މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި ސްރީ ލަންކާ ބަލިކޮށް، ސެމީ ފައިނަލުގެ ޖާގައެއް މުބާރާތް ބާއްވާ ޤައުމު ކަމަށްވާ އިންޑިއާއިން ކަށަވަރުކޮށްފިއެވެ.
މުމްބާއީގައި ހުންނަ ވަންކެޑޭ ސްޓޭޑިއަމުގައި ކުޅުނު މި މެޗުން އިންޑިއާ މޮޅުވީ ފަސޭހަކަމާއެކު 302 ލަނޑުންނެވެ.
މި މެޗުގެ ގުރު ދިމާވުމުން ލަންކާއިން ނިންމީ ހޮވުމަށެވެ. އެއާއެކު އިންޑިއާ އެންމެ ފުރަތަމަ ކުޅެން އަރައި 50 އޯވަރު ހަމަވިއިރު އަށް ކުޅުންތެރިން ނުބައިވެގެން ވަނީ 357 ލަނޑު ހަދާފައެވެ.
އެ ޓީމުން އެންމެ ރަނގަޅަށް ކުޅުނީ 92 ބޯޅައިން 92 ލަނޑު ހެދި ޝުބްމަން ގިލް އާއި 94 ބޯޅައިން 88 ލަނޑު އެއްކުރި ވިރާޓް ކޯލީއެވެ. މި އިނިންގްސްގައި ލަންކާގެ ދިލްޝަން މަދުޝަންކަ ވަނީ 10 އޯވަރުގައި 80 ލަނޑަށް ފަސް ވިކެޓް ނަގާފައެވެ.
ޖަވާބުގައި ލަންކާ ކުޅެން އަރައި 19.4 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ އެންމެ 55 ލަނޑެވެ. އެ ޓީމުން އެންމެ ރަނގަޅަށް ކުޅުނީ 17 ބޯޅައިން 14 ލަނޑު ހެދި ކަސުން ރަޖިތައެވެ.
މި އިނިންގްސްގައި އިންޑިއާގެ މުޙައްމަދު ޝަމީ ވަނީ ފަސް އޯވަރުގައި 18 ލަނޑަށް ފަސް ވިކެޓް ނަގާފައެވެ. އަދި އެ ޓީމުގެ މުޙައްމަދު ސިރާޖް ވަނީ ހަތް އޯވަރުގައި 16 ލަނޑަށް ތިން ވިކެޓް ނަގާފައެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ސެމީގެ ޖާގައެއް އިންޑިއާއިން ކަށަވަރުކުރިއިރު، ސެމީއަށް ދަތުރުކުރާނީ ތާވަލުގެ އެންމެ ކުރީގައި އޮންނަ ހަތަރު ޓީމެވެ. އިންޑިއާއިން މިހާތަނަށް ކުޅުނު ހަތް މެޗުންވެސް މޮޅުވެފައިވާއިރު، އެ ޓީމުން ވަނީ 14 ޕޮއިންޓް ހަމަކޮށްފައެވެ. ދެވަނައިގައި އޮތް ދެކުނު އެފްރިކާއަށް ހަތް މެޗުން ލިބިފައިވަނީ 12 ޕޮއިންޓެވެ. އަދި އިންޑިއާ އަތުން ބަލިވި ލަންކާ އޮތީ ތާވަލުގެ ހަތްވަނައިގައި ހަތް މެޗުން ހަތަރު ޕޮއިންޓާއެކުއެވެ.