއިރު، ފަހު ރާޅަށް ވަނީ 3.75 ގެ ސްކޯއެއް ހޯދާފައެވެ.
މީގެ އިތުރުން ރަންނަމާރި ޗެލެންޖުގެ އަންހެން ޑިވިޝަނުގެ ޗެމްޕިއަންކަން މިއަހަރުވެސް ހޯދީ މަރިޔަމް ރާހިލް ނަސީމް (އާޔާ) އެވެ. އާޔާ ވަނީ ފާއިތުވި ދެ އަހަރުވެސް ރަންނަމާރި ޗެލެންޖުގެ އަންހެން ޑިވިޝަނުގެ ޗެމްޕިއަންކަން ހޯދާފައެވެ. އަދި މިދިޔަ އަހަރު ގދ. ގައްދޫގައި ބޭއްވި ކަޅެގަލެކޮޑާ އާއި، ކ. ހިންމަފުށީގައި ބޭއްވި ގާމާދޫކޮޅު މުބާރާތްވެސް ކާމިޔާބުކުރީ އޭނާއެވެ.
އިއްޔެ މެންދުރުފަހު ކުރިއަށްދިޔަ ވާދަވެރި ފައިނަލް ހީޓުގައި އާޔާ ޗެމްޕިއަންކަން ހޯދީ ނަހާ ނަސްރުﷲ އާ ވާދަކޮށް ޖުމްލަ 8.37 ގެ ސްކޯއަކާއެކުއެވެ. އާޔާގެ އެންމެ ރަނގަޅު ދެ ރާޅަށް ވަނީ 4.14 އާއި 4.20 ގެ ސްކޯއެއް ހޯދާފައެވެ. ނަހާ ވަނީ ފައިނަލް ހީޓުގައި 7.47 ގެ ސްކޯއެއް ހޯދާފައެވެ.
ދެން މި ފަހަރުގެ މުބާރާތުގައި ކުރިއަށްދިޔަ މާސްޓާސް ކެޓެގަރީގެ ފައިނަލުގައި މުޙައްމަދު ފަޔާޒް ބަލިކޮށް، ޗެމްޕިއަންކަން ހޯދީ ހުސެއިން ފަޔާޒް (ފަޔާނީ) އެވެ. މިއީ 2005 ވަނަ އަހަރުގެ ފަހުން ފަޔާނީ މުބާރާތެއްގައި ރާޅާއެޅި ފުރަތަމަ ފަހަރެވެ.
އިއްޔެ ހެނދުނު ކުރިއަށް ގެންދިޔަ ފައިނަލް ހީޓުގައި ފަޔާނީ ވަނީ ތިން ރާޅާ އަޅައިގެން ޖުމްލަ 10.75 ގެ ސްކޯއެއް ހަދާފައެވެ. އޭނާގެ ދެވަނަ ރާޅަށް 5.50 ގެ ސްކޯއެއް ހޯދިއިރު، ޖެހިގެން އެޅި ރާޅުގައި 5.25 ވަނީ ސްކޯ ކޮށްފައެވެ. ކުރީގެ ޤައުމީ ޗެމްޕިއަން ފަޔާޒަށް ފައިނަލް ހީޓުގައި ހޯދުނީ ޖުމްލަ 6.90 ގެ ސްކޯއެކެވެ.
މީގެ އިތުރުން ރަންނަމާރި ޗެލެންޖުގައި ކުރިއަށްދިޔަ ޓީމު އިވެންޓް ކަމަށްވާ "މަރުޙަބާ ކަޕް" ގެ ޗެމްޕިއަންކަން މި ފަހަރު ހޯދީ ގދ. ގައްދޫ ޓީމުންނެވެ.