ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ހަމަމަގުން ނެއްޓި، ކަސިޔާރުވެގެން ދިޔައީ އޭނާގެ އެކްސްކޯ ރަނގަޅަށް މަސައްކަތް ނުކުރުމުން ކަމަށް "ސޭވް އެފްއޭއެމް" ހަރަކާތުން ބުނެފިއެވެ.
ޓީވީއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ސޭވް އެފްއޭއެމުގެ ފަރާތުން ވާހަކަދައްކަމުން ތަޖުރިބާކާރު ނޫސްވެރިޔާ އަބްދުﷲ އަޒްމީން ބުނީ ސީދާ އެފްއޭއެމާ ގުޅުންހުރި ގިނަ ކަންކަމުގެ މައްސަލައަކީ ބައްސާމް ނޫން ކަމަށެވެ. އެގޮތުން ރައީސްކަމުގެ ފުރަތަމަ ދައުރުގައި ބައްސާމް ފެނިގެން ދިޔައީ ވަރަށް ރަނގަޅަށް ކަމަށާއި، ދެވަނަ ދައުރުގެ ދެވަނަ އަހަރާ ހަމައަށް އެފްއޭއެމުގެ ކަންކަން ރަނގަޅަށް މެނޭޖުކުރަމުން ދިޔަ ކަމަށެވެ. އެގޮތުން އެފްއޭއެމަށް ލިބެމުންދިޔަ ފައިސާ ރަނގަޅު ގޮތުގައި، އެފްއޭއެމުގެ ކަންކަމަށް ބޭނުންކޮށް، ކުލަބަތަކަށްވެސް އޭގެއިން މަންފާކުރި ކަމަށްވެސް ބުންޏެވެ.
"ސޭވް އެފްއޭމް" ގެ ސްޓިރިއަން ކޮމިޓީގެ މެންބަރުކަންވެސް ކުރައްވަމުން އަންނަ އަޒްމީން ބުނީ މިދިޔަ ހައެއްކަ އަހަރުގެ ތެރޭގައި ފުރަތަމަ ޑިވިޝަނުގެ ކުލަބަތަކަށް 30 މިލިޔަނަށްވުރެ ގިނަ ރުފިޔާ ލިބުނު ކަމަށާއި، އެކަމަކު ކުލަބުތަކުން އެ ފައިސާއިން ކުރިކަމެއް ފެންނަން ނެތް ކަމަށެވެ. ހަމަ އެހެންމެ ފުޓްބޯޅަ ލީގު އަހަރުގެ މެދުތެރޭގައި ފެށުމަށް ހަ މަސް ވަންދެން ފުޓްބޯޅަ ނުކުޅެ ދިޔަ ކަމަށާއި، މި އުނދަގޫތަކާއެކުވެސް ކުލަބުތަކުން އަމިއްލަ ފައިމައްޗަށް ތެދުވާން ފުރުސަތު ދިން ކަމަށެވެ. އެހެންކަމުން މިއީ މިހާރު އުފެދިއްގެން އުޅޭ މައްސަލަތަކުގެ އަސްލު ކަމަށާއި، އެފްއޭއެމުގެ ރައީސްގެ ހައިސަޔަތުން މިކަމުގެ ޒިންމާ ބައްސާމް ނަގަންޖެހޭނެ ކަމަށްވެސް ވަނީ ބުނެފައެވެ.
"އެހެންނަމަވެސް އަޅުގަނޑުގެ ނަޒަރުގައި އެފްއޭއެމުގެ ރައީސްގެ މަޤާމުގައި ހުންނަ މީހާ މަގުން ކަސިޔާރުވެގެންދާނީ އޭނާގެ އެކްސްކޯގެ މެންބަރުން ކަންކަން ނުބަލާ ފަރުވާ ކުޑަކުރުމުން.އަބްދުﷲ އަޒްމީން
އަޒްމީން ވަނީ އެފްއޭއެމުގެ އިންތިޚާބީ އެކްސްކޯ އަކީ ގަވާއިދުން ބައްދަލުވެ މަޝްވާރާކުރެވޭ ބައެއް ނޫން ކަމަށް ތުހުމަތުކޮށްފައެވެ. އޭގެތެރެއިން ބައެއް މެންބަރުން ގަވާއިދުން ބައްދަލުވުންތަކުގައި ބައިވެރިނުވާކަން އަޒްމީން ފާހަގަކުރިއެވެ. އެކަމުގެ ސަބަބުން މުޅިތަން ބޮސުންލައިގެން ގޮސްފައިވާ ކަމަށްވެސް އަަޒްމީން ވަނީ ބުނެފައެވެ.
އަޒްމީން ބުނީ ރާއްޖެގެ ފުޓްބޯޅަ އަލުން ނަގައި ކޮޅަށް ޖެހޭނީ ކުލަބުތަކުގެ މަސައްކަތުން ކަމަށާއި، އެ މަސައްކަތުގައި ސަރުކާރުންވެސް ރަނގަޅު ނިޔަތުގައި އެހީތެރިވާން ޖެހޭ ކަމަށެވެ.
އެފްއޭއެމުގެ ހިންގުން ބޮއްސުންލާފައިވާ ދަނޑިވަޅެއްގައި، އެ އިދާރާއާ ގުޅުންހުރި ކްރޮޕްޝަނާއި ޚިޔާނާތާ ގުޅުންހުރި ޖިނާޢީ ތަޙުޤީޤެއް ފުލުހުންގެ އިދާރާއިން ވަނީ ފަށާފައެވެ. އެއާއެކު އެއިދާރާއިން ރާވާ ހިންގާ މުބާރާތްތައްވެސް ވަނީ ހުއްޓުމަކަށް އައިސްފައެވެ.