ޔަހޫދީ ފައުޖުތަކުން ޣައްޒާގެ ކުށެއް ނެތް މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކަކީ އިންސާނިއްޔަތާ ބެހޭ ބައިނަލްއަޤުވާމީ ޤާނޫނުތަކާ ޚިލާފަށް ހިންގަމުންދާ ޖަރީމާތަކެއް ކަމަށް ވިދާޅުވެ، އ.ދގެ ސެކްރެޓަރީ ޖެނެރަލް އެންތޯނިއޯ ގުތެރޭޝް ޒަޔަނިސްޓު އިސްރާޢީލަށް ފާޑު ވިދާޅުވެއްޖެއެވެ. ޔަހޫދީ ފައުޖުތަކުން ޣައްޒާގައި މިހާރު ހިންގަމުންދާ ލާއިންސާނީ ޖަރީމާތަކާ ގުޅޭ ގޮތުން އ.ދގެ ސަލާމަތީ މަޖިލީހުގައި ވާހަކަފުޅު ދައްކަވަމުން ގުތެރޭޝް ވަނީ، ޣައްޒާގެ މުސްލިމުންނަށް އަމާޒުކޮށް ދެމުންދާ ހަމަލާތައް ވަގުތުން ހުއްޓައިލަން ތަކުރާރުކޮށް ގޮވައިލައްވާފައެވެ.
ސަލާމަތީ މަޖިލީހުގައި ވާހަކަފުޅު ދައްކަވަމުން ގުތެރޭޝް ވަނީ، ޣައްޒާގެ ކުށެއް ނެތް ޢާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދޭން ގޮވައިލައްވާފައެވެ. އަދި، ޔަހޫދީ ފައުޖުތަކުގެ އުދުވާންތައް ހުއްޓައިނުލައިފިނަމަ، މެދުއިރުމަތީގެ މަސްރަޙު ހޫނުވެ، ސަރަޙައްދީ ހަމަނުޖެހުމެއް ފެށިދާނެ ކަމުގެ ބިރު އޮތް ކަމުގައި އޭނާ ވިދާޅުވިއެވެ.
"ހަނދާން ކުރަން ޖެހޭ، ޙަމާސްއިން އިސްރާޢީލަށް ހަމަ ހުރެފައި ހަމަލަދިނީ ނޫން ކަން. ފަލަސްޠީނުގެ މުސްލިމުން ފާއިތުވި 56 އަހަރު ހޭދަކޮށްފައި ވަނީ އަޅުވެތި ކަމުގެ ދަށުގައި،" ގުތެރޭޝް ވިދާޅުވިއެވެ.
ވާހަކަފުޅު އިސްރާޢީލުގެ ނަން ނުގެންނެވި ނަމަވެސް، ގުތެރޭޝް ވިދާޅުވީ ޙަމާސްއިން އިސްރާޢީލަށް ހަމަލާ ދިނުމަކީވެސް ބަލައިގަނެވޭނެ ކަމެއް ނޫން ކަމުގައެވެ. އަދި، ޙަމާސްގެ ހަމަލާތަކުގެ ބަދަލުހިފުމުގެ ގޮތުން ޣައްޒާގެ 2.3 މިލިޔަން މުސްލިމުންނާ ދެކޮޅަށް ޔަހޫދީ ފައުޖުތަކުން ހަމަލާ ދިނުމަކީ ވެސް ހަމަޖެހޭ އުސޫލެއް ނޫން ކަމުގައި އޭނާ ވިދާޅުވިއެވެ.
"ޣައްޒާގެ ޢާންމުންގެ ސަލާމަތާއި ރައްކާތެރިކަން ކަށަވަރު ކުރުމުގެ ނަމުގައި ޣައްޒާގެ އުތުރުގެ ސަރަޙައްދުތައް ހުސްކުރަން އެންގުމަކީ ވެސް ގަބޫލު ކުރެވޭނެ ކަމެއް ނޫން. ޣައްޒާގެ ރައްކާތެރި ހިޔާވަހިކަމެއް ނެތް. ކާބޯތަކެއްޗެއް ނެތް. ފެނެއް ނެތް. ބޭހެއް ވެސް ތެލެއް ވެސް ނެތް. ޣައްޒާގެ އުތުރުގައި އުޅޭ ރައްޔިތުން ދެކުނަށް ބަދަލުވުމުން، ޔަހޫދީ ފައުޖުތަކުން ދަނީ ދެކުނުގެ ސަރަޙައްދުތަކަށް ވެސް ހަމަލަ ދެމުން،" ގުތެރޭޝް ވިދާޅުވިއެވެ.
ގުތެރޭޝް ޒަޔަނިސްޓު އިސްރާޢީލަށް އަމާޒުކޮށް ދެއްކެވި ވާހަކަފުޅުތަކަކީ އެ ޤައުމުން އ.ދއަށް ކަނޑައަޅާފައި ހުންނަ ސަފީރު ގިލާދް އަރްދާނަށް ހަޖަމު ކުރެވުނު ވާހަކަފުޅުތަކަކަށް ނުވިއެވެ. އޭނާ ބުނީ، ގުތެރޭޝްގެ ވާހަކަފުޅުތަކުން ދޭހަވަނީ އޭނާއަކީ ޓެރެރިސްޓުންނަށް ވާގިވެރިވާ ބޭފުޅެއްގެ ގޮތުގައި ކަމުގައެވެ. އަދި، އެ ކަމާ ހިތާމަކުރާ ކަމުގައި ވެސް ޖައްބާރު އަރްދާން ބުންޏެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 5,791 އަށް އުފުލިފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި ކުޑަކުދިންނެވެ. ޝަހީދު ކޮށްލާފައިވާ ކުޑަކުދިންގެ ޢަދަދު 2,360 އަށް އަރައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 15,000 އަށްވުރެ އިތުރުވެފައެވެ. އަދި މި ހަމަލާތަކާ ގުޅިގެން މިލިޔަނަކަށް ވުރެ ގިނަ މީހުން ވަނީ ހާލުގައި ޖެހިފައެވެ. މި ކަމާ ގުޅޭ ގޮތުން ވާހަކަފުޅު ދައްކަވަމުން ގުތެރޭޝް ވަނީ، ޙަމާސް ޖަމާޢަތުން ރަހީނު ކޮށްފައިވާ އިސްރާޢީލުގެ 200 އެއްހާ އަސީރުން މިނިވަން ކުރުމަށް ވެސް ގޮވައިލައްވާފައެވެ.