ރާއްޖޭގެ ފުޓްބޯޅަ ނާޒުކު ހާލަތެއްގައި ވަނިކޮށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް، ދުނިޔޭގެ ފުޓްބޯޅައިގެ މައި އިދާރާ ފީފާގެ ރައީސް ޖިއާނީ އިންފަންޓީނޯއާ ބައްދަލުކުރައްވައިފިއެވެ.
ފީފާގެ ރައީސްއާއި ބައްދަލުކުރެއްވި އިރު، މަނީ ލޯންޑްރިންގެ ތުހުމަތުގައި އެފްއޭއެމަށް ފުލުހުން ވަދެ، ފުލުހުން ވަނީ ދާދިފަހުން ބޮޑު ތަހުގީގެއް ފަށާފައެވެ. ޕީޖީ އޮފީހުން އަންގައިގެން ފުލުހުން އެފްއޭއެމަށް ވަނީ މާލީ މުއާމަލާތްތަކާގުޅޭ ޖިނާއީ ތަހުގީގަކަށް ބޭނުންވާ ހެކި ހޯދުމަށް ކޯޓު އަމުރެއްގެ ދަށުންނެވެ.
ފްރާންސްގައި ބޭއްވި ފީފާގެ މި ބައްދަލުވުމުގައި ރާއްޖޭގެ ފުޓުބޯޅަ އެސޯސިއޭޝަނުގެ އިސްވެރިން ބައިވެރިވެވަޑައިގަންނަވައެވެ. ރާއްޖޭގެ އިތުރުން މަޑަގަސްކަރަ އާއި މަލާވީގެ ފުޓުބޯޅަ އެސޯސިއޭޝަނާވެސް ވަނީ ބައްދަލުކުރައްވާފައެވެ.
އެފްއޭއެމްގެ އިސްވެރިންނާއި ބައްދަލުކުރެއްވިކަން ހާމަކުރައްވާ މީސްމީޑިއާގައި އިންފަންޓީނޯ ވަނީ ފީފާއިން އަބަދުވެސް ދުނިޔޭގެ ހުރިހާ މެންބަރު އެސޯސިއޭޝަންތަކަށް ވެސް އެއްބާރުލުން ދޭނެ ކަމަށާއި މި ކުޅިވަރު އިތުރު މީހުންނާ ހަމައަށް ގެންދިޔުމަށް މަޝްވަރާކުރެވުނު ކަމަށް ވިދާޅުވެފައެވެ.
ރާއްޖޭގެ ޕްރޮސިކިއުޓަރ ޖެނެރަލްގެ އޮފީހުން ވަނީ ފީފާ އާއި އޭއެފްސީ އަދި ބައިނަލްއަގުވާމީ އެހެން އިދާރާތަކުން އެފްއޭއެމަށް ދޭ ފައިސާ އެ އިދާރާގެ ބައެއް ވެރިން ނަހަމަގޮތުގައި ބޭނުން ކުރާ ކަމުގެ ތުހުމަތުކޮށްފައެވެ. ނަމަވެސް އެފްއޭއެމުން ވަނީ މިކަން ދޮގުކޮށްފައެވެ.