ޔަހޫދީ ފައުޖުތަކުން ޣައްޒާގައި ހިންގަމުންދާ ގަތުލުއާންމު ހުއްޓުވުމަށް ގޮވައިލާ އ.ދގެ ސަލާމަތީ މަޖިލީހަށް ހުށަހެޅި އިތުރު ދެ ޤަރާރު ފޭލުކޮށްލައިފިއެވެ. އޭގެ ތެރެއިން އެއް ޤަރާރު ހުށަހަޅާފައި ވަނީ އެމެރިކާއިންނެވެ. އެ ޤަރާރުގައި ޔަހޫދީންގެ ގަތުލުއާންމު ކުށްވެރިކޮށްފައެއް ވެސް އަދި ލާއިންސާނީ އުދުވާންތައް ހުއްޓައިލަން ވެސް ގޮވައިލާފައެއް ނުވެއެވެ. ނަމަވެސް، ވަގުތީ ގޮތުން ހަމަލަ ބަދަލު ކުރުން މެދުކަނޑައިލާ، ޣައްޒާއަށް އިންސާނީ އެހީ ފޯރުކޮށްދޭން ހުށަހަޅާފައިވެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 6,546 އަށް އުފުލިފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި ކުޑަކުދިންނެވެ. ޝަހީދު ކޮށްލާފައިވާ ކުޑަކުދިންގެ ޢަދަދު 2,360 އަށް އަރައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 15,000 އަށްވުރެ އިތުރުވެފައެވެ.
ސަލާމަތީ މަޖިލީހުގެ ގިނަ މެންބަރުންގެ ފާޑު ކިޔުންތައް އަމާޒުވުމާ ގުޅިގެން އެމެރިކާއިން ވަނީ އެ ޤައުމުން ހުށަހެޅި ޤަރާރަށް ބަދަލުތަކެއް ގެނެސްފައެވެ. އެމެރިކާއިން ފުރަތަމަ ހުށަހެޅި ދެލިކޮޕީގައި ޣައްޒާގެ 2.3 މިލިޔަން މީހުންނަށް ޔަހޫދީން ކުރިމަތި ކޮށްފައިވާ މުސީބާތަށް އަލިއަޅުވައިލާފައެއް ނުވެއެވެ. އަދި، އަމިއްލަ ދިފާޢުގައި ޣައްޒާގެ މުސްލިމުން ގަތުލު ކުރުމުގެ ހައްޤު ޒަޔަނިސްޓު އިސްރާޢީލަށް ލިބިފައިވާ ކަމަށް ވަކާލާތު ކޮށްފައިވެއެވެ. ނަމަވެސް، ރަޝިޔާއާއި ޗައިނާއިން ވަނީ ވީޓޯގެ ބާރު ބޭނުންކޮށް، އެ ޤަރާރު ފޭލުކޮށްލާފައެވެ.
އެމެރިކާގެ ޤަރާރަށް 10 މެންބަރުން ތާޢީދު ކޮށްފައިވާއިރު، އެކުވެރި ޢަރަބި ޢިމާރާތް (ޔޫ.އޭ.އީ)ން ވަނީ ޤަރާރާ ދެކޮޅަށް ވޯޓުދީފައެވެ. ބްރެޒިލާއި މޮޒަމްބީކުން ވޯޓުގައި ބައިވެރިއެއް ނުވެއެވެ. ޚާރިޖީ ދާއިރާގެ މާހިރުން ބުނަނީ، އެމެރިކާއިން ގޮވައިލާފައި ވަނީ ހަމަލަ ބަދަލުކުރުން ވަގުތީ ގޮތުން މެދުކަނޑައިލަން ކަމުގައެވެ. އަދި، ޔަހޫދީންގެ ގަތުލުއާންމު ހުއްޓައިލަން ބާރުއަޅާފައި ނުވާ ކަމުގައެވެ. އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝްގެ ޚިޔާލުފުޅު ވެސް ހުރީ އެމެރިކާއާ ދެކޮޅަށެވެ.
"މުޅި ދުނިޔެއިން ގޮވަމުން ދަނީ ގަތުލުއާންމު ހުއްޓައިލުމަށް. ހަނގުރާމަ ހުއްޓައިލުމަށް. ނަމަވެސް، އެމެރިކާގެ ޤަރާރުގައި އެ ކަން ފާހަގަކޮށްފައެއް ނެތް. ސީސްފަޔަރ ނުވަތަ ހަމަލަ ބަދަލު ކުރުން ވަގުތީ ގޮތުން މެދުކަނޑައިލުމަކީ ހައްލެއް ނޫން. އޭގެ މާނައަކީ، ފަލަސްޠީނުގެ އިތުރު ބަޔެއްގެ ފުރާނަ ގެއްލިގެންދާނެއޭ،" ޗައިނާއިން އ.ދއަށް ކަނޑައަޅާފައި ހުންނަވާ ސަފީރު ޖޮންގް ޖަން ވިދާޅުވިއެވެ.
ދެވަނަ ޤަރާރު ހުށަހަޅާފައި ވަނީ ރަޝިޔާއިންނެވެ. ޔަހޫދީން ޣައްޒާގައި ހިންގަމުންދާ ގަތުލުއާންމު ހުއްޓައިލާ، ޣައްޒާގެ އުތުރުގެ ރަށްތައް ހުސްކުރަން ޔަހޫދީ އިސްރާޢީލުން އަންގާފައިވާ އެންގުން ބާޠިލުކޮށް، އެއްގަމު މަގުން ޣައްޒާއަށް އެރުމަށް ކުރަމުންދާ ތައްޔާރީތަކާ ދެކޮޅަށް އެ ޤަރާރުގައި ވަކާލާތު ކޮށްފައިވެއެވެ. ނަމަވެސް، އެ ޤަރާރަށް ވެސް ތާޢީދު ލިބިފައެއް ނުވެއެވެ. ރަޝިޔާގެ ޤަރާރަށް ތާޢީދުކޮށް ލިބިފައި ވަނީ އެންމެ ހަތަރު ވޯޓެވެ. މިއީ، ޢައްޒާގެ ގަތުލުއާންމު ހުއްޓުވަން ރަޝިޔާއިން އިސްނަގައިގެން ސަލާމަތީ މަޖިލީހަށް ހުށަހަޅާފައިވާ ދެވަނަ ޤަރާރެވެ. އޮކްޓޫބަރު 16 ވަނަ ދުވަހު ރަޝިޔާއިން ހުށަހެޅި ޤަރާރަށް ވެސް ލިބުނީ އެންމެ ފަސް ވޯޓެވެ.
ރަޝިޔާގެ ދެވަނަ ޤަރާރު ފޭލުވުމުން ޔޫ.އޭ.އީގެ ސަފީރު ލާނާ ނަސީބާ ވަނީ ކަންބޮޑުވުން ފާޅު ކުރައްވާފައެވެ. ޔޫ.އޭ.އީއަކީ ރަޝިޔާގެ ޤަރާރަށް ތާޢީދު ކުރި އެއް ޤައުމެވެ. މޯލްޓާގެ ސަފީރު ވެނެއްސާ ފްރެއިޒިޔަރ ވިދާޅުވީ، ސަލާމަތީ މަޖިލީހަށް އިންތިޚާބު ކޮށްފައިވާ 10 މެންބަރުން ގުޅިގެން އައު ޤަރާރެއް ތައްޔާރު ކުރުމުގެ މަސައްކަތް ފަށާފައިވާ ކަމުގައެވެ. އޮކްޓޫބަރު 18 ވަނަ ދުވަހު ބްރެޒިލުން ވެސް ވަނީ މި ކަމާ ގުޅޭ ގޮތުން ޤަރާރެއް ހުށަހަޅާފައެވެ. ނަމަވެސް، ޔަހޫދީންނަށް ވާގިވެރިވާ އެމެރިކާއިން ވަނީ އެ ޤަރާރު ވީޓޯ ކޮށްފައެވެ. ރަޝިޔާއާއި އިނގިރޭސިވިލާތުން ވޯޓުގައި ބައިވެރިއެއް ނުވެއެވެ.
އޮކްޓޫބަރު 27 ވަނަ ދުވަހު އ.ދގެ ޢާންމު މަޖިލީހުގައި ވެސް މި މައްސަލައާ ގުޅޭ ގޮތުން ވޯޓަކަށް އަހާނެއެވެ. ޢާންމު މަޖިލީހަށް ޤަރާރެއް ހުށަހަޅާފައި ވަނީ ޢަރަބި ޤައުމުތަކުންނެވެ. އެ މަޖިލީހަށް ހުށަހަޅާ ޤަރާރުތައް ވީޓޯ ކުރުމުގެ ބާރު އެއްވެސް ޤައުމަކަށް ލިބިގެނެއް ނުވެއެވެ. އެއީ، އަމަލު ކުރުން ލާޒިމު ޤަރާރެއް ނޫން ނަމަވެސް، އެއީ ސިޔާސީ ގޮތުން ބަރުދަން ހުރި ޤަރާރަކަށް ވާނެ ކަމުގައި މަސްރަޙު ދިރާސާކުރާ ފަރާތްތަކުން ގަބޫލު ކުރެއެވެ.