ސްޕެނިޝް ލީގުގައި އެތުލެޓިކް ބިލްބާއޯ ކޮޅަށް ޖެހި ތާރީޚީ ލަނޑާއެކު، ތާވަލުގެ ތިންވަނައަށް ބާސެލޯނާ ޖެހިލައިފިއެވެ.
ރަށުން ބޭރުގައި ކުޅުނު މެޗުން ބާސެލޯނާ މޮޅުވީ 1-0 ގެ ނަތީޖާއަކުންނެވެ.
މި މެޗާ ކުރިމަތިލިއިރު ބާސެލޯނާގެ މުހިންމު ގިނަ ކުޅުންތެރިންތަކެއް ތިބީ އަނިޔާގައެވެ. އޭގެތެރޭގައި ތަޖުރިބާކާރު ފޯވާޑް ރޮބަޓް ލެވަންޑޮސްކީ އާއި، މިޑްފީލްޑަރު ފްރެންކީ ޑި ޔޮން ފަދަ ކުޅުންތެރިން ހިމެނެއެވެ. އެ ކުޅުންތެރިން ނުލައި ކުޅުނު މި މެޗުގެ ކުރީކޮޅު ބިލްބާއޯއިން ނުރައްކާތެރި ހަމަލާތަކެއް އުފެއްދި ނަމަވެސް، ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ކާމިޔާބުނުކުރެވިއެވެ.
މި މެޗުގެ ދެވަަނަ ހާފުގައި ބާސެލޯނާއިން ވަނީ އެ ޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މެޗުގެ 80 ވަނަ މިނެޓުގައި ބާސެލޯނާއިން ވަނީ ލީޑު ނަގާފައެވެ. ޕޯޗުގަލުގެ ފޯވާޑް ޖޮއާއޯ ފެލިކްސް ތަނަވަސްކޮށްދިން ފުރުސަތެއްގައި މި ލަނޑު ކާމިޔާބުކޮށްދިނީ ފާމިން ލޮޕޭޒްގެ ބަދަލުގައި ދެވަނަ ހާފުގައި ކުޅެން އެރި ޒުވާން ފޯވާޑް މާކް ގީއުއެވެ.
މި ލަނޑާއެކު އުމުރުން 17 އަހަރުގެ މާކް ގީއު ވަނީ ތާރީޚުގެ ތެރެއިން ޖާގަ ހޯދާފައެވެ. އޭނާ މި ލަނޑު ޖަހާފައިވަނީ ބަދަލު ކުޅުންތެރިއެއްގެ ގޮތުގައި ކުޅެންއަރާ 33 ސިކުންތުގެ ތެރޭގައެވެ. އެއާއެކު މާކް ގީއު ވެފައިވަނީ ބާސެލޯނާގެ ތާރީޚުގައި އެ ކުލަބަށް އެންމެ އަވަހަށް ލަނޑު ޖަހައިދިން ކުޅުންތެރިޔާއަށެވެ.
މި މޮޅާއެކު ކުޅުނު 10 މެޗުން ލިބުނު 24 ޕޮއިންޓާއެކު ބާސެލޯނާ އޮތީ ތާވަލުގެ ތިންވަނައިގައެވެ. އެއްވަނައިގައި އޮތް ރެއާލް މެޑްރިޑާއި ދެވަނައިގައި އޮތް ޖިރޯނާއަށް ވެސް 10 މެޗުން 25 ޕޮއިންޓް ލިބިފައިވާއިރު، ރެއާލަށް އެއްވަނަ ލިބެނީ ލަނޑުގެ ތަފާތުންނެވެ.