ޣައްޒާގައި ހާލުގައި ޖެހިފައިވާ އެތަކެއް މިލިޔަން މުސްލިމުންނަށް އިންސާނީ އެހީތެރިކަން ފޯރުކޮށްދޭން ޒަޔަނިސްޓު އިސްރާޢީލުން ހުރަސް އަޅަމުންދާ މައްސަލައަކީ ބައިނަލްއަޤުވާމީ ޖިނާޢީ ކޯޓު ކަމުގައިވާ އިންޓަރނޭޝަނަލް ކްރިމިނަލް ކޯޓް (އައި.ސީ.ސީ)ގެ އިޙްތިޞާޞްގެ ދަށުން އެ ކޯޓަށް ބެލޭނެ މައްސަލައެއް ކަމުގައި އެ ކޯޓުގެ ޕްރޮސިކިޔުޓަރެއް ކަމުގައިވާ ކަރީމް ޚާން ވިދާޅުވެއްޖެއެވެ. ޚާން ވިދާޅުވީ، ޔަހޫދީން މިހާރު ހިންގަމުންދާ ގަތުލުއާންމަކީ 'ރޯމް ސްޓޭޓިޔުޓް'ގެ ދަށުން އައި.ސީ.ސީއަށް ބެލޭނެ މައްސަލައެއް ކަމަށް ގަބޫލު ކުރައްވާ ކަމުގައެވެ.
ޣައްޒާގެ ކުށެއް ނެތް މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު 8,005 އަށް އަރާފައިވާއިރު، އޭގެ ތެރޭގައި 3,300 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. 2,000 އަށްވުރެ ގިނަ އަންހެނުން ހިމެނެއެވެ. އަދި، 460 އަށްވުރެ ގިނަ އުމުރުން ދުވަސްވީ މީހުން ހިމެނެއެވެ. ޢައްޒާގައި ޒަޚަމު ކޮށްލާފައިވާ މީހުންގެ ޢަދަދު 20,200 އަރާއިރު އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި 1,400 އަށްވުރެ ގިނަ އަންހެނުން ހިމެނެއެވެ. ޣައްޒާގެ މުސްލިމުން ދިރިއުޅޭ ގެދޮރުގެ 45 އިންސައްތަ މިހާރު ވަނީ ސުންނާފަތި ކޮށްލާފައެވެ.
މި ގަތުލުއާންމާ ގުޅޭ ގޮތުން ވާހަކަފުޅު ދައްކަވަމުން އައި.ސީ.ސީގެ ޕްރޮސިކިޔުޓަރ ޚާން ވިދާޅުވީ ޣައްޒާގައި ހާލުގައި ޖެހިފައިވާ އެތަކެއް މިލިޔަން ޢާންމު ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ހުރަސް އެޅުމަކީ ބައިނަލްއަޤުވާމީ ޤާނޫނުތަކުގެ ދަށުން ޔަހޫދީންނަށް ކުރެވޭނެ ކަމެއް ނޫން ކަމުގައެވެ. އަދި، ޒަޔަނިސްޓު އިސްރާޢީލުން މިހާރު ކުރަމުން އެ ދަނީ ހަނގުރާމައިގެ ކުށެއް ކަމުގައެވެ. އަދި، ޣައްޒާއަށް ކާބޯތަކެއްޗާއި ފެނާއި ބޭސް އެތެރެކުރަން ހުއްދަ ދޭން އޭނާ ވަނީ ގޮވައިލައްވާފައެވެ. ނަމަވެސް، ފާހަގަ ކޮށްލަން ޖެހޭ ކަމަކީ، މުސްލިމުންނާ ދެކޮޅަށް ހަނގުރާމައިގެ ކުށްތަކާއި ޖަރީމާތައް ހިންގުމަކީ ޒަޔަނިސްޓު އިސްރާޢީލުން އެއްވެސް އިރަކު ފަސްޖެހިފައިވާ ކަމެއް ނޫން ކަމެވެ.
"ކުޑަކުދިންނާއި އަންހެނުންނަށް ކާބޯތަކެތި ފޯރުކޮށްދޭން ހުރަސް އަޅައިގެން ނުވާނެ. އެއީ ކުށެއްނެތް ބަޔެއް. ބައިނަލްއަޤުވާމީ ޤާނޫނުތަކުގެ ދަށުން އެ މީހުންނަށް ހައްޤުތަކެއް ލިބިދީފައިވޭ. ޖެނީވާ ކޮންވެންޝަންގެ ދަށުން ލިބިދީފައިވާ ހައްޤުތަކަށް އަރައިގަތުމީ ހަނގުރާމައިގެ ކުށެއް. މި ކަންކަން 'ރޯމް ސްޓޭޓިޔުޓް'ގެ ދަށުން ބަލަން ޖެހޭ،" ޚާން ވިދާޅުވިއެވެ.
ނަމަވެސް، މި ފަދަ ގޮވައިލުންތަކަށް ޒަޔަނިސްޓު އިސްރާޢީލުން ދެމުން ގޮސްފައި ވަނީ ބީރު ކަންފަތެކެވެ. ޣައްޒާއަށް ކާބޯތަކެއްޗާއި ފެނުގެ އިތުރުން ބޭސްފަރުވާއަށް ބޭނުންވާ ސާމާނާއި ތެޔޮ އެތެރެ ކުރަން ޔަހޫދީން މިހާރު ވެސް ދަނީ ހުރަސް އަޅަމުންނެވެ. ޣައްޒާއަށް ބޭނުންވާ އެހީގެ ސާމާނު ބަރު ކޮށްފައިވާ 200 އެއްހާ ލޮރީ ރަފަޙް ހުރަސް ކައިރީގައި ތާށިވެފައި އޮތް އިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް އެތެރެ ކުރުމުގެ ހުއްދަ ދީފައި ވަނީ އެންމެ 84 ލޮރީއަށެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.