15 ވަނަ ވޯލްޑް ބޮޑީބީލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް އަންނަ އަހަރު ރާއްޖޭގައި ބާއްވަން ނިންމާފައިވާކަން ހާމަކޮށްފިއެވެ.
އަންނަ އަހަރު މި މުބާރާތް ރާއްޖޭގައި ބާއްވާނެކަން ވޯލްޑް ބޮޑީބިލްޑިން ފެޑެރޭޝަންގެ ރައީސް ދާތުކް ޕޯލް ޗުއާ ވަނީ ހާމަކޮށްފައެވެ. މިކަން ރަސްމީކޮށް ހާމަކޮށްފައިވަނީ ދުނިޔޭގެ ބޮޑީބިލްޑިން ފެޑެރޭޝަނުންނެވެ.
މި މުބާރާތާއި ގުޅޭގޮތުން ރާއްޖޭގެ ބޮޑީބިލްޑިން އެސޯސިއޭޝަންގެ އެކްސްކޯގެ ބޭފުޅުން ވަނީ އިންތިހާބީ ޑރ. މުހައްމަދު މުއިއްޒާ ބައްދަލު ކުރައްވައިފައެވެ. މި ބައްދަލުކުރެއްވުމުގައި އަންނަ އަހަރު ބާއްވަން ނިންމާފައިވާ މުބާރާތަށް ސަރުކާރުގެ އެއްބާރުލުން ލިބޭނެކަން ވަނީ ހާމަކޮށްފައެވެ.
މީގެކުރިން ބޮޑީބިލްޑިންގެ ބޮޑު ދެ މުބާރާތެއް ރާއްޖޭގައި ވަނީ ބާއްވާފައެވެ. އެއީ އޭޝިއަން ބޮޑީބިލްޑިން ޗެމްޕިއަންޝިޕާއި ސައުތު އޭޝިއަން ބޮޑީބިލްޑިން ޗެމްޕިއަންޝިޕެވެ. މި ދެ މުބާރާތުގައި ވެސް ރާއްޖެއިން ވަނީ ބޮޑެތި ކާމިޔާބީތަކެއް ހޯދާފައެވެ.
މިއަހަރުގެ ދުނިޔޭގެ ބޮޑީބިލްޑިން މުބާރާތް ބޭއްވުމަށް ތާވަލުކޮށްފައިވަނީ އަންނަ މަހު ދެކުނު ކޮރެއާގައެވެ. އެންމެ ފަހުން މިދިޔަ އަހަރު ބޭއްވި މުބާރާތުގައި ރާއްޖޭގެ އަޒުނީން ރަޝާދު ވަނީ އޭނާ ވާދަކުރި އިވެންޓުން ރަން މެޑަލް ހޯދައިފައެވެ. މިއީ ރާއްޖޭގެ ތާރީހުގައި ދުނިޔޭގެ ބޮޑު މުބާރާތަކުން ހޯދި ފުރަތަމަ ރަން މެޑަލްއެވެ.