އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި މިއަދު ކުޅުނު މެޗުން ސްރީ ލަންކާ އަތުން ބަލިވެ، އެންމެ ފަހުގެ ޗެމްޕިއަނުން ކަމަށް އިންގްލަންޑް މުބާރާތުން ކަޓައިފިއެވެ.
ބެންގަލޫރުގައި ހުންނަ އެމް. ޗިންނަސުވާމީ ސްޓޭޑިއަމުގައި ކުޅުނު މި މެޗުން ލަންކާ މޮޅުވީ ފަސޭހަކަމާއެކު އަށް ވިކެޓުންނެވެ.
މި މެޗުގެ ގުރު ދިމާވުމުން އިންގްލަންޑް އެންމެ ފުރަތަމަ ކުޅެން އަރައި 33.2 ވަމަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 156 ލަނޑެވެ. އެ ޓީމުން އެންމެ ރަނގަޅަށް ކުޅުނީ 73 ބޯޅައިން 43 ލަނޑު ހެދި ބެން ސްޓޯކްއެވެ.
މި އިނިންގްސްގައި ލަންކާގެ ލަހިރު ކުމާރާ ވަނީ ހަތް އޯވަރުގައި 35 ލަނޑަށް ތިން ވިކެޓް ނަގާފައެވެ. އަދި އެ ޓީމުގެ ކަސުން ރަޖިތަ އާއި އެންޖެލޯ މަތެއުސް ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.
ޖަވާބުގައި ލަންކާ ކުޅެން އަރައި އެ ޓީމުން ވަނީ 25.4 ވަނަ އޯވަރުގައި ދެ ކުޅުންތެރިން ނުބައިވެގެން 160 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 83 ބޯޅައިން 77 ލަނޑު ހެދި ޕަތުމް ނިސަންކަ އާއި ނުބައިނުވެ 54 ބޯޅައިން ބޯޅައިން 65 ލަނޑު އެއްކުރި ސަދީރަ ސަވަރަވިކްރަމާއެވެ.
މި ނަތީޖާއާއެކު 10 ޤައުމު ވާދަކުރާ މި މުބާރާތުގެ ފުރަތަމަ ބުރުން އިންގްލަންޑް ކެޓިއިރު، އެ ޓީމު އޮތީ ތާވަލުގެ ފުލުން ދެވަނައިގައި ކުޅުނު ފަސް މެޗުން ލިބުނު ދެ ޕޮއިންޓާއެކުއެވެ. މި ފަހަރުގެ މުބާރާތުގައި އެ ޓީމު މިހާތަނަށް މޮޅުވެފައިވަނީ އެންމެ މެޗަކުންނެވެ. އަދި އިންގްލަންޑް ބަލިކުރި ލަންކާ އޮތީ ތާވަލުގެ ފަސްވަނައިގައި ފަސް މެޗުން ހަތަރު ޕޮއިންޓާއެކުއެވެ.