އިންޑިއާގެ ވެރިރަށް ނިއު ދިއްލީއަށް ކުރިމަތިވެފައިވާ ވައި ތަޣައްޔަރުވުމުގެ މައްސަލައަށް ހައްލެއް ހޯދުމަށް އިންޑިއާގެ ސަރުކާރުވެސް ނުކުޅެދިއްޖެއެވެ.
ނިއު ދިއްލީގެ ވައި ތަޣައްޔަރުވެފައިވާ މިންވަރު މިއަހަރު ރިކޯޑް ކުރެވިފައިވާ އެންމެ މައްޗަށް ގޮސްފައިވާއިރު، ސިއްޙަތަށް ގެއްލުންވާ މިންވަރަށް ވައި ތަޣައްޔަރުވެފައިވާކަމަށް އިންޑިއާގެ މޫސުމާބެހޭ އިދާރާއިން ބުނެއެވެ.
ނިއުދިއްލީ އަކީ ދުނިޔޭގެ އެންމެ ވައި ތަޣައްޔަރުވެފައިވާ ސިޓީއެވެ. ނަތީޖާއެއްގެ ގޮތުން އެވްރެޖްކޮށް މީހަކު ދުނިޔޭގައި ހޭދަކުރާ އުމުރުން 10 އަހަރު ދަށްވެފައިވާކަމަށް ޔުނިވާސިޓީ އޮފް ޝިކާގޯގެ އެނަރޖީ ޕޮލިސީ އިންސްޓިޓިއުޓުން ވަނީ ބުނެފައެވެ. އަދި 2013ވަނަ އަހަރުން ފެށިގެން ދުނިޔެ ތަޣައްޔަރުވުން އިތުރުވުމުގެ 59 އިންސައްތަ ހިއްސާކުރަނީ އިންޑިއާއިން ކަމަށްވެސް އެ ޔުނިވާސިޓިން ބުނެއެވެ.
ދިއްލީ ސަރުކާރުން ވަނީ ވައި ތަޣައްޔަރުވުން ކޮންޓްރޯލްކުރުމަށް އެންޓި ޑަސްޓް ކެމްޕޭނެއް ފަށާ، ކޮންސްޓްރަކްޝަން މަސައްކަތްތަކަށް ޚާއްސަ ފިޔަވަޅުތަކެއް އެކުލަވާލާ، ވައި ސާފުކުރުމަށް މެޝިންތައް ބޭނުންކޮށްގެން ތަފާތު ގިނަ މަސައްކަތްތަކެއް ކޮށްފައެވެ.
ނިއު ދިއްލީގެ އެއަރ ކޮލިޓީ އިންޑެކްސް ނުވަތަ ވައިގެ ކޮލިޓީ ހުރީ 346 ގައެވެ. މިއީ ވަރަށް ގޯސް ޙާލަތެއް ކަމަށް މިނިސްޓްރީ އޮފް އަރތް ސައިންސްގެ ސިސްޓަމުން ދައްކައެވެ. ވައިގެ ކޮލިޓީ ބަލެމުގައި ގެންގުޅޭ މިންގަނޑަކީ 500 ކަމަށް ވާއިރު، 60 އިން މަތީގެ ކޮންމެ އަދަދަކީ ސިއްޙަތަށް ގެއްލުން ލިބޭނެ ޙާލަތެއްކަމަށް އެ މިނިސްޓްރީން ހާމަކުރެއެވެ. އެހެންނަމަވެސް، 20 މިލިއަން މީހުން ދިރިއުޅޭ ދިއްލީގައި ރައްކާތެރިކަމުގެ ގޮތުން މާސްކް އަޅަނީ މަދު ބަޔެކެވެ.
އިންޑިއާގެ އެހެން ސިޓީތަކަށް ވުރެ ގިނައިން ވެރިރަށް ދިއްލީގައި 10 މިލިއަނަށް ވުރެ ގިނަ އުޅަނދު ދުއްވާކަމަށް ރިކޯޑް ކުރެވިފައިވެއެވެ.