ފަލަސްޠީނުގެ ކުށެއް ނެތް މުސްލިމުން ޝަހީދުކޮށް، އަންހެނުންނާއި ކުޑަކުދިން ގަތުލުކޮށް، ޒުވާނުންގެ ލޭއޮހޮރުވައިލުމަށް ޔަހޫދީ ފައުޖުތަކުން ހިންގަމުންދާ ލާއިންސާނީ ޖަރީމާތަކަކީ ޔަހޫދީންނަށް މިނިވަން ކަން ހޯދައިދޭން ހިންގަމުންދާ ޖަރީމާތަކެއް ކަމުގައި ޒަޔަނިސްޓު އިސްރާޢީލުގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ. ތެލް އަވީވުގައި ނޫސްވެރިންނަށް މަޢުލޫމާތު ދެމުން ނަތަންޔާހޫ ބުނީ ޙަމާސް ޖަމާޢަތުގެ މުޖާހިދުންނާ ދެކޮޅަށް ޔަހޫދީ ފައުޖުތަކުން ފަށާފައިވާ ހަނގުރާމައިގެ ދެވަނަ ފިޔަވަހި ފަށާފައިވާ ކަމަށާއި، އެއްގަމު މަގުން ޣައްޒާއަށް އަރާފައިވާ ކަމުގައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ ފަލަސްޠީނުގެ މުސްލިމުންގެ ޢަދަދު ވަނީ 7,703 އަށް އަރާފައެވެ. އޭގެ ތެރޭގައި 3,000 ކުޑަކުދިން ހިމެނެއެވެ. އަދި، 19,700 އަށްވުރެ ގިނަ މީހުން ޒަޚަމު ކޮށްލާފައިވާއިރު، އޭގެ ތެރޭގައި 2,000 ކުޑަކުދިންނާއި 1,400 އަންހެނުން ހިމެނެއެވެ. އަދި، ޣައްޒާގެ މުސްލިމުން ދިރިއުޅޭ ޢިމާރާތްތަކުގެ 45 އިންސައްތަ ވަނީ ސުންނާފަތި ކޮށްލާފައެވެ.
ނަތަންޔާހޫ ބުނީ ކުރިއަށް އޮތީ އުނދަގޫ އަދި ދިގު ހަނގުރާމައެއް ކަމަށާއި، މިއީ 1948 ވަނަ އަހަރަށް ފަހު ޔަހޫދީންގެ މިނިވަން ކަމުގެ ދިފާޢުގައި ޒަޔަނިސްޓު އިސްރާޢީލުން ކުރަމުންދާ ދެވަނަ ހަނގުރާމަ ކަމުގައެވެ. ނަމަވެސް، ފާހަގަ ކޮށްލަން ޖެހޭ ކަމަކީ، ޔަހޫދީންނަކީ މުސްލިމުންގެ ބިންތަކަށް ވެރިވެގަނެފައިވާ ބަޔެއް ކަމެވެ. ޔަހޫދީން ފަލަސްޠީނުގެ މުސްލިމުންގެ މައްޗަށް ބާރު ހިންގަމުންދާ ކަމެވެ. މުސްލިމުން އަޅުވެތި ކޮށްފައިވާ ކަމެވެ.
ފަލަސްޠީނުގެ އަޅުވެތި ކަމުން މިންޖުވާން ޖިހާދު ކުރަމުންދާ ޙަމާސް ޖަމާޢަތް ނައްތައިލާނެ ކަމުގައި ވެސް ނަތަންޔާހޫ ބުންޏެވެ. އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުތަކުން ފެށި އުދުވާންތައް މިހާރު ވަނީ އެތަކެއް ގުނައަށް ވަރުގަދަ ކޮށްފައެވެ. ބޮން އެޅުން ވަނީ އިތުރު ކޮށްފައެވެ. ހަމަލަތައް އަމާޒު ކުރަމުން ދަނީ ފަލަސްޠީނުގެ މުސްލިމުންގެ ގެދޮރަށެވެ. ހޮސްޕިޓަލްތަކާއި ޞިއްޙީ މަރުކަޒުތަކަށެވެ. އެމްބިޔުލާންސްތަކަށެވެ. މުވާސަލާތީ ޚިދުމަތް ދިނުމަށް ބޭނުން ކުރާ ވަސީލަތްތަކަށެވެ. ޣައްޒާގެ އިރުމައްޗާއި އުތުރުގައިވާ ސަރަޙައްދުތަކަށް ވަރުގަދަ ހަމަލަތަކެއް ދެމުންދާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
ބަރުހަތިޔާރާއި އަސްކަރީ ޓޭންކުފަހަރާ އެކު ޔަހޫދީ ފައުޖުތަކުން އޮކްޓޫބަރު 27 ވަނަ ދުވަހު ވަނީ ޣައްޒާއަށް ވަދެފައެވެ. ޔަހޫދީ ސިފައިންގެ ބައެއް ފައުޖުތަކުން ޣައްޒާގެ އުތުރަށް ވަދެފައިވީ ނަމަވެސް، އެއީ ވަރަށް މަދު ޢަދަދެއްގެ ސިފައިން ކަމުގައި ރިޕޯޓުތައް ބުނެއެވެ. ޣައްޒާއަށް އެއްގަމު މަގުން އެރުމަށް ތައްޔާރުވެ، ޒަޔަނިސްޓު އަސްކަރިއްޔާގެ 300,000 އަށްވުރެ ގިނަ ސިފައިން ޣައްޒާގެ ރަށްބޭރުގައި ތިބި ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ލާއިންސާނީ ގަތުލުއާންމެއް ހިންގަމުން މި ދަނީ އެމެރިކާގެ އެހީތެރިކަމާއި އެއްބާރުލުމާ އެކުގައި ކަން ވެސް ފާހަގަ ކޮށްލަން ޖެހެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.