ރިޓްޒްކާލްޓަން ކައިރީގައި އޮތް ޔޮޓެއްގައި އަލިފާން ރޯވެ، ބޮޑެތި ގެއްލުންތަކެއް!

މާލެ އަތޮޅު ރިޓްޒްކާލްޓަން ފަރި އައިލެންޑް ރިސޯޓް ކައިިރީގައި އޮތް ޔޮޓެއްގައި އަލިފާނުގެ ހާދިސާއެއް، ޔޮޓަށް ބޮޑެތި ގެއްލުންތަކެއް ލިބިއްޖެއެވެ.

އެމްއެންޑީއެފްއިން ވިދާޅުވީ މި ހާދިސާގެ ރިޕޯޓް ލިބިފައިވަނީ މިއަދު ހެނދުނު 7:37 ހާއިރުކަމަށާއި ހާދިސާގައި އެއްވެސް މީހަކަށް އަނިޔާއެއް ލިބުނުކަމުގެ ރިޕޯޓް ނުލިބޭކަމަށެވެ.

އަލިފާނުގެ ހާދިސާ ހިނގި މެޖެސްޓީ 62 ނަމަކަށް ކިޔާ ޔޮޓެއްގައިކަމަށާއި، އެ ޔޮޓްގައި ތިބި ޓޫރިސްޓުންނާއި ފަޅުވެރިން ރިޓްޒްކާލްޓަންގެ ލޯންޗަކަށް ނަގާފައިވާ ކަމަށެވެ. އަދި ޔޮޓްގައި 4 ފަޅުވެރިން ތިބިކަމަށް އެމްއެންޑީއެފްއިން މައުލޫމާތުދެއްވައެވެ. ނަމަވެސް ޔޮޓްގައި ތިބި ޓޫރިސްޓުންގެ އަދަދެއްގެ ނޭނގެއެވެ.

އެމްއެންޑީއެފްއިން ވިދާޅުވީ މި އަލިފާންގަނޑު ހެނދުނު 10:14 ހާއިރު ނިއްވާލާފައިވާކަމަށެވެ.

އަލިފާނުގެ ހާދިސާއާ ގުޅިގެން ޔޮޓަށް ބޮޑެތި ގެއްލުންތަކެއް ވަނީ ލިބިފައެވެ. ނަމަވެސް މި ހާދިސާ ހިނގަން މެދުވެރިވި ސަބަބެއް މިހާތަނަށް ހާމަކޮށްފައެއް ނުވެއެވެ.