އިޓާލިއަން ލީގުގައި ރޭ އޭސީ މިލާން ބަލިކޮށް ތާވަލުގެ ތިންވަނައަށް ޔުވެންޓަސް ޖެހިލައިފިއެވެ.
އަމިއްލަ ދަނޑުގައި ކުޅުނު މި މެޗު ކާމިޔާބުކޮށް ތާވަލުގެ އެއްވަނައަށް އެރުމުގެ ފުރުސަތު މިލާނަށް އޮތެވެ. އެކަމަކު ރޭ ކުޅުނު މެޗުން 1-0 ގެ ނަތީޖާއަކުން ޔުވެންޓަސް މޮޅުވުމާއެކު، މިލާނަށް ވަނީ އެ ފުރުސަތު ގެއްލިފައެވެ.
ރޭ ކުޅުނު މެޗުގެ ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް މިލާނުގެ ޑިފެންޑަރު މަލިކް ތިއާވޫއަށް ވަނީ ރަތް ކާޑެއް ދައްކާފައެވެ. އެއާއެކު މެޗުގެ ބޮޑުބައި އެ ޓީމުން ކުޅެފައިވަނީ އެއް ކުޅުންތެރިއަކު މަދުކޮށެވެ. މި މެޗުގައި ޔުވެންޓަސްގެ ހަމައެކަނި ލަނޑު ފެނިގެންގޮސްފައިވަނީ މެޗުގެ 62 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު މަނުއެލް ލޮކަޓެލީއެވެ.
ސަސްޕެންޝަނާއި އަނިޔާގެ ސަބަބުން މި މެޗުގައި މިލާނުގެ މުހިންމު ބައެއް ކުޅުންތެރިން ނުކުޅެއެވެ. އެގޮތުން މިލާނުން މި މެޗުގައި ގޯލްކީޕަރަކަށް ބޭނުންކުރީ އެ ޓީމުގެ ތިންވަނަ ކީޕަރު ކަމަށްވާ އުމުރުން 40 އަހަރުގެ އެންޓޯނިއޯ މިރާންޓޭއެވެ.
މިލާން އަތުން ހޯދި މޮޅާއެކު ޔުވެންޓަސް އޮތީ ތާވަލުގެ ތިންވަނައިގައެވެ. އަދި އެ ޓީމުން ވަނީ މިލާނާއި އެއް ޕޮއިންޓަށް ގާތްކޮށްފައެވެ. ތާވަލުގެ ދެވަނައިގައި އޮތް މިލާނަށް ނުވަ މެޗުން 21 ޕޮއިންޓް ލިބިފައިވާއިރު، ތިންވަނައިގައި ޔުވެންޓަސް އޮތީ ނުވަ މެޗުން 20 ޕޮއިންޓާއެކުއެވެ. އަދި އެއްވަނައިގައި އޮތް އިންޓަރ މިލާނަށް ވަނީ ނުވަ މެޗުން 22 ޕޮއިންޓް ލިބިފައެވެ.