އިންޑިއާގައި މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި މިއަދު ކުޅުނު މެޗުގައި ދެކުނު އެފްރިކާއިން ފަސޭހަކަމާއެކު ބަންގްލަދޭޝް ބަލިކޮށްފިއެވެ.
މުމްބާއީގައި ހުންނަ ވަންކެޑޭ ސްޓޭޑިއަމުގައި ކުޅުނު މި މެޗުން ދެކުނު އެފްރިކާ މޮޅުވީ ފަސޭހަކަމާއެކު 149 ލަނޑުންނެވެ.
މި މެޗުގެ ގުރު ދިމާވުމުން ދެކުނު އެފްރިކާ އެންމެ ފުރަތަމަ ކުޅެން އަރައި 50 އޯވަރު ހަމަވިއިރު ފަސް ކުޅުންތެރިން ނުބައިވެގެން ވަނީ 382 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 140 ބޯޅައިން 174 ލަނޑު ހެދި ކުއިންޓޮން ޑެ ކޮކްއެވެ. އަދ އެ ޓީމުގެ ހެއިންރިކް ކްލާސެން ވަނީ 49 ބޯޅައިން 90 ލަނޑު ހަމަކޮށްފައެވެ.
ޖަވާބުގައި ބަންގްލަދޭޝް ކުޅެން އަރައި 46.4 ވަނަ އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 233 ލަނޑެވެ. އެ ޓީމުން އެންމެ ރަނގަޅަށް ކުޅުނީ 111 ބޯޅައިން 111 ލަނޑު ހެދި މަޙްމަދުﷲ އެވެ.
މި އިނިންގްސްގައި ދެކުނު އެފްރިކާގެ ޖެރަލްޑް ކޮއެޓްޒެއާ ވަނީ 10 އޯވަރުގައި 62 ލަނޑަށް ތިން ވިކެޓް ނަގާފައެވެ. އަދި އެ ޓީމުގެ މާކޯ ޖެންސެން އާއި، ލިޒާޑް ވިލިއަމްސް އަދި ކަޚީސޯ ރާބަޑާ ވަނީ ކޮންމެ އުކުންތެރިއަކު ދެ ވިކެޓް ނަގާފައެވެ.
މި މޮޅާއެކު 10 ޤައުމު ވާދަކުރާ މި މުބާރާތުގެ ތާވަލުގެ ދެވަނައަށް ދެކުނު އެފްރިކާ ޖެހިލިއިރު، އެ ޓީމަށް ވަނީ ކުޅުނު ފަސް މެޗުން އަށް ޕޮއިންޓް ލިބިފައެވެ. އަދި ބަންގްލަދޭޝް އޮތީ ތާވަލުގެ ފުލުގައި ފަސް މެޗުން ދެ ޕޮއިންޓާއެކުއެވެ.