ހައިހޫނު ކަމަކީ ޢައްޒާގެ މުސްލިމުންނާ ދެކޮޅަށް ޔަހޫދީން ބޭނުންކުރާ ހަނގުރާމައިގެ ހަތިޔާރެއް: އޮކްސްފޭމް

ޣައްޒާގެ މުސްލިމުން ކާބޯތަކެތިން މަޙްރޫމުކޮށް، ހައިހޫނު ކަމަކީ ހަނގުރާމައިގެ ހަތިޔާރެއްގެ ގޮތުގައި ޔަހޫދީ ފައުޖުތަކުން ބޭނުން ކުރަމުންދާ ކަމުގައި އޮކްސްފޭމުން ބުނެފިއެވެ. އޮކްސްފަރޑް ކޮމިޓީ ފޯ ފެމިން ރިލީފް، އޮކްސްފޭމަކީ ފަގީރުކަމާ ދެކޮޅަށް މަސައްކަތް ކުރަމުންދާ ބައިނަލްއަޤުވާމީ ޖަމުޢިއްޔާއެކެވެ.

ޔަހޫދީ ފައުޖުތަކުން ހައިހޫނު ކަމަކީ ޣައްޒާގެ މުސްލިމުންނާ ދެކޮޅަށް ބޭނުން ކުރަމުންދާ ހަނގުރާމައިގެ ހަތިޔާރެއް ކަމުގައި އެ ޖަމުޢިއްޔާއިން ބުނެފައި މި ވަނީ، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ ފުރަބަންދު އިތުރަށް ހަރުކަށިކޮށް، އެ ސަހަރަށް ކާބޯތަކެއްޗާއި، ފެނާއި، ބޭސްފަރުވާގެ ސާމާނުގެ އިތުރުން ތެޔޮ އެތެރެ ކުރުން ހުއްޓުވާފައިވާ ދަނޑިވަޅެއްގައެވެ.

އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމުގައި މިހާތަނަށް 7,028 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި 3,000 އަށްވުރެ ކުޑަ ޅަކުދިންނާއި ކުޑަކުދިން ހިމެނެއެވެ. އަދި، 17,400 އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. އަދި، ޣައްޒާގެ މުސްލިމުންގެ ގެދޮރުގެ 45 އިންސައްތަ ވަނީ ސުންނާފަތި ކޮށްލާފައެވެ.

އޮކްސްފޭމުން ބުނީ، ޣައްޒާގައި ހާލުގައި ޖެހިފައިވާ މުސްލިމުން ހައިހޫނު ކަމުން ސަލާމަތް ކުރަން އެ ސަހަރަށް ކާބޯތަކެއްޗާއި ފެން އެތެރެ ކުރުމުގެ ފުރުޞަތު ހުޅުވައިލަން ޖެހޭ ކަމުގައެވެ. އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް އެތެރެ ކޮށްފައި ވަނީ، އެ ސަހަރުގެ މުސްލިމުންނަށް ބޭނުންވާ ކާބޯތަކެތީގެ އެންމެ 2 އިންސައްތަ ކަމުގައި ވެސް އެ ޖަމުޢިއްޔާއިން ބުންޏެވެ. އަދި، ޣައްޒާގެ ރައްޔިތުންނަށް ދުވާލަކު 140 ލޮރީގެ ކާބޯތަކެތި ބޭނުންވާ ކަމުގައި ވެސް އެ ޖަމުޢިއްޔާއިން ބުންޏެވެ.

"ޣައްޒާގެ ހާލަތު ސިފަކުރެވޭނީ ބިރުވެރި ކަމެއްގެ ގޮތުގައި. ކޮބާ އިންސާނިއްޔަތު ކަން؟ ޔަހޫދީ ފައުޖުތަކުން އެ ދަނީ މުޅި ދުނިޔޭގެ ކުރިމަތީގައި އެތަކެއް މިލިޔަން މުސްލިމުންނަށް އަދަބުދެމުން. ހައިހޫނު ކަމަކީ ހަނގުރާމައިގެ ހަތިޔާރެއްގެ ގޮތުގައި ބޭނުން ކުރެވިގެން ނުވާނެ. މި ކަމާ މެދު އެއްވެސް ފިޔަވަޅެއް ނާޅައި ދުނިޔޭގެ ލީޑަރުން ތިބީ ބަލަން. މިހާރުންމިހާރަށް ފިޔަވަޅުތަކެއް އަޅައި އެ ކަން ހުއްޓުވަން ޖެހޭ،" މެދުއިރުމަތީގައި ހުންނަވާ އޮކްސްފޭމްގެ ރީޖަނަލް ޑިރެކްޓަރ ސާލީ އަބީ ޚަލީލް ވިދާޅުވިއެވެ.

"ކޮންމެ ދުވަހަކު ޣައްޒާގައި ދިރިއުޅޭ މުސްލިމުންގެ ހާލަތު ދަނީ ދަށަށް. ކުޑަކުދިންނަށް ވަނީ ނަފްސާނީ ބައްޔާއި ބިރުވެރިކަމާ ކުރިމަތިލާން ޖެހިފައި. އެ ކުދިން ބޯން ބޭނުން ކުރަނީ ތަޣައްޔަރުވެފައިވާ ފެން. ލިބެން ހުރީ ކުޑަ ފެންފޮދެއް. އެ ކުދިންނަށް ކާބޯތަކެތި ފޯރުކޮށްދޭނެ ގޮތެއް އެ ކުދިންގެ ޢާއިލާތަކަށް މިހާރު ނެތް. ޣައްޒާގެ ރައްޔިތުން މި އަޅުވެތިކަން ތަހައްމުލު ކުރަން ޖެހެނީ ކިހާ މިންވަރަކަށް؟"

ހައިހޫނު ކަން ހަތިޔާރެއްގެ ގޮތުގައި ބޭނުން ކުރުމަކީ އިންސާނިއްޔަތާ ބެހޭ ބައިނަލްއަޤުވާމީ ޤާނޫނުތަކުން މަނާކޮށްފައިވާ ކަމެއް ކަން ފާހަގަކޮށް، އޮކްސްފޭމުން ވަނީ ޔަހޫދީ ފައުޖުތައް ކުށްވެރި ކޮށްފައެވެ. އަދި، ޔަހޫދީ ފައުޖުތަކުން ހިންގަމުންދާ ގަތުލުއާންމު ހުއްޓުވަން ފިޔަވަޅުތަކެއް އެޅުމަށް އެ ޖަމުޢިއްޔާއިން ވަނީ އ.ދގެ ސަލާމަތީ މަޖިލީހަށް ގޮވައިލާފައެވެ. ނަމަވެސް، އެ ކަން ހުއްޓުވަން އ.ދގެ ސަލާމަތީ މަޖިލިސް ފޭލުވެފައިވާ ކަން ފާހަގަ ކޮށްލަން ޖެހެއެވެ. އެ ކަމަށް ފާޅުގައި ހުރަސް އަޅަމުން ދަނީ އެމެރިކާއިންނެވެ.

އ.ދއިން ވެސް ވަނީ ޣައްޒާގެ މުސްލިމުންގެ ހާލަތު ދަށްވަމުންދާ ކަމުގެ އިންޒާރު ކޮށްފައެވެ. އަދި، އެ މީހުންނަށް މުސީބާތެއް ކުރިމަތިވެފައިވާ ކަމުގައި ސިފަ ކޮށްފައެވެ. ޣައްޒާގެ މުސްލިމުންނަށް އިންސާނީ އެހީތެރިކަން ފޯރުކޮށް ދިނުމުގެ ހުއްދަ ދިނުމަށް އ.ދގެ އިދާރާތަކުން ޒަޔަނިސްޓު އިސްރާޢީލުގެ ކިބައިން އެދެމުން ދިޔަ ނަމަވެސް، ޔަހޫދީން އެ ފުރުޞަތު ދީފައެއް ނުވެއެވެ. އަދި، ޣައްޒާއަށް އިންސާނީ އެހީ އެތެރެ ކުރަން ދަނީ ފާޅުގައި ހުރަސް އަޅަމުންނެވެ.

އޮކްޓޫބަރު 7 ވަނަ ދުވަހު ޔަހޫދީ ފައުޖުތަކުން ފެށި ލާއިންސާނީ ޖަރީމާތަކަށް ފަހު ޣައްޒާއަށް އެތެރެވުމުގެ ހުއްދަ ދީފައި ވަނީ އެންމެ 70 ލޮރީއަށެވެ. އަދި، ތެޔޮ އެތެރެ ކުރުމަށް ހުރަސް އަޅާފައި އޮތުވުމުން، ޣައްޒާއިން ކަރަންޓު ކެނޑިދާނެ ކަމުގެ ބިރު ވަނީ ހީވެފައެވެ. ކަރަންޓުގެ ޚިދުމަތް ކެނޑިއްޖެ ނަމަ، ހޮސްޕިޓަލުތަގެ ޚިދުމަތްތަކަށް ބުރޫއަރައި، އެތަކެއް ސަތޭކަ ބަޔަކު ޝަހީދުވެގެން ދާނެ ކަމުގައި އ.ދގެ އިދާރާތަކުންނާއި ބައިނަލްއަޤުވާމީ ޖަމުޢިއްޔާތަކުން ދަނީ އިންޒާރު ކުރަމުންނެވެ. ނަމަވެސް، މި އިންޒާރުތަކަށް ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއިން ދެމުން ދަނީ ބީރު ކަންފަތެކެވެ.