ރަތް ކަނޑުގެ އައްސޭރިފަށުގައި އޮންނަ މިޞްރުގެ ރިސޯޓު ރަށެއް ކަމުގައިވާ ޠާބާއަށް މިސައިލް ހަމަލައެއްދީ ހަ މީހުން ޒަޚަމު ކޮށްލައިފިއެވެ. އެއީ، އިސްރާޢީލުގެ ސަރަޙައްދީ ރޮނގާ ކައިރީގައި އޮންނަ ރަށެކެވެ. މިސައިލް ހަމަލަ އަމާޒު ކޮށްފައި ވަނީ ޠާބާގައި ހުންނަ ޞިއްޙީ މަރުކަޒަކަށެވެ. މި ކަން ހާމަ ކޮށްފައި ވަނީ މިޞްރުގެ ނޫހެއް ކަމުގައިވާ އަލް ޤާހިރާއިންނެވެ.
މަސްދަރުތަކާ ހަވާލާދީ އެ ނޫހުން ބުނީ، ޠާބާއަށް ދީފައިވާ މިސައިލް ހަމަލައަކީ ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާ ގުޅުން ހުރި ހަމަލައެއް ކަމުގައެވެ. ޠާބާއަކީ ޣައްޒާއާ 220 ކިލޯމީޓަރު ދުރުގައި އޮންނަ ރަށެކެވެ. އަލް ޤާހިރާއިން ބުނީ، ހަމަލަ ދީފައި ވަނީ އެމްބިޔުލާންސް މަރުކަޒަކަށް ކަމުގައެވެ. މި ހަމަލާގައި އެ މަރުކަޒުގެ އިތުރުން އެ ތަނާ އިންވެގެން ހުންނަ ޢާންމުން ދިރިއުޅޭ ޢިމާރާތަކަށް ވެސް ބޮޑެތި ގެއްލުންތަކެއް ލިބިފައިވާ ކަމުގައި މަންޒަރު ފެނުނު މީހުން ބުނެއެވެ.
ޒަޔަނިސްޓު އިސްރާޢީލުން ވެސް ވަނީ ޠާބާގައި ސަލާމަތީ ހާދިސާއެއް ހިނގައިގެން އުޅޭ ކަމުގެ މަޢުލޫމާތު ލިބިފައިވާ ކަމުގައެވެ. އެއީ އިސްރާޢީލުގެ ސަރަޙައްދީ ރޮނގުން ބޭރުގައި ހިނގާފައިވާ ހާދިސާއެއް ކަމަށާއި، އެ ރަށާ އިންވެގެން އޮންނަ އިސްރާޢީލުގެ ރަށެއް ކަމުގައިވާ އެއިލާތަށް ޙަމާސް ޖަމާޢަތުން ދާދި ފަހުން ރޮކެޓް ހަމަލައެއް ދީފައިވާ ކަމުގައި ވެސް އިސްރާޢީލުން ބުނެއެވެ. ނަމަވެސް، މިއީ ޔަހޫދީ ފައުޖުތަކުން ދީފައިވާ ހަމަލައެއް ކަމަށް ބެލުމުގެ ފުރުޞަތު އޮތް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޠާބާއަކީ ރަތް ކަނޑުގެ އައްސޭރިފަށުގައި، އިސްރާޢީލާ އިންވެގެން އޮންނަ ރަށަކަށްވާއިރު، އެއީ ފަތުރުވެރިންގެ މެދުގައި މަޤުބޫލު މަންޒިލެކެވެ. އެ ރަށާ އިންވެގެން އޮންނަ އިސްރާޢީލުގެ އެއިލާތަކީ ބަނދަރުމަތީ ރަށެކެވެ. އެއިލާތު އޮންނަނީ ޣައްޒާއާ 350 ކިލޯމީޓަރު ދުރުގައެވެ. ޠާބާއަށް ހަމަލާ ދިނީ ކޮން ބަޔެއްކަން އަދި ސާފެއް ނޫނެވެ.