ބ. އޭދަފުށީ ކައުންސިލުން އިންތިޒާމުކޮށްގެން އެ ރަށުގައި ބޭއްވި "ރެޑްވޭވް އޭދަފުށި ކަޕް 2023" ގެ ޗެމްޕިއަންކަން ހުސް ސޮނގުން ފުޓްބޯލް ޓީމުން ހޯދައިފިއެވެ.
މި މުބާރާތުގެ ޗެމްޕިއަންކަން ހުސް ސޮނގުން ޓީމުން ހޯދީ އޭދަފުށީ ޓާފް ފުޓްބޯޅަ ދަނޑުގައި އިއްޔެ ހަވީރު ކުޅުނު ފައިނަލް މެޗުގައި ވެލާ ސްޕޯޓްސް ކުލަބު އަތުން 2-0 ގެ ނަތީޖާއަކުން މޮޅުވެގެންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގައި ހުސް ސޮނގުން ޓީމުން ކާމިޔާބުކުރި ދެ ލަނޑުވެސް ފެނިގެންގޮސްފައިވަނީ މެޗުގެ ފުރަތަމަ ހާފުގައެވެ. އެގޮތުން މެޗުގެ ވަރަށް ކުރީކޮޅު ކައުންޓަރ އެޓޭކެއްގައި އުފެއްދި ހަމަލާއަކުން އިބްރާހީމް ވަހީދު ހަސަން (އިއްބެ) ވަނީ އެ ޓީމަށް ލީޑު ނަގައިދީފައެވެ. އަދި އޭގެ ފަހުން ކޯނަރެއްގައި ލިބުނު ބޯޅައަކުން އިއްބެ ވަނީ ހުސް ސޮނގުންގެ ދެވަނަ ލަނޑު ކާމިޔާބުކޮށްދީފައެވެ.
މި މެޗުން މޮޅުވެ ހުސް ސޮނގުން ޓީމުން ޗެމްޕިއަންކަން ހޯދިއިރު، އެ ޓީމުން މި ފަހަރުގެ މުބާރާތުގެ ތަށި އުފުލާލާފައިވަނީ ކުޅުނު ހުރިހާ މެޗަކުން މޮޅުވެގެންނެވެ. އެގޮތުން ހަތަރު ޓީމު ވާދަކުރި މި މުބާރާތުގެ ލީގު ބުރުގައިވެސް ހުސް ސޮނގުން ޓީމުން ވަނީ ވެލާ ސްޕޯޓްސް ބަލިކޮށްފައެވެ.
މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަޤާމު ހޯދީ ފައިނަލް މެޗުގެ މޮޅު ކުޅުންތެރިޔަކަށްވެސް ހޮވުނު އިއްބެއެވެ. އަދި މުބާރާތުގެ އެންމެ މޮޅު ގޯލްކީޕަރަކަށް ހުސް ސޮނގުންގެ ކީޕަރު މުޙައްމަދު ޝަފީއު (ޗެކް) ހޮވުނުއިރު، އެންމެ މޮޅު ކުޅުންތެރިޔާގެ މަޤާމު ހޯދީ ހުސް ސޮނގުންގެ ޑިފެންޑަރު ރައްޒާން ރަޝީދެވެ. އަދި އެންމެ އުއްމީދީ ކުޅުންތެރިއަކަށް ވެލާ ސްޕޯޓްސްގެ އަޙްމަދު ޖައުޝަން ހޮވުނުއިރު، އެންމެ މޮޅު ކޯޗުގެ މަޤާމު ހޯދީ ހުސް ސޮނގުން ޓީމުގެ ކޯޗު އަޙްމަދު ލަތީފް (ލައްޗޭ) އެވެ.
އޭދަފުށި ކައުންސިލާއި ކުލަބު އޭދަފުށި ގުޅިގެން ބޭއްވި މި މުބާރާތް އެންމެ ޚާއްސަވި އެއް ސަބަބަކީ އޭދަފުއްޓަށް އުފަން ވިޔަފާރިވެރިޔާ އަޙްމަދު ނަޒީރު ހަދިޔާކުރެއްވި ދަނޑުގައި ގޮނޑިބަރި އާއި ރޮސްޓްރަމް ތަރައްޤީކޮށް ނިންމާލުމަށްފަހު، ޓިކެޓް ވިއްކައިގެން މުބާރާތް ކުޅުމެވެ. މިއީ މިފަދަ ގޮތަކަށް ރާއްޖެތެރޭ ރަށެއްގައި ޓިކެޓް ވިއްކައިގެން ކުޅެވުނު ފުރަތަމަ ބޮޑު ފުޓްބޯޅަ މުބާރާތެވެ.