ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާންތަކާ ގުޅިގެން އެ ސަހަރުގައި ވެރިކަން ކުރާ ޙަމާސް ޖަމާޢަތުން ޔަހޫދީ ފައުޖުތަކުގެ އަމާޒުތަކަށް ވަރުގަދަ ހަމަލަތަކެއް ދޭން ފަށައިފިއެވެ. ޔަހޫދީންގެ ވެރިރަށްކަމަށް ބަލަައި ޔާފާގެ އިތުރުން ޙަމާސްގެ މުޖާހިދުން ދަނީ ފަލަސްޠީނުގެ ބިންތަކަށް ވެރިވެގަނެ، އެ ތަންތަނުގައި ވަޒަންވެރި ކޮށްފައިވާ ޔަހޫދީން ދިރިއުޅޭ ސަރަޙައްދުތަކުގައި ހަރަކާތްތެރިވާ ޔަހޫދީ ފައުޖުތަކަށް ވެސް ހަމަލަތައް އަމާޒު ކުރަމުންނެވެ.
ޙަމާސް ޖަމާޢަތުގެ ހަތިޔާރު އެޅި ގޮފި – އަލް-ޤައްސާމް ބްރިގޭޑްސްއިން ބުނީ ޔާފާގެ އިތުރުން ޒިކިމް އަޝްކެލޯން މިވްތަޚިމް އަދި އެރެޒްގެ އިތުރުން ސޮޕާއާއި ބެއިތު ލާހިޔާގެ ހުޅަނގުއުތުރުން އޮންނަ އަލް-އަޠާޠިރާގައި އޮންނަ ޔަހޫދީ ފައުޖުތަކުގެ މަރުކަޒުތަކާއި އެ ސަރަޙައްދުތަކުގައި ހަރަކާތްތެރިވަމުންދާ ޔަހޫދީ ސިފައިންގެ އަމާޒުތަކަށް ހަމަލަތައް އަމާޒު ކުރަމުންދާ ކަމުގައެވެ. މިއީ، ޣައްޒާގައި ހިންގަމުންދާ ލާއިންސާނީ ޖަރީމާތަކުގެ ބަދަލު ހިފުމުގެ ގޮތުން ދެމުންދާ ހަމަލަތަކެއް ކަމުގައި ވެސް އަލް-ޤައްސާމް ބްރިގޭޑްސްއިން ބުނެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން، އެމެރިކާގެ އެހީތެރިކަމާ އެކު، ޢައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު 7,703 އަށް އަރާއިރު، އޭގެ ތެރޭގައި 3,000 ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 17,400 އަށް އަރާއިރު، އޭގެ ތެރޭގައި 2,000 އަށްވުރެ ގިނަ ކުޑަކުދިންނާއި، 1,400 އަށްވުރެ ގިނަ އަންހެނުން ހިމެނެއެވެ.
ޔަހޫދީ ފައުޖުތަކުން ބަރުހަތިޔާރާ އެކު ޣައްޒާގެ އުތުރުގެ ސަރަޙައްދުތަކަށް އެއްގަމު މަގުން އަރާފައިވާއިރު، އެ މީހުންނާ ކުރިމަތިލުމަށް ޕަލަސްޓީނިޔަން އިސްލާމިކް ޖިހާދް (ޕީ.އައި.ޖޭ)ން ވެސް ދަނީ ތައްޔާރު ވަމުންނެވެ. އެ ޖަމާޢަތުން ބުނީ، އެ ޖަމާޢަތުގެ ހަތިޔާރު އެޅި ގޮފި – އަލް-ޤުދުސް ބްރިގޭޑްސްގެ މުޖާހިދުން ޣައްޒާއަށް ދިޔުމަށް ތައްޔާރުވަމުންދާ ކަމުގައެވެ. އަދި، ޙަމާސްގެ މުޖާހިދުންނާ އެކު ޔަހޫދީ ފައުޖުތަކާ ހަނގުރާމަ ކުރަން ތައްޔާރަށް އޮތް ކަމުގައެވެ. އެއްގަމު މަގުން ޢައްޒާއަށް ވަން ޔަހޫދީ ފައުޖުތަކުގެ އޮޕަރޭޝަން ނާކާމިޔާބު ކޮށްލާފައިވާ ކަމުގައި ޙަމާސް ޖަމާޢަތުން ބުނެއެވެ.
ޔަހޫދީން ވަޒަންވެރި ކޮށްފައިވާ ކިސުފީމަށް ވެސް ޕީ.އައި.ޖޭގެ މުޖާހިދުން ވަނީ ހަމަލަދީފައެވެ. މި ހަމަލަތައް އަމާޒު ކޮށްފައި ވަނީ އެ ސަރަޙައްދުގައި ހަރަކާތްތެރިވަމުން ދިޔަ ޔަހޫދީ ފައުޖުގެ ސިފައިންނަށް ކަމުގައި ޕީ.އައި.ޖޭން ބުނެއެވެ. ފަލަސްޠީނުގެ ބިންތަކުގައި ހަރަކާތްތެރިވަމުންދާ ޔަހޫދީ ފައުޖުތަކާ ދެކޮޅަށް މުޖާހިދުންގެ ޖަމާޢަތްތަކުން ދެމުންދާ ހަމަލަތައް އިތުރުވެފައިވާ ކަން ފާހަގަކޮށް، ޒަޔަނިސްޓު އިސްރާޢީލުގެ އަސްކަރިއްޔާއިން ވަނީ ކަންބޮޑުވުން ފާޅު ކޮށްފައެވެ.
މީގެ އިތުރުން ލުބުނާނާއި އިސްރާޢީލް ގުޅޭ ސަރަޙައްދީ ރޮނގު ކައިރީގައި ހަރަކާތްތެރިވަމުންދާ ޔަހޫދީ ފައުޖުތަކަށް ޙިޒްބުالله ޖަމާޢަތުން ވެސް ވަނީ ހަމަލަތަކެއް ދީފައެވެ. ހިޒްބުاللهއަކީ ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެކެވެ. އެ ޖަމާޢަތުން ބުނީ، ލުބުނާނުގެ ސަރަޙައްދީ ރޮނގު ކައިރީގައި ގާއިމު ކޮށްފައިވާ ޔަހޫދީ ފައުޖުތަކުގެ އަސްކަރީ މަރުކަޒުތަކަށް ހަމަލަދީފައިވާނެ ކަމުގައެވެ.
ހިޒްބުاللهގެ ހަމަލަތައް އަމާޒު ކޮށްފައިވާ ސަރަޙައްދުތަކުގެ ތެރޭގައި ރީޝާ، އަލް-ޖުރުދާ، އަލް-ޢިބާދު އަދި އަލް-މަރަޖު ހިމެނެއެވެ. އެ ސަރަޙައްދުތަކުގައި ހަރަކާތްތެރިވާ ޔަހޫދީ ފައުޖުތަކަށް ހަމަލަދޭން ގައިޑެޑް މިސައިލާއި، އާޓިލަރީ ބަޑިއާއި އެހެނިހެން ހަތިޔާރު ބޭނުން ކޮށްފައިވާ ކަމުގައި ވެސް އެ ޖަމާޢަތުން ބުނެއެވެ. އަދި، ހަމަލަތަކުގައި ޔަހޫދީ ފައުޖުތަކުގެ އަސްކަރީ ޓޭންކުފަހަރު ހަލާކު ކޮށްލާފައިވާ ކަމަށާއި، ޔަހޫދީ ސިފައިންގެ ފުރާނައަށް ނުރައްކާވެފައިވާ ކަމުގައި ވެސް އެ ޖަމާޢަތުން ބުނެއެވެ.