ހދ. ކުޅުދުއްފުށި ސިޓީގައި ކުރިއަށްދާ އެސްޓީއޯ ޒިގްޒެގް އިންޓަރ އޮފީސް ނުވަވަނަ ފުޓްސަލް މުބާރާތުގެ ކުއާޓާ ފައިނަލަށް އެމްއެންޑީއެފް އާއި އެސްޓީއޯ ދަތުރުކުރިއިރު، ކޭސީސީއާރްސީން މުބާރާތުގައި ކުރިއަށްދިޔުމުގެ އުއްމީދު އައުކޮށްފިއެވެ.
މުބާރާތުގެ ކުއާޓާއަށް އެމްއެންޑީއެފް ދަތުރުކުރީ ރޭ ކުޅުނު މެޗުގައި 2-0 ގެ ނަތީޖާއަކުން ދިރާގު ބަލިކޮށްގެންނެވެ. ދެ ޓީމުގެ ފަރާތުންވެސް ފޯރިގަދަ ކުޅުމެއް މި މެޗުގައި ފެނިގެންދިޔައިރު، މެޗުގެ އެންމެ ފަހު ކަށިގަނޑުގެ އަޑާ ހަމައަށްވެސް ދެ ޓީމުގެ ސަޕޯޓަރުންނަށްވެސް ޖެހުނީ ނޭވާ ހިފަހައްޓާލައިގެން ތިބުމަށެވެ. ފުލުފުލުގައި ދެ ޓީމުންވެސް ހަމަލާތައް ގޯލާ އަމާޒުކޮށްފައިވާއިރު، ތަފާތަކަށްވީ އެމްއެންޑީއެފްއަށް މިމެޗުގައި ދެ ލަނޑުވެސް ކާމިޔާބުކޮށްދިން ތަހުމީމް ނޫހެވެ. އޭނާ ވަނީ މިމެޗުގެ މޮޅު ކުޅުންތެރިޔާގެ މަޤާމުވެސް ހޯދާފައެވެ.
އެމްއެންޑީއެފުން މިމެޗު ކާމިޔާބުކުރިއިރު، އެ ޓީމުން ކުޅުނު ފުރަތަމަ މެޗުގައި ވަނީ ކޭސީސީއާރްސީ 4-1 ގެ ނަތީޖާއަކުން ބަލިކޮށްފައެވެ. އަދި ދިރާގު ވަނީ އެ ޓީމުން ކުޅުނު ފުރަތަމަ މެޗުން މޮޅުވެފައެވެ.
މުބާރާތުގެ ކުއާޓާ ފައިނަލަށް އެސްޓީއޯ ދަތުރުކޮށްފައިވަނީ ރޭ ކަސްޓަމްސްގެ މައްޗަށް 2-1 ގެ ނަތީޖާއަކުން ކުރިހޯދައިގެންނެވެ. މި މެޗުގައި ފުރަތަމަ ލީޑު ނެގީވެސް އެސްޓީއޯއިންނެވެ. އެ ގޮތުން މެޗުގެ ފަސްވަނަ މިނިޓްގައި މި ލަނޑު އެޓީމަށް ކާމިޔާބުކޮށްދިނީ އަހުމަދު މުހައްމަދެވެ. މި މެޗުގައި އެސްޓީއޯގެ ދެވަނަ ލަނޑު ޖަހައިދިނީ މެޗުގެ 25 ވަނަ މިނިޓްގައި ހަސަން މުހައްމަދެވެ.
މި މެޗުގައި ކަސްޓަމްސްއިން ކާމިޔާބުކުރި ހަމައެކަނި ލަނޑު ޖަހައިދިނީ މައުފޫޒް އާދަމެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ އެސްޓީއޯގެ އަހުމަދު މުހައްމަދެވެ.
މި މެޗުން ބަލިވި ނަމަވެސް ކަސްޓަމަށް ދެން އޮންނަ މެޗު ކާމިޔާބުކޮށްގެން މުބާރާތުގެ ކުއާޓާއަށް ދިއުމުގެ ފުރުސަތު އެންނާނެއެވެ. ނަމަވެސް ދެން އޮންނަ މެޗުގައި ކަސްޓަމްސް ކުޅެންޖެހޭނީ އެންމެ ފަހުގެ ޗެމްޕިއަން އުރީދޫއާ ދެކޮޅަށެވެ. އެ މެޗު އެއްވަރުކޮށްލައިގެންވެސް ކުއާޓާއަށް ދިއުމުގެ ފުރުސަތު އުރީދޫއަށް އެބައޮތެވެ.
މީގެއިތުރުން ކޭސީސީއާރްސީން މުބާރާތުގައި ކުރިއަށްދިއުމުގެ އުއްމީދު އައުކުރީ ރޭ ފަސޭހަކަމާއެކު އަފީފުއްދީން ސްކޫލް ބަލިކޮށްގެންނެވެ. އަފީފުއްދީންގެ މައްޗަށް ކޭސީސީއާރްސީން ކުރިހޯދީ 7-1 ގެ ތަފާތު ބޮޑު ނަތީޖާއަކުންނެވެ. މި މުބާރާތުގައި ކޭސީސީއާރްސީން ކުޅުނު ފުރަތަމަ މެޗުގައި ވަނީ އެމްއެންޑީއެފް އަތުން ބަލިވެފައެވެ. ނަމަވެސް ރޭގެ މޮޅާއެކު އެ ޓީމަށް ވަނީ ކުއާޓާއަށް ދިއުމުގެ އުއްމީދު އާވެފައެވެ.
މި މެޗުގައި ކޭސީސީއާރްސީގެ އާދަމް އަލީ އާއި، މުހައްމަދު ޖައުފަރާއި، ހަސަން ހުސެއިން، މިއިން ކޮންމެ ކުޅުންތެރިއަކު ވަނީ ދެ ލަނޑު ޖަހާފައެވެ. މި މެޗުގައި ކޭސީސީއާރްސީގެ ހަތްވަނަ ލަނޑު ކާމިޔާބުކޮށްދިނީ މައުރޫފް އާދަމެވެ. އަދި މި މެޗުގައި އަފީފުއްދީނުގެ ހަމައެކަނި ލަނޑު ޖަހައިދިނީ ނަގަރާޖަންއެވެ.
މި ނަތީޖާއާއެކު އަފީފުއްދީން ވަނީ މުބާރާތުން ކަޓާފައެވެ. އަދި ކުޅުނު ދެ މެޗުން އެޓީމު ކޮޅަށް ވަނީ 15 ލަނޑު ވަދެފައެވެ. މި ނަތީޖާއާއެކު ކޭސީސީއާރުސީއަށް މުބާރާތުގައި ކުރިއަށް ދިއުމުގެ އުއްމީދެއް އޮތްއިރު، މި މެޗުގެ މޮޅު ކުޅުންތެރިއަކީ ކޭސީސީއާރްސީގެ އާދަމް އަލީއެވެ.
މުބާރާތުގައި ޗެމްޕިއަން ޓީމާއި، ރަނަރަޕް އަދި ފެއާޕްލޭ ޓީމާއި، ކިންގް އޮފް ދަ ޓޯނަމެންޓުގެ އިތުރުން އެންމެ ގިނަ ލަނޑު ޖެހި ކުޅުންތެރިޔާ އަދި އެންމެ މޮޅު ފަސް ކުޅުންތެރިން ހޮވުމަށް ވަނީ ހަމަޖެހިފައެވެ. މި މުބާރާތުގެ ޗެމްޕިއަން ޓީމަށް 20000 ރުފިޔާގެ ފައިސާގެ އިނާމެއްވެސް ދިނުމަށް ވަނީ ހަމަޖެހިފައެވެ.
މުބާރާތުގެ އެކްސްކްލޫސިވް ޕާޓްނަރަކީ އެސްޓީއޯއެވެ. ބޭންކިން ޕާޓްނަރަކީ ބީއެމްއެލްއެވެ. ޑިޖިޓަންލް ޕާޓްނަރަކީ ދިރާގެވެ. މުބާރާތުގެ ބްރޯޑްކާސްޓިން ޕާޓްނަރަކީ ޔެސްޓީވީއެވެ. އަދި އޮންލައިން ޕާޓްނަރުންނަކީ ޚަބަރު އޮންލައިނާއި ވަގުތެވެ. ޕްރިންޓިން ޕާޓްނަރަކަށް ޑަބްލިއު ކްރާފްޓް ސެންޓަރ ހަމަޖައްސާފައިވާއިރު، ކޭޓްރިން ޕާޓްނަރުންނަކީ އޮރެންޖް ޑެކް އަދި ކަނިވަލް އެވެ. މުބާރާތުގެ އެޑް ބޯޑަރުންގެ ގޮތުގައި ހަމަޖައްސާފައިވަނީ އިންކްވެލް، ޗާންދަލިޔާ ބުކްޝޮކް އަދި ސީންއެވެ.