ގަޑިއެއްގެ އެލާމްގެ އަޑަށް އެތައް ބަޔެއް އާދައިގެ ދުވަހެއް ފަށައެވެ. އެއީ ސްކޫލަށް ތައްޔާރުވާން ވިޔަސް، މަސައްކަތަށް ތައްޔާރުވުން ކަމުގައި ވިޔަސް، އާއިލީ ޒިންމާތައް އަދާކުރުމަށް ވިޔަސް، ނުވަތަ އަމިއްލަ އުއްމީދުތައް ހާސިލްކުރުމުގެ އުއްމީދުގައި ކަމުގައިވީ ނަމަވެސް އެވެ.
ގިނަ މީހުން އާދައިގެ ދުވަހެއްގައި މަސްއޫލުވެ އުޅޭ ކަންކަމުގެ ތެރޭގައި، ކެއިން، ބުއިން، ސްކޫލަށް ދިޔުން، ވަޒީފާއަށް ދިޔުން، ކަސްރަތުކުރުމާއި ރައްޓެހިންނާ ދިމާވުން ފަދަ ކަންކަން ހިމެނެއެވެ. މިއީ ގިނަ މީހުންގެ އާއްމު ރޫޓިންގައި ހިމެނޭ ކަންކަމެވެ. އަހަރެމެން ދުވަސް ނިންމާލަނީ ހިތްހަމަ ޖެހިގެން އަނެއް ދުވަހަށް ގިނަ އުއްމީދުތަކެއް ފުރިހަމަ ކުރުމުގެ މަޤްސަދުގައެވެ.
އެހެންނަމަވެސް، މެޑިޓެރޭނިއަން ކަނޑުގެ އައްސޭރީގައި އޮންނަ ކުޑަ ރަށެއް ކަމަށްވާ ޣައްޒާގައި ދިރިއުޅޭ ގާތްގަނޑަކަށް 2.3 މިލިއަން މީހުންނަށް އެމީހުންގެ އާއްމު ދިރިއުޅުމުގެ ރޫޓިން އަކީ ކޮބައިކަމެއް ނޭނގެއެވެ. އެތަނުގެ ރައްޔިތުންގެ ދިރިއުޅުން ބައްޓަން ކުރަން ޖެހެނީ މުސީބާތުގެ މެދުގައެވެ. ދިރިއުޅުން ކުރިޔަށް ގެންދެވޭނެ ކަމުގެ އުއްމީދެއް ނުކުރެވެއެވެ. ހަމަ ހިމޭން ކަމާއެކީ ނިދާލެވޭނެ ކަމުގެ އުއްމީދެއް ނެތެވެ. ނިދައިފިނަމަ އަނެއް ދުވަސް ފެންނާނެކަމުގެ އުއްމީދެއް ނެތެވެ. ކޮންމެ ދުވަހަކު ކަރަންޓް ކެނޑުމާއި، ސާފު ފެން ނުލިބުމާ، ކާބޯތަކެތީގެ ދަތިކަމާއި، ބޯޑަރު ބަންދުކުރުމުގެ ސަބަބުން ދަތުރުފަތުރުކުރުމުގައި ދިމާވާ އުނދަގޫތަކަކީ ޣައްޒާގެ ރައްޔިތުންނަށް އާއްމުކޮށް ކުރިމަތިވާ ކަންކަމެވެ. މިހާރު ބޮން އެޅުމެވެ. އެތައް ބަޔަކު ޝަހީދުވެ، އާއިލާގެ އެއްވެސް މެމްބަރެއް ނެތި ކުޑަ ކުޑަ މައުސޫމު ކުދިން ބިރުން ހަދާނެ ގޮތް ހުސްވެފައެވެ.
ހޭލެވެނީ އެލާމަކަށް ނޫނެވެ. ހޭލެވެނީ ބޮމުގެ އަޑަށެވެ. ޣައްޒާގެ ރައްޔިތުންނަށް އާދައިގެ ދުވަހަކީ ހާސްކަމުން ފުރިފައިވާ، ޔަޤީންކަމެއް ނެތް، ރައްކާތެރިކަމެއް ނެތް އަދި އަސާސީ ބޭނުންތަކުން މަޙުރޫމްވެފައިވާ ދުވަހެކެވެ.
"އަހަރެމެންނަށް ބާއްޖަވެރި ރޭގަނޑަކަށް އެދޭނެކަމެއް ނެތެވެ. ހެނދުނާ ހަމައަށް އަހަރެމެން ދިރިތިބުމަށް އެދޭށެވެ." މިއީ ފޯނާ އިންޓަނެޓްގެ ޚިދުމަތް ލިބުމާއެކު ޣައްޒާގެ ފޮޓޯ ޖަރނަލިސްޓަކު ވީޑިއޯ އެއްގައި ލިޔެފައިވާ މެސެޖެކެވެ. މިއީ ޣައްޒާގެ މުޅި އާބާދީ ހިތާ ހިތުން ކޮންމެ ސިކުންތަކުވެސް ވިސްނަމުންދަ ކަންކަމެވެ.
ޣައްޒާގެ ރައްޔިތުން ތަޙައްމަލުކުރަމުންދާ އިމްތިޙާނުތަކުން އަހަރުމެންނަށް ހަނދާންކޮށްދެނީ، އަހަރެމެންނަކީ މީހުންނާ ދޭތެރޭ ކިތަންމެ ވިސްނާ، މީހުންގެ އިޙްސާސްތައް ދަންނަ ބަޔަކަށް ވީނަމަވެސް، އަހަރުމެންނަށް އެ ތަހައްމަލުކުރާ ހިތްދަތިކަން އިޙްސާސްވެސް ކޮށްނުލެވޭނެ ކަމެވެ. އެހާލުގައި އަހަރެމެންނަށް އެންމެ ސިކުންތެއްވެސް ކެތްކުރަން ދަތިވާނެކަމެވެ. އަހަރުމެން އާދައިގެ ދިރިއުޅުމުގައި ދަތުރުކުރާއިރު، ހަނދާންކުރަން ޖެހޭ ކަމަކީ ދެމެހެއްޓެނިވި ސުލްޙައާއި އިންސާނީ ކަރާމާތަށް މަސައްކަތް ކުރުމުގެ ޒިންމާއަކީ އެންމެންގެވެސް ޒިންމާއެއް ކަމެވެ.
ޣައްޒާ ރައްޔިތުން ތަހައްމަލުކުރާ ތަކުލީފުތައް އޭގެ އެންމެ ފުންމިނުން ދުވަހަކުވެސް އަހަރުމެންނަށް ނުވިސްނިދާނެއެވެ. ނަމަވެސް، ޣައްޒާގެ ރައްޔިތުންނަށްޓަކާ ކުރެވެން އޮތް ކަމަކީ އެހީ ފޯރުކޮށްދިނުމަށް މަސައްކަތްކުރުމުގައި ދެމިތިބުމާ އެކަމާ ދެކޮޅަށް އަޑުއުފުލުމެވެ. އަހަރުމެންގެ އުއްމީދަކީ ކޮންމެވެސް ދުވަހަކުން އެ ތަކްލީފުތަކަށް ނިމުމެއް އައިސް އާދައިގެ ދިރިއުޅުމެއް ޣައްޒާގެ ރައްޔިތުންނަށްވެސް ލިބިގެންދިޔުމެވެ.