މުސްލިމުންގެ ތިން ވަނައަށް އެންމެ މުޤައްދަސް މިސްކިތް ކަމަށްވާ ޤުދުސްގެ އޯލްޑް ސިޓީގައި ހުންނަ އަލް އަޤްޞާ މިސްކިތް މުސްލިމުންނަށް ބަންދުކޮށްފިއެވެ.
އަޤްޞާ މިސްކިތް ބެލެހެއްޓުމާ ހަވާލުވެފައިވާ އިސްލާމިކް ވަގުފް ޑިޕާޓްމަންޓާ ހަވާލާދީ ފަލަސްޠީނުގެ ވަފާ ނޫހުން ރިޕޯޓުކޮށްފައިވާ ގޮތުން ޔަހޫދީން މިސްކިތް ބަންދުކޮށްފައިވަނީ ކުއްލިއަކަށެވެ. އަދި ގޭޓު ބަންދުކޮށް އެއްވެސް މުސްލިމަކަށް ނުވަދެވޭ ގޮތަށް ވަނީ ހަދާފައެވެ.
އޮކްޓޯބަރު 24ވަނަ ދުވަހުގެ ހެނދުނުން ފެށިގެން މިސްކިތް ބަންދުކޮށްފައިވާއިރު، ވަނުމުގެ ހުއްދަ ފުރަތަމަ ދީފައި ވަނީ ހަމައެކަނި ދުވަސްވީ މީހުންނަށް ކަމަށްވެސް ވަފާ ނޫހުން ބުނެއެވެ. ނަމަވެސް ފަހުން ވަނީ ހުރިހާ އުމުރެއްގެ މީހުންނަށްވެސް މިސްކިތަށް ވަނުން މަނާކޮށްފައެވެ. މި ގޮތަށް މިސްކިތް ބަންދުކޮށް މުސްލިމުންނަށް އެތެރެއަށް ނުވަދެވޭ ގޮތް އިސްރާއީލުން ހަދާފައި މިވަނީ ދުވަސްގަނޑަކަށްފަހުއެވެ.
ހަމައެކަނި މުސްލިމުން އަޅުކަން ކުރާ މި މިސްކިތަށް ޔަހޫދީން ވަދެ އަޅުކަންކޮށް ގޯތި ތެރެއަށް ވަނުމުގެ ހުއްދަ ދީފައިވާ ކަންވެސް ވަފާ ނޫހުން ވަނީ ފާހަގަކޮށްފައެވެ. ނަމަވެސް ޔަހޫދީންގެ ގާނޫނުގައިވާ ގޮތުން އަޤްޞާ މިސްކިތުގެ އެއްވެސް ތަނަކަށް ޔަހޫދީން ވަނުމަކީ މަނާކަމެކެވެ. ފަލަސްތީނުގެ ގިނަ ރައްޔިތުން ނަމާދުކޮށް، ހާއްސަކޮށް ހުކުރު ނަމާދަށް ދާ އެ މިސްކިތަށް ދާ މީހުންނަށް ޔަހޫދީ ސިފައިން ވަނީ މީގެކުރިންވެސް އެކި ކަހަލަ ހަމަލާތައް ދީފައެވެ. އަދި އެތަނުގައި ނަމާދު ކުރަން ތިބޭ އެތައް މުސްލިމުންތަކެއް ހައްޔަރުވެސް ކޮށްފައިވެއެވެ.
އިސްރާއީލްގެ ޔަހޫދީން ގަބޫލު ކުރާ ގޮތުގައި މަސްޖިދުލް އަޤްޞާއަކީ އެމީހުންގެ ބިމެކެވެ. އެތަނަށް ވަދެ އަޅުކަން ކުރުމަކީ އެމީހުންނަށް ލިބިގެންވާ ހައްގެއް ކަމަށްވެސް އިސްރާއީލުން ބުނެއެވެ. ނަމަވެސް ދުނިޔޭގެ އެކި ކަންކޮޅުތަކުގައި އުޅޭ މުސްލިމުން އެކަން ގަބޫލެއް ނުކުރެއެވެ.
އަލް އަޤްޞާގެ މުޤައްދަސް ބިމުގައި ޔަހޫދީން ހިންގާ އަނިޔާވެރިކަން ކުށްވެރިކޮށް، މިސްރާއި ޔަމަން، އުރުދުން، އަދި ގަލްފް ކޯޕަރޭޝަން ކައުންސިލް (ޖީސީސީ)ގެ ޤައުމުތައް ހިމެނޭ ގޮތަށް މެދުއިރުމަތީގެ ޤައުމުތަކުން އާންމުކޮށް ބަޔާން ނެރެއެވެ.