އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި އޮސްޓްރޭލިއާއިން ފަސޭހަކަމާއެކު ނެދަލަންޑްސް ބަލިކޮށްފިއެވެ.
ދިއްލީގައި ހުންނަ އަރުން ޖެއިޓްލީ ސްޓޭޑިއަމުގައި ކުޅުނު މި މެޗުން އޮސްޓްރޭލިއާ މޮޅުވީ 309 ލަނޑުންނެވެ.
މި މެޗުގެ ގުރު ދިމާވުމުން އޮސްޓްރޭލިއާ އެންމެ ފުރަތަމަ ކުޅެން އަރައި 50 އޯވަރު ހަމަވިއިރު އަށް ކުޅުންތެރިން ނުބައިވެގެން ވަނީ 399 ލަނޑު ހަދާފައެވެ. މި އިނިންސްގައި އޮސްޓްރޭލިއާގެ ދެ ކުޅުންތެރިއަކު ވަނީ ސެންޗަރީ ހަދާފައެވެ. އެއީ 93 ބޯޅައިން 104 ލަނޑު ހެދި ޑޭވިޑް ވާނާ އާއި 44 ބޯޅައިން 106 ލަނޑު އެއްކުރި ގްލެން މެކްސްވެލްއެވެ.
މިއާއެކު މެކްސްވެލް ވެފައިވަނީ ކްރިކެޓް ވޯލްޑް ކަޕެއްގައި އެންމެ އަވަހަށް ސެންޗަރީއެއް ހެދި ކުޅުންތެރިޔާއަށެވެ. އެގޮތުން 44 ބޯޅައިގެ ތެރެއިން އޭނާ ވަނީ އަށް ބޯޅަ ހަޔަކަށް އަދި ނުވަ ބޯޅަ ހަތަރަކަށް ޖަހާފައެވެ.
ޖަވާބުގައި ނެދަލަންޑްސް ކުޅެން އަރައި 21 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 90 ލަނޑެވެ. މި އިނިންގްސްގައި އޮސްޓްރޭލިއާގެ އެޑަމް ޒަމްޕާ ވަނީ އެންމެ ތިން އޯވަރުގައި އަށް ލަނޑަށް ހަތަރު ވިކެޓް ނަގާފައެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ތާވަލުގެ ހަތަރުވަނައިގައި އޮސްޓްރޭލިއާ އޮތީ ކުޅުނު ފަސް މެޗުން ލިބުނު ހަ ޕޮއިންޓާއެކުއެވެ. އަދި ނެދަލަންޑްސް އޮތީ ތާވަލުގެ ފުލުގައި ފަސް މެޗުން ދެ ޕޮއިންޓާއެކުއެވެ.