ދުނިޔޭގެ ބޮޑީބޯޑިން ވޯލްޑް ޓުއާގެ ޖޫނިއަރ ރޭންކިންގެ 10 ވަނަ ރާއްޖޭގެ އުއްމީދީ ތަރި އާމިން އުމަރު މޫސާ އަށް ލިބިއްޖެއެވެ.
އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގެ ޖޫނިއާ ރޭންކިން 10 ވަނަ އާމިންއަށް ލިބުނުކަން ހާމަވީ މިއަހަރުގެ ބޮޑީބޯޑިން ވޯލްޑް ޓުއާގެ މުބާރާތްތަކަށްފަހު އިއުލާންކުރި ޖޫނިއާ ރޭންކިންގައެވެ.
ޖޫނިއާ ރޭންކިންގެ ދުނިޔޭގެ 10 ވަނައިގައި އާމިން އޮތީ 2،417 ޕޮއިންޓާއެކުގަ އެވެ. އެއްވަނައިގައި އޮތީ 4،250 ޕޮއިންޓާއެކު ޕެރޫގެ މައިކަލް ޔަންސީ އެވެ.
އާމިން ވަނީ މިއަހަރުގެ ތެރޭގައި ބޭއްވި ވޯލްޑް ޓުއާގެ ޖޫނިއާ ހަ މުބާރާތުގެ ތެރެއިން ހަތަރު މުބާރާތެއްގައި ވާދަކޮށްފައެވެ. ޖުމްލަ 11 މުބާރާތެއް ވޯލްޑް ޓުއާގައި ހިމެނެއެވެ. މީގެތެރެއިން ޖޫނިއާ ބައިގައި ހިމެނެނީ ހަ މުބާރާތެވެ. އާމިން ބައިވެރިވި މުބާރާތްތަކަކީ ރާއްޖޭގައި ބޭއްވި މޯލްޑިވްސް ޕްރޯ އާއި ފްރާންސްގައި ބޭއްވި ލަ ސަލީ ޕްރޯ އާއި ޕޯޗުގަލްގެ ސިންޓްރާ ޕްރޯ އާއި ފްރޮންޓޮން ކިންގެވެ..
ރާއްޖޭގައި ބޭއްވި މޯލްޑިވްސް ޕްރޯގެ ސެމީ ފައިނަލުގައި އާމިން ވާދަކުރިއިރު އަނެއް ތިން މުބާރާތުގައި ވެސް އާމިން ވަނީ ރަނގަޅު ވާދަައެއްކޮށްފައެވެ. މިއީ ޖޫނިއާ ބައިގައި އާމިން ވާދަކުރި ފަހު އަހަރެވެ. އެހެންކަމުން ރަނގަޅު ރޭންކިންއެއް ހޯދުމަށް އޭނާ މިއަހަރު މަސައްކަތްތަކެއް ކުރިއެވެ.
މިއީ ރާއްޖޭގެ ބޮޑީބޯޑަރެއް ދުނިޔޭގެ ރޭންކިންގެ ގަދަ 10 ގެ ތެރޭގައި ހިމެނުނު ފުރަތަމަ ފަހަރެވެ.