ޣައްޒާގެ ސިއްޙީ ވުޒާރާއިން ހާމަކުރާ މަރުވާ މީހުންގެ އަދަދުގެ ސައްހަ ކަމާމެދު ޝައްކު އުފެދޭ ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ. ބައިޑަން މިހެން ވިދާޅުވެފައި ވަނީ އޮސްޓްރޭލިއާގެ ބޮޑު ވަޒީރު އެންތޮނީ އަލްބެނީސްއާއެކު ބޭއްވި ނޫސްވެރިންގެ ބައްދަލުވުމެއްގައެވެ.
ޔަހޫދީންނާ ފަލަސްތީނުން މިހާރު ކުރަމުންދާ ހަނގުރާމައިގައި ބައިޑެން ވަނީ ފާޅުކަން ބޮޑު ގޮތެއްގައި އިސްރާއީލަށް ތާޢީދުކުރައްވާފައެވެ.
މި މަހުގެ 7ވަނަ ދުވަހުން ފެށިގެން ޣައްޒާއަށް ޔަހޫދީން ދެމުންގެންދާ ހަމަލާތަކުގައި މަރުވި މީހުންގެ އަދަދު 6،500އަށް އަރާފައިވާކަން ޣައްޒާގެ ސިއްހީ ވުޒާރާއިން ހާމަކޮށްފައިވާތީ، އެކަމާ ބެހޭ ގޮތުން ކުރި ސުވާލަކަށް ޖަވާބު ދެއްވަމުން ބައިޑަން ވިދާޅުވީ، މަރުވި މީހުންގެ އަދަދު ކަމަށް ފަލަސްތީނުން ބުނާ އަދަދަކީ ސައްހަ އަދަދެއް ކަމެއް ޔަޤީންވެވަޑައިނުގަންނަވާ ކަމަށެވެ.
އަދި އިސްރާއީލާ ދެކޮޅަށް ހަނގުރާމަ ފެށި މީހުންނަށް ހަމަލާތައް ދޭން އިސްރާއީލުން މިހާރަށް ވުރެ ބޮޑަށް ވިސްނަން ޖެހިއްޖެ ކަމަށްވެސް ބައިޑަން ވިދާޅުވިއެވެ. އޭނާ މިހެން ވިދާޅުވެފައިވާއިރު، ހަމާސް އިން ކޮންޓްރޯލުކުރާ ޣައްޒާގެ ސިއްހީ ވުޒާރާއިން ހާމަކުރާ އެއްވެސް މައުލޫމާތަކީ ކަށަވަރު މައުލޫމާތެއްގެ ގޮތުގައި ބަލައިގެން ނުވާނެ ކަމަށް ޤައުމީ ސަލާމަތާ ބެހޭ މައްސަލަތަކާ ބެހޭ ވައިޓް ހައުސްގެ ތަރުޖަމާނު ޖޯން ކަރބީ އާއި ޕްރެސް ސެކްރެޓަރީ ކެރީން ޖޯން ޕިއާރ ވެސް ވަނީ ލަފާދެއްވާފައެވެ.
ބައިޑަންގެ މި މޭރުމުން ވާހަކަފުޅުދެއްކެވުމުން ގިނަ ބައެއްގެ ފާޑުކިޔުންވެސް ވަނީ އަމާޒުވެފައެވެ. އެގޮތުން ކައުންސިލް އޮން އެމެރިކަން-އިސްލާމިކް ރިލޭޝަންސް، ސީއޭއައިއާރުގެ އެގްޒެކެޓިވް ޑިރެކްޓަރު ނިހާދު އަވާދު ވިދާޅުވީ ފާއިތުވި ދެ ހަފްތާގެ ތެރޭގައި ޝަހީދުކޮށްލާފައިވާ ގާތްގަނޑަކަށް 7،000 ފަލަސްތީނުންނާ ގުޅޭ ގޮތުން ރައީސް ބައިޑަން ދެއްކެވި އިންސާނިއްޔަތުކަން ގެއްލިފައިވާ ވާހަކަތަކުން އެ ޖަމާއަތަށް ވަރަށް ބޮޑު ސިހުމެއް ލިބި އެކަމާ ކަންބޮޑުވާ ކަމަށެވެ.
ޔަހޫދީން ޣައްޒާގައި ހިންގަމުންދާ ލާއިންސާނީ އަމަލުތަކުގެ ސަބަބުން ޣައްޒާގެ ނިކަމެތި ރައްޔިތުންނަށް ބޭނުންވާ ފެނާ ކަރަންޓާއި ބޭސް ވެސް ވަނީ ހުސްވެފައެވެ. ނަމަވެސް އިންސާނީ އެހީ ހިފައިގެންދާ ގާފިލާތައް ދަނީ ޔަހޫދީން ހުއްދަ ދޭ ވަރަކުން ޣައްޒާއަށް ވަންނަމުންނެވެ.