އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި ޕާކިސްތާން އަތުން ބަލިވެ ބަންގްލަދޭޝް މުބާރާތުން ކަޓައިފިއެވެ.
ކޮލްކަތާގައި ހުންނަ އެޑެން ގާޑެންސް ސްޓޭޑިއަމުގައި ކުޅުނު މި މެޗުން ޕާކިސްތާން މޮޅުވީ ހަތް ވިކެޓުންނެވެ.
މި މެޗުގެ ގުރު ދިމާވުމުން ބަންގްލަދޭޝް އެންމެ ފުރަތަމަ ކުޅެން އަރައި 45.1 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 204 ލަނޑެވެ. އެ ޓީމުން އެންމެ ރަނގަޅަށް ކުޅުނީ 70 ބޯޅައިން 56 ލަނޑު ހެދި މަޙްމަދުﷲ އާއި 64 ބޯޅައިން 45 ލަނޑު އެއްކުރި ލިޓޮން ދާސްއެވެ. މި އިނިންގްސްގައި ޕާކިސްތާނުގެ ޝާހީން އަފްރީދީ އާއި މުޙައްމަދު ވަސީމް ވަނީ ކޮންމެ އުކުންތެރިއަކު ތިން ވިކެޓް ނަގާފައެވެ.
ޖަވާބުގައި ޕާކިސްތާން ކުޅެން އަރައި އެ ޓީމުން ވަނީ 32.3 ވަނަ އޯވަރުގައި ތިން ކުޅުންތެރިން ނުބައިވެގެން 205 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 74 ބޯޅައިން 81 ލަނޑު ހެދި ފަޚަރް ޒަމާން އާއި 69 ބޯޅައިން 68 ލަނޑު އެއްކުރި އަބްދުﷲ ޝަފީގެވެ.
މި ނަތީޖާއާއެކު 10 ޤައުމު ވާދަކުރާ މި މުބާރާތުން ބަންގްލަދޭޝް ކެޓިއިރު، އެ ޓީމު އޮތީ ތާވަލުގެ ފުލުން ދެވަނައިގައި ކުޅުނު ހަތް މެޗުން ލިބުނު ދެ ޕޮއިންޓާއެކުއެވެ. އަދި ތާވަލުގެ ފަސްވަނައިގައި އޮތް ޕާކިސްތާނަށް ހަތް މެޗުން ވަނީ ހަ ޕޮއިންޓް ލިބިފައެވެ. މި މުބާރާތުގެ ސެމީ ފައިނަލަށް ދަތުރުކުރާނީ ތާވަލުގެ އެންމެ ކުރީގައި އޮންނަ ހަތަރު ޓީމެވެ.