އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި ސްރީ ލަންކާ ބަލިކޮށް، އަފްޣާނިސްތާނުން ސެމީ ފައިނަލުގެ އުއްމީދު އައުކޮށްފިއެވެ.
މަހަރާޝްޓްރާ ކްރިކެޓް އެސޯސިއޭޝަން ސްޓޭޑިއަމުގައި ކުޅުނު މި މެޗުން އަފްޣާނިސްތާން މޮޅުވީ ހަތް ވިކެޓުންނެވެ.
މި މެޗުގެ ގުރު ދިމާވުމުން އަފްޣާނިސްތާން ނިންމީ ހޮވުމަށެވެ. އެއާއެކު ލަންކާ އެންމެ ފުރަތަމަ ކުޅެން އަރައި 49.3 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 241 ލަނޑެވެ. އެ ޓީމުން އެންމެ ރަނގަޅަށް ކުޅުނީ 60 ބޯޅައިން 46 ލަނޑު ހެދި ޕަތުމް ނިސަންކަ އާއި 50 ބޯޅައިން 39 ލަނޑު އެއްކުރި ޓީމުގެ ކެޕްޓަން ކުސަލް މެންޑިސްއެވެ.
މި އިނިންގްސްގައި އަފްޣާނިސްތާނުގެ ފަޒަލްހައްގު ފާރޫގީ ވަނީ 10 އޯވަރުގައި 34 ލަނޑަށް ހަތަރު ވިކެޓް ނަގާފައެވެ. އަދި އެ ޓީމުގެ މުޖީބުރް ރަހްމާން ވަނީ 10 އޯވަރުގައި 38 ލަނޑަށް ދެ ވިކެޓް ނަގާފައެވެ.
ޖަވާބުގައި އަފްޣާނިސްތާން ކުޅެން އަރައި އެ ޓީމުން ވަނީ 45.2 ވަނަ އޯވަރުގައި ތިން ކުޅުންތެރިން ނުބައިވެގެން 242 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 63 ބޯޅައިން 73 ލަނޑު ހެދި އަޒްމަތުﷲ އޮމަރްޒައި އާއި 74 ބޯޅައިން 62 ލަނޑު އެއްކުރި ރަޙްމަތު ޝާހެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ސެމީގެ އުއްމީދު އަފްޣާނިސްތާނުން އައުކުރިއިރު، ސެމީއަށް ދަތުރުކުރާނީ ތާވަލުގެ އެންމެ ކުރީގައި އޮންނަ ހަތަރު ޓީމެވެ. އަފްޣާނިސްތާން މިވަގުތު އޮތީ ތާވަލުގެ ފަސްވަނައިގައި ކުޅުނު ހަ މެޗުން ލިބުނު ހަ ޕޮއިންޓާއެކުއެވެ. އަދި ލަންކާ އޮތީ ތާވަލުގެ ހަވަނައިގައި ހަ މެޗުން ހަތަރު ޕޮއިންޓާއެކުއެވެ.