ޣައްޒާ ސިޓީއަށް ވަންނަން މަސައްކަތް ކުރި ޔަހޫދީ ފައުޖުގެ ޓޭންކުތަކަށް ޙަމާސް ޖަމާޢަތުން ވަރުގަދަ ހަމަލަތަކެއް ދީފިއެވެ. ޔަހޫދީ ޓޭންކުތައް މިހާރު ވަނީ ޣައްޒާ ސިޓީގެ ރަށްބޭރަށް ޖަމާވެފައެވެ. އަދި، ޞަލާޙުއްދީން މަގަށް އެރުމަށް މަސައްކަތް ކުރުމުން ޙަމާސް ޖަމާޢަތުގެ މުޖާހިދުން ވަނީ ޔަހޫދީ ފައުޖުތަކަށް ވަރުގަދަ ހަމަލަތަކެއް ދީފައެވެ. އެ ސަރަޙައްދުގައި ޔަހޫދީ ފައުޖުތަކާއި ޙަމާސްގެ މުޖާހިދުންނާ ދެމެދު ވަރުގަދަ ކުރިމަތިލުންތަކެއް ހިންގަމުންދާ ކަމުގައި ރިޕޯޓުތައް ބުނެއެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,306 އަށް އަރާފައިވާއިރު، އޭގެ ތެރޭގައި 3,300 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ. ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
ޣައްޒާ ސިޓީއަކީ ޣައްޒާ ފުރަބަންދު ކުރަން ޔަހޫދީން ޖަހާފައިވާ ފެންސާއި 3 ކިލޯމީޓަރު ދުރުގައި އޮންނަ ރަށެކެވެ. ޣައްޒާ ސިޓީގެ ދެކުނުން އޮންނަ ޒައިތޫނި ޑިސްޓްރިކްޓަށް އެރުމަށް ޔަހޫދީ ފައުޖުތަކުން މިހާރު ދަނީ މަސައްކަތް ކުރަމުންނެވެ. އަދި، ޞަލާޙުއްދީން މަގު ހިފާފައިވާ ކަމަށާއި، އެ ސަރަޙައްދުން ދަތުރުކުރާ ހުރިހާ އުޅަނދުފަހަރަކަށް ޔަހޫދީ ޓޭންކުތަކުން ހަމަލަ ދެމުންދާ ކަމުގައި ރިޕޯޓުތައް ބުނެއެވެ.
އެ ސަރަޙައްދަށް ޔަހޫދީ ޓޭންކުތަކުން ޖަމާވުމުގެ ކުރިން ޔަހޫދީ އަސްކަރީ މަތިންދާބޯޓުތަކުން ވަނީ އެ ސަރަޙައްދަށް ވަރުގަދަ ހަމަލަތަކެއް ދީފައެވެ. އެ ސަރަޙައްދުން ދަތުރު ކުރި ޢާންމުންގެ އުޅަނދުފަހަރަށް ޔަހޫދީ ފައުޖުގެ ޓޭންކުތަކުން ހަމަލަދީފައިވާ މަންޒަރު ފެނުނު ކަމުގައި، އެ ސަރަޙައްދުގައި ހަރަކާތްތެރިވާ ނޫސްވެރިން ރިޕޯޓު ކުރެއެވެ.
ޣައްޒާގެ ސަރުކާރުގެ އިސް އޮފިޝަލެއް ކަމުގައިވާ ސަލާމާ މަޢުރޫފް ވިދާޅުވީ ޔަހޫދީ އަސްކަރިއްޔާގެ ޓޭންކުތަކުން ޣައްޒާ ސިޓީއަށް ވަންނަން މަސައްކަތް ކުރި ނަމަވެސް، އެ ކަން ކާމިޔާބުވެފައި ނުވާ ކަމުގައެވެ. އަދި، އެ ސަރަޙައްދުން ދަތުރު ކުރަމުން ދިޔަ އާންމުންގެ ދެ އުޅަނދަކަށް ޔަހޫދީ ފައުޖުން ހަމަލަދީފައިވާ ކަމަށާއި، ޙަމާސްގެ މުޖާހިދުން ޔަހޫދީންގެ ފައުޖުތައް ފަހަތަށް ޖައްސާފައިވާ ކަމުގައި އޭނާ ވިދާޅުވިއެވެ.
އެމެރިކާގެ އެހީތެރިކަމާ އެކު ޔަހޫދީ ފައުޖުތަކުން އަދިވެސް ދަނީ މެދުކެނޑުމެއް ނެތި ޣައްޒާގެ މުސްލިމުން ދިރިއުޅޭ ގެދޮރަށް ބޮން އަޅަމުންނެވެ. ފާއިތުވި 24 ގަޑިއިރުގެ ތެރޭގައި ޣައްޒާއަށް 600 އަށްވުރެ ގިނަ ބޮން އަޅާފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. މި ހަމަލަތައް އަމާޒު ކުރަމުން ދަނީ ޢާންމުންގެ ގެދޮރާއި، ހޮސްޕިޓަލްތަކާއި، ޞިއްޙީ މަރުކަޒުތަކާއި، ސްކޫލްތަކާއި އެމްބިޔުލާންސްތަކަށެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.