ހދ. ކުޅުދުއްފުށި ސިޓީގައި ކުރިއަށްދާ އެސްޓީއޯ ޒިގްޒެގް އިންޓަރ އޮފީސް ނުވަވަނަ ފުޓްސަލް މުބާރާތުގައި އޭއީސީ ބޮޑު ތަފާތަކުން ބަލިކޮށް މުބާރާތުގެ ކުއާޓާ ފައިނަލަށް ކުޅުދުއްފުށި ޕޯޓް ރެކްރިއޭޝަން ދަތުރުކުރިއިރު، ފުލުސް ބަލިކޮށް ސައްތައިން ސައްތަ ރިކޯޑަކާއެކު ކޭއާރްއެޗް މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.
ކުޅުދުއްފުށި ސިޓީގެ "ޒިގްޒެގް" އިން އިސްނަގައިގެން ބާއްވާ މިމުބާރާތުގައި 11 ޓީމު ވާދަކުރެއެވެ. މިމުބާރާތުގެ ގްރޫޕް ސްޓޭޖުގެ ފަހު މެޗުތަކުގެ ތެރެއިން ރޭ ޕޯޓާއި، އޭއީސީ ކުޅުނު މެޗު ފަސޭހަކަމާއިއެކު ޕޯޓް ކާމިޔާބުކޮށްފައިވަނީ 23-0 އިންނެވެ.
މި މެޗާއި ކުރިމަތިލިއިރުވެސް އޭއީސީ އޮތީ މުބާރާތުން ކަޓާފައެވެ. ބައިކޮޅަށް 51 ގޯލު ވަދެފައިވާއިރު، މުބާރާތުގައި އޭއީސީއަށް އެންމެ ގޯލެއްވެސް ކާމިޔާބުވެފައި ނުވެއެވެ. މިއީ މުބާރާތުގައި ބައި ކޮޅަށް އެންމެ ގިނަ ގޯލް ވަން ޓީމެވެ. ޕޯޓުން ރޭ ޖެހި 23 ގޯލުގެ ތެރެއިން 5 ގޯލު ކާމިޔާބުކޮށްދިނީ އައިހަމެވެ. ރޭގެ މެޗުގައި ބައްސާމާއި، އަހުމަދު އާދަމް މިއިން ކޮންމެ ކުޅުންތެރިއަކު ވަނީ 4 ގޯލް ޖަހާފައެވެ. އަތީގް ވަނީ މިމެޗުގައި ހެޓްރިކް ހަދާފައެވެ.
ޕޯޓަށް ދެން ގޯލްތައް ކާމިޔާބުކޮށްދިނީ ޝަނޫން ޖެހި ދެގޯލާއި، ސާދު ނިޒާރާއި، އަބްދުލް ރަޝީދާއި، އަމްޖަދު ހަސަންގެ އިތުރުން އަބޫބަކުރު އަލީއެވެ. ރޭގެ މެޗުގައި އޭއީސީގެ އަހުމަދު ހުސެއިން އަތުން ބައި ކޮޅަށްވެސް ވަނީ ގޯލެއް ވަދެފައެވެ. ރޭގެ މެޗުގެ މޮޅު ކުޅުންތެރިއަކަށް ހޮވިފައިވަނީ ޕޯޓުގެ އައިހަމެވެ.
ފުލުހުން ބަލިކޮށް ސައްތައިން ސައްތަ ރެކޯޑަކާއިއެކު ކޭއާރުއެޗު މުބާރާތުގެ ކުއާޓާ ފައިނަލަށް ދަތުރުކުރީ 2-1 އިން މެޗު ކާމިޔާބުކޮށްގެންނެވެ. މިމެޗުގައި ދެޓީމުގެ ފަރާތުންވެސް ބަލާހިތްވާ ފޯރިގަދަ ކުޅުމެއް ވަނީ ފެނިގެން ގޮސްފައެވެ. މެޗާއި ކުރިމަތިލިއިރުވެސް ކުއަޓާ ޔަގީން ވެފައި އޮތް ކޭއާރުއެޗުން ފުލުހުން ބަލިކޮށް މުބާރާތުގެ ކުއާޓާއަށް ދަތުރު ކުރީ ގްރޫޕްގެ އެއްވަނަ ޓީމުގެ ގޮތުގައެވެ.
ކޭއާރުއެޗުން ކާމިޔާބުކުރި ދެގޯލްވެސް ކާމިޔާބުކުރީ ޖުނައިދެވެ. ފުލުހުން ޖެހި ހަމައެކަނި ގޯލް ކާމިޔާބުކޮށްދިނީ އަހުމަދު ގާސިމެވެ. މި މެޗުން ބަލިވިއަސް ފުލުހުން ވަނީ ކުއާޓާއަށް ދަތުރުކޮށްފައެވެ.
މުބާރާތުގައި ޗެމްޕިއަން ޓީމާއި، ރަނަރަޕް އަދި ފެއާޕްލޭ ޓީމާއި، ކިންގް އޮފް ދަ ޓޯނަމެންޓުގެ އިތުރުން އެންމެ ގިނަ ލަނޑު ޖެހި ކުޅުންތެރިޔާ އަދި އެންމެ މޮޅު ފަސް ކުޅުންތެރިން ހޮވުމަށް ވަނީ ހަމަޖެހިފައެވެ. މި މުބާރާތުގެ ޗެމްޕިއަން ޓީމަށް 20000 ރުފިޔާގެ ފައިސާގެ އިނާމެއްވެސް ދިނުމަށް ވަނީ ހަމަޖެހިފައެވެ.
ރާއްޖޭގެ އެންމެ ވަރުގަދަ ފުޓްސަލް ކުޅުންތެރިން ފެނިގެންދާ މިމުބާރާތުގެ މެޗުތައް މުޅި ރާއްޖެއަށް ފެންނާނޭހެން ހުރިހާ މެޗެއް ޒިގްޒެގް ފޭސްބުކް ޕޭޖުން ލައިވް ކުރެއެވެ. އަދި ކުއާޓާ ފައިނަލް މެޗުތަކުން ފެށިގެން ފައިނަލް މެޗާއި ހަމައަށް ހުރިހާ މެޗެއް ޔެސް ޓީވީން ވަގުތުން ގެނެސްދޭނެއެވެ. މުބާރާތުގެ މެޗުތަކުގެ ޚަބަރުތައް، ޚަބަރު އޮންލައިނާއި، ވަގުތު އޮންލައިން އަދި ޕީއެސްއެމްއިން ގެނެސް ދިނުމަށް ވަނީ ހަމަޖެހިފައެވެ.
މުބާރާތުގެ އެކްސްކްލޫސިވް ޕާޓްނަރަކީ އެސްޓީއޯއެވެ. ބޭންކިން ޕާޓްނަރަކީ ބީއެމްއެލްއެވެ. ޑިޖިޓަންލް ޕާޓްނަރަކީ ދިރާގެވެ. މުބާރާތުގެ ބްރޯޑްކާސްޓިން ޕާޓްނަރަކީ ޔެސްޓީވީއެވެ. އަދި އޮންލައިން ޕާޓްނަރުންނަކީ ޚަބަރު އޮންލައިނާއި ވަގުތެވެ. ޕްރިންޓިން ޕާޓްނަރަކަށް ޑަބްލިއު ކްރާފްޓް ސެންޓަރ ހަމަޖައްސާފައިވާއިރު، ކޭޓްރިން ޕާޓްނަރުންނަކީ އޮރެންޖް ޑެކް އަދި ކަނިވަލް އެވެ. މުބާރާތުގެ އެޑް ބޯޑަރުންގެ ގޮތުގައި ހަމަޖައްސާފައިވަނީ އިންކްވެލް، ޗާންދަލިޔާ ބުކްޝޮކް އަދި ސީންއެވެ.