ޖިނާޢީ ތަޙުޤީޤަކަށް ހެކި ހޯދުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އޮފީހަށް ފުލުހުން ވަދެ ބަލައި ފާސްކުރި ނަމަވެސް، އެއްވެސް ޚިޔާނާތެއް ވެފައި ނޯންނާނެ ކަމުގެ ޔަގީންކަންދޭ ކަމަށާއި، މިއީ ފުޓްބޯޅައިގެ ހާލަތުގެ ފައިދާ ނަގަން ކުރާ މަސައްކަތެއް ކަމަށް އި އިދާރާއިން ތުހުމަތުކޮށްފިއެވެ.
ފީފާ އާއި އޭއެފްސީން ކޮންމެ އަހަރަކުވެސް ރާއްޖެއަށް ދޭ ބޭރު ފައިސާ ނަހަމަ ގޮތުގައި އަމިއްލަ މަންފާ ހޯދަން ބޭނުންކުރާ މައްސަލައިގެ ތަހުގީގަށް ފުލުހުން ވަދެ އެ އިދާރާގެ ބައެއްް ތަކެތި ފުލުހުންގެ ބެލުމުގެ ދަށަށް ވަނީ ގެނެސްފައެވެ.
މިކަމާއި ގުޅިގެން އެފްއޭއެމުން ނެރުނު ނޫސްބަޔާނެއްގައި ވަނީ މިއީ ޒާތީ ބޭނުމެއްގައި ހާލަތުގެ ފައިދާ ނަގަން ކުރަމުންދާ މަސައްކަތެއް ކަމަށާއި އެއްވެސް ފައިސާއަކަށް ހިޔާނާތްތެރިވެފައި ނުވާނެކަމަށެވެ.
އެފްއޭއެމުން މިހެން ބުނެފައިވާއިރު ޕީޖީ އޮފީހުން މީގެކުރިން ނެރުނު ބަޔާނުގައި ވަނީ ދައުލަތުގެ މުއައްސަސާތައް ހިންގުމަށް ވަކި ހަމަތަކަކާއި އުސޫލުތަކެއްގެ ދަށުން ފޮނުވާ ފައިސާ ގާނޫނާ ހިލާފަށް، ކުށްކުރުމަށް ނުވަތަ ކުށްކުރުމަށް މަގުފަހިވާ ގޮތަށް ބޭނުންކުރެވޭ ކަމުގެ ތުހުމަތެއް އޮތުމަކީ ބޮޑު ކަންބޮޑުވުމެއް ކަމަށް ބުނެފައެވެ.
މިކަމާއި ގުޅިގެން ފުޓުބޯޅަ އާއިލާގެ ގިނަ ބައެއްގެ ފާޑުކިޔުން އަމާޒުވެފައިވާ މި ދަނޑިވަޅުގައި އެފްއޭއެމުން ނެރުނު ނޫސްބަޔާނުގައި ވަނީ ކުރެވޭ ތުހުމަތުތަކަށް ކެރިގެން ކުރިމަތިލާނެ ކަމަށް ބުނެފައެވެ. އަދި ކޮންމެ އަހަރަކު ލިބޭ ފައިސާއަކީ ދެފުށްފެންނަ ޓްރޭސް ކުރެވޭނެ މިންގަނޑުތެރޭގައި ބޭނުންކުރެވޭ ފައިސާކަން ކަށަވަރުކުރުމަށް ކޮންމެ އަހަރަކު އޮޑިޓްކުރާ ކަމަށާއި އޮޅުވާލުމެއް ނުފެންނާނެ ކަމަށެވެ.
އެފްއޭއެމުގެ މި ބަޔާނުގައި އެ އިދާރާއިން ވަނީ މިކަން އޭއެފްސީއާއި ފީފާގެ ސަމާލުކަމަށްވެސް ގެނެސްފައިވާ ކަމަށް ބުނެފައެވެ. އަދި ގާނޫނީ އިމުގެ ތެރެއިން ތަހުގީގު ގެންދިއުން އެއްވެސް ހުރަހެއް ނެތްކަމަށް ބުނެފައިވާކަމަށް އެފްއޭއެމުގެ ބަޔާނުގައިވެއެވެ.
ފުލުހުންގެ އިދާރާއިން ކުރަމުންދާ ތަހުގީގަށް އެ އިދާރާއިން ވަނީ އެފްއޭއެމުގެ ގިނަ ލިޔެކިޔުންތަކެއް ފުލުހުންގެ ބެލުމުގެ ދަށަށް ގެންގޮސްފައެވެ. މިކަމާއި ގުޅިގެން އެ އިދާރާއިން ވަނީ މިކަމުގެ ސަބަބުން އެ އިދާރާއިން ދުވަހުން ދުވަހަށް ކުރަންޖެހޭ މަސައްކަތްތަށް ހުއްޓިފައިވާކަމަށް ބުނެފައެވެ.