ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމުގައި ޝަހީދުކޮށްލާފައިވާ ޅަކުދިންނާއި ކުޑަކުދިންގެ ޢަދަދު 3,000އަށް އަރާފައިވާ ކަން އ.ދގެ ކުޑަކުދިންނާ ބެހޭ ފަންޑު (ޔުނިސެފު)ން ހާމަކޮށްފިއެވެ. އޮކްޓޫބަރު 7ވަނަ ދުވަހުން ފެށިގެން ޔަހޫދީ ފައުޖުތަކުން ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 7,028 އަށް އިތުރުވެފައެވެ.
"ޣައްޒާގައި ޝަހީދު ކުރަމުންދާ މައުސޫމު ކުޑަކުދިންގެ ޢަދަދު އެ ދަނީ ދުވަހެއް ދުވަހަކަށް އިތުރުވަމުން. މިއީ, އަޅުގަނޑުމެންނަށް ގަބޫލުކުރަން ދަތި ކަމެއް. ނަމަވެސް, ހަޤީޤަތަކީ މިއީ. ގަބޫލު ކުރަން ޖެހޭ ހަޤީޤަތަކީ, ޣައްޒާއަށް އިންސާނީ އެހީގެ ގޮތުގައި ކާބޯތަކެއްޗާއި, ފެނާއި, ބޭސްފަރުވާއަށް ބޭނުންވާ ސާމާނައި ތެޔޮ އެތެރެ ކުރަން ޔަހޫދީން ހުރަސް އަޅަމުންދާ ނަމަ, ޣައްޒާއިން މަރުވާ ޅަކުދިންނާއި ކުޑަކުދިންގެ ޢަދަދުތައް ދުވަހެއް ދުވަހަކަށް އިތުރުވަމުންދާނެ ކަން،" ޔުނިސެފްގެ ސަރަޙައްދީ ޑިރެކްޓަރު އުދީލް ޚުޟްރު ވިދާޅުވިއެވެ.
މީގެ އިތުރުން, ޣައްޒާއިން ހަލުވިކަމާއެކު ތެޔޮ ހުސްވަމުންދާއިރު, ކަރަންޓުގެ ޚިދުމަތް ކެނޑި, ހޮސްޕިޓަލުތަކާއި ޞިއްޙީ މަރުކަޒުތަކުގެ ޚިދުމަތްތައް ހުއްޓުމަކަށް އަންނަމުންދާކަމަށް އ.ދއިން ވަނީ އިންޒާރު ކޮށްފައެވެ. ފަލަސްޠީނުގެ ރެފިޔުޖީންނާ ބެހޭ އ.ދގެ އިދާރާ – ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ ފޯ ޕަލަސްޓީނިޔަން ރެފިއުޖީޒް (ޔޫ.އެން.އާރް.ޑަބްލިޔު.އޭ)ން ބުނީ ތެލާއި ކަރަންޓަކީ ޣައްޒާގެ ހޮސްޕިޓަލްތަކުގައި އެޑްމިޓުކޮށްފައިވާ އެތަކެއް ހާސް ބަޔެއްގެ ފުރާނަ ސަލާމަތް ކުރަން ކޮންމެހެން ބޭނުން އެއްޗެއް ކަމުގައެވެ.
"ޣައްޒާއަށް ތެޔޮ އެތެރެކުރަން ޔަހޫދީން ހުރަސް އަޅަމުންދާ ނަމަ, މި ޖަމުޢިއްޔާއިން އިންސާނީއްޔަތަށްޓަކައި ޣައްޒާގައި ހިންގަމުންދާ ގިނަ މަޝްރޫޢުތަކާއި ޕުރޮގުރާމުތައް ހުއްޓުމަކަށް އަންނާނެ. ކުރިއަށް އޮތީ ވަރަށް ވެސް ބިރުވެރި 24 ގަޑިއިރު،" މި ކަމާ ގުޅޭ ގޮތުން ޔޫ.އެން.އާރް.ޑަބްލިޔު.އޭން ނެރުނު ބަޔާނެއްގައި އެ ޖަމުޢިއްޔާއިން ބުންޏެވެ. ޣައްޒާގެ ހޮސްޕިޓަލްތަކުގައި އިންކިޔުބޭޓަރުގައި ޞިއްޙީ ފަރުވާ ދެމުންދާ ތުއްތުކުދިންގެ ޢަދަދު 130 އަށް އަރައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް ދެމުންދާ ހަމަލަތަކާ ގުޅިގެން ހާލުގައި ޖެހިފައިވާ މީހުންގެ ޢަދަދު މިހާރު 1.4 މިލިޔަނަށް އަރާ ކަމުގައި އ.ދއިން ބުނާއިރު, އޭގެ ތެރެއިން 613,000 އަށްވުރެ ގިނަ މީހުން މި ވަގުތު ދިރިއުޅެމުން ދަނީ ޔޫ.އެން.އާރް.ޑަބްލިޔު.އޭގެ ހިޔާތަކުގައެވެ. އެ ޖަމުޢިއްޔާއިން ދަނީ 15 ހިޔާވަހިކަމެއް ބަލަހައްޓަމުންނެވެ. އަދި, ހާލުގައި ޖެހިފައިވާ އެތަކެއް ހާސް މުސްލިމުންނަށް އިންސާނީ އެހީތެރިކަމާއި ރައްކާތެރި ކަން ފޯރުކޮށްދޭން މަސައްކަތް ކުރަމުންނެވެ.
ނަމަވެސް, ޔަހޫދީ އިސްރާޢީލުން ދަނީ ޔޫ.އެން.އާރް.ޑަބްލިޔު.އޭގެ މުވައްޒަފުންނަށް ވެސް ހަމަލަދީ, އެ މީހުން ވެސް މަރަމުންނެވެ. ފާއިތުވި 24 ގަޑިއިރުގެ ތެރޭގައި ޔަހޫދީ ފައުޖުތަކުން ދިން ހަމަލަތަކުގައި ޔޫ.އެން.އާރް.ޑަބްލިޔު.އޭގެ ތިން މުވައްޒަފުން މަރުވިއެވެ. މިއާ އެކު, އޮކްޓޫބަރު 7 ވަނަ ދުވަހުން ފެށިގެން މަރައިލާފައިވާ އެ ޖަމުޢިއްޔާގެ މުވައްޒަފުންގެ ޢަދަދު ވަނީ 38 އަށް އަރާފައެވެ.
ޔަހޫދީންގެ އުދުވާނުގައި ޒަޚަމު ކޮށްލާފައިވާ މީހުންގެ ޢަދަދު ވެސް މިހާރު ވަނީ 17,400 އަށްވުރެ މައްޗަށް އަރާފައެވެ. ޣައްޒާގެ ޞިއްޙަތާ ބެހޭ ވުޒާރާއިން ބުނީ, އެ ސަހަރުގައިވާ ގެދޮރުގެ 45 އިންސައްތަ މިހާރު ސުންނާފަތި ކޮށްލާފައިވާ ކަމުގައެވެ. އޭގެ ތެރޭގައި 219 ސްކޫލެއް ހިމެނޭއިރު, އޭގެ ތެރެއިން 29 ސްކޫލަކީ އ.ދއިން ހިންގާ ސްކޫލްތަކެވެ.
ޔަހޫދީ ފައުޖުތަކުގެ ހަމަލަތައް ހޮސްޕިޓަލްތަކާއި ޞިއްޙީ މަރުކަޒުތަކުގެ އިތުރުން ޞިއްޙީ ޚިދުމަތްތެރިންނަށް ވެސް ދަނީ އަމާޒު ކުރަމުންނެވެ. އޮކްޓޫބަރު 7 ވަނަ ދުވަހުން ފެށިގެން މިއަދާ ހަމައަށް ޝަހީދު ކޮށްލާފައިވާ ޞިއްޙީ ޚިދުމަތްތެރިންގެ ޢަދަދު 101 އަށް އަރައެވެ. އަދި, އިތުރު 100 ޞިއްޙީ ޚިދުމަތްތެރިން ޒަޚަމު ކޮށްލާފައިވާއިރު, 24 ހޮސްޕިޓަލެއް ހުސް ކުރަން ވެސް ޔަހޫދީ ފައުޖުތަކުން ވަނީ އަމުރު ކޮށްފައެވެ. މީގެ އިތުރުން, 50 އެމްބިޔުލާންސަކަށް ޔަހޫދީ ފައުޖުތަކުން ވަނީ ހަމަލަދީ ހަލާކު ކޮށްލާފައެވެ.