އަލަށް ގެނައި ކުޅުންތެރިންނާއެކު މި ފަހަރުގެ ފުރަތަމަ ޑިވިޝަނަށް ވިކްޓަރީ ސްޕޯޓްސް ކުލަބު އެރުން ނޫން ގޮތެއް ނެތް ކަމަށް އެ ޓީމުގެ މެނޭޖަރު އައްސަދު އަބްދުލްޢަނީ ބުނެފިއެވެ.
ފުޓްބޯޅަ ކެރިއަރުގައި ވިކްޓަރީއަށް އައްސަދު ކުޅެފައެއް ނުވެއެވެ. އަދި މިއީ ވިކްޓަރީގެ އޮފިޝަލެއްގެ ގޮތުގައި އޭނާ މަސައްކަތްކުރާ ފުރަތަމަ ފަހަރެވެ. އައްސަދާއެކު ޓީމުގެ ހެޑް ކޯޗުގެ މަޤާމު އަދާކުރަނީ ސޮބާހު މުޙައްމަދެވެ.
މި ފަހަރުގެ ދެވަނަ ޑިވިޝަނަށް ވިކްޓަރީން ތައްޔާރީތައް ފެށީ ރާއްޖޭގެ ފުރަތަމަ ޑިވިޝަނަށް ކުޅެފައިވާ ވަރުގަދަ ކުޅުންތެރިންނާއެކުއެވެ. އޭގެ ތެރޭގައި ޤައުމީ ޓީމުގެ ކެޕްޓަން އަކުރަމް އަބްދުލްޣަނީ އާއި ތަޖުރިބާކާރު ކުޅުންތެރިޔާ މުހައްމަދު އުމެއިރު ހިމެނެއެވެ. އަދި މާޒިޔާ ސްޕޯޓްސް އެންޑް ރެކްރިއޭޝަނަށް ކުޅުނު އަޙްމަދު އަބްދުﷲ (ލިލީ) އާއި މޫސާ ޔާމީން (ޔާމްބެ) ގެ އިތުރުން ޓީސީ ސްޕޯޓްސް ކުލަބުން ފާހަގަވެގެންދިޔަ އަޙްމަދު ރިލްވާން (ބެން) ވެސް ވަނީ ވިކްޓަރީއާ ގުޅިފައެވެ.
މީގެ އިތުރުން ވިކްޓަރީއަށް މި އަހަރު ބިދޭސީ ހަ ކުޅުންތެރިއަކު ވަނީ ގެންނަން ނިންމާފައެވެ. އޭގެ ތެރެއިން އެ ޓީމުގެ ފަރިތަކުރުންތައް މި ވަގުތު ކުރިއަށްގެންދަނީ ފަސް ކުޅުންތެރިންނާއެކުއެވެ.
ވިކްޓަރީއަށް ގެނައި ބިދޭސީ ކުޅުންތެރިންނަކީ ކުލަބު ގްރީން ސްޓްރީޓްސް އާއި ފޯކައިދޫއަށް ކުޅުނު ޕާކިސްތާނުގެ ޤައުމީ ޓީމުގެ ގޯލްކީޕަރު ހަނީފް ސާގިބާއި، މީގެ ކުރިން ޔުނައިޓެޑް ވިކްޓަރީ (ޔޫވީ) އާއި ޓީސީއަށް ކުޅުނު ކިރިގިސްތާނުގެ ފޯވާޑް އެނެޓޮލީ ވްލަސިޗޭފް (ޓޯނީ) އާއި، ބެލަރޫސްގެ ފޯވާޑް އިވާން ވެރާސްގެ އިތުރުން މިދިޔަ އަހަރު ނިއު ރޭޑިއަންޓް ސްޕޯޓްސް ކުލަބަށް ކުޅުނު އުޒްބަކިސްތާނުގެ ހަސަންބޮއޭވް ފުރްޚަޖޯން އާއި ފާރުޚް ޚައިދަރޯފުގެ އިތުރުން ކުރިން މާޒިޔާ އާއި ޔޫވީއަށް ކުޅުނު ސާބިއާގެ ޑިފެންޑަރު މިލޯސް ކޮވަސެވިޗެވެ.
މީގެ ތެރެއިން ޓީމާ ނުގުޅި ހުރީ ޓޯނީ އެކަންޏެވެ. އޭނާ ޓީމާ ގުޅޭނީ މި މަހުގެ 10 ވަނަ ދުވަހު ކަމަށް ވިކްޓަރީން މައުލޫމާތުދެއެވެ. މީގެ އިތުރުން ޓީމުގެ ގޯލްކީޕަރު ޓްރެއިނަރެއް ގޮތުގައި ހަރަކާތްތެރިވަނީ ސްރީ ލަންކާގެ ސަމްޕަތު ބުޑިކާއެވެ.
ޓީމުގެ ތައްޔާރީތަކާ ގުޅޭގޮތުން "ޕީއެސްއެމް ސްޕޯޓްސް" އިން ކުރި ސުވާލަކަށް ޖަވާބުދެމުން އައްސަދު ބުނީ މި ސްކޮޑާއެކު ބޮޑު އުއްމީދެއް އެބައޮތް ކަމަށާއި، މުޅި ޓީމާއި މެނޭޖުމަންޓުގެ އަމާޒަކީ ރާއްޖޭގެ ފުޓްބޯޅައިގެ މުއްސަނދި ތާރީޚެއް އޮތް ވިކްޓަރީ އަނެއްކާވެސް ފުރަތަމަ ޑިވިޝަނަށް އެރުން ކަމަށެވެ. އަދި މިހާރު އޮތް ސްކޮޑާ ދޭތެރޭ ހިތްހަމަޖެހޭ ކަމަށާއި، މިހާރު އޮތް ސްކޮޑާއެކު ޓީމަށް ދެއްކޭނެ އުޒުރެއް ނެތް ކަމަށްވެސް ބުންޏެވެ.
މިދިޔަ އަހަރުގެ ދެވަނަ ޑިވިޝަނުގައިވެސް ވާދަކޮށް ވިކްޓަރީއަށް ފުރަތަމަ ޑިވިޝަނަށް އެރޭ ގޮތެއް ނުވިއެވެ. އެހެންކަމުން އެ ކުލަބުން ވަނީ ދުރާލާ މި އަހަރުގެ ސީޒަނަށް ތައްޔާރުވާން ފަށާފައެވެ. މި އަހަރުގެ ދެވަނަ ޑިވިޝަން ފުޓްބޯޅަ މުބާރާތް ބޭއްވުމަށް ތާވަލުކޮށްފައިވަނީ މި މަހުގެ 20 ވަނަ ދުވަހެވެ.