އިނގިރޭސި ޕްރިމިއަރ ލީގުގައި ޝެފީލްޑް ޔުނައިޓެޑް ބަލިކޮށް، މެންޗެސްޓާ ޔުނައިޓެޑުން މުހިންމު މޮޅެއް ހޯދައިފިއެވެ.
ރަށުން ބޭރުގައި ރޭ ކުޅުނު މެޗުން ޔުނައިޓެޑް މޮޅުވީ 2-1 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މި މެޗުގައި ގިނަ ހަމަލާ އުފައްދައި ގިނައިރު ބޯޅަ ގެންގުޅެފައިވަނީ ޔުނައިޓެޑުންނެވެ. އެއާއެކު މެޗުގައި ފުރަތަމަ ލަނޑު ޖަހައި ލީޑު ނެގީވެސް ޔުނައިޓެޑުންނެވެ. މެޗުގެ 28 ވަނަ މިނެޓުގައި ޔުނައިޓެޑަށް ލީޑު ނަގައިދިނީ ބްރޫނޯ ފޭނާޑޭސް ދިން ބޯޅައަކުން ސްކޮޓް މެކްޓޮމިނޭއެވެ.
އެކަމކު މި މެޗުގެ ފުރަތަމަ ހާފު ނިމުމުގެ ކުރިން ޔުނައިޓެޑުގެ ޕެނެލްޓީ އޭރިއާ ތެރެއިން މެކްޓޮމިނޭގެ އަތުގައި ބޯޅަ ޖެހުމުން ލިބުނު ޕެނެލްޓީއަކުން ޝެފީލްޑް ވަނީ ނަތިޖާ ހަމަހަމަކޮށްފައެވެ. މި ޕެނަލްޓީ ޝެފީލްޑަށް ކާމިޔާބުކޮށްދިނީ އޮލީ މެކްބާނީއެވެ. މި މެޗުން ޔުނައިޓެޑް މޮޅުވި ލަނޑު 77 ވަނަ މިނިޓުގައި ޖަހައިދިނީ ޑިއޯގޯ ޑަލޮޓްއެވެ. މިއީ އޭނާ ލީގުގައި ކުޅުނު 78 މެޗު ކާމިޔާބުކުރި ދެވަނަ ލަނޑެވެ.
ރޭގެ މެޗުގެ ކުރިން ޔުނައިޓެޑް އަދި އިންގްލަންޑުގެ ލެޖެންޑް ބޮބީ ޗާލްޓަން، އުމުރުން 86 އަހަރު މަރުވެފަވާތީ އޭނާއަށް ވަނީ މެޗު ފެށުމުގެ ކުރިން އިހުތިރާމު އަދާކޮއްފައެވެ. ރޭގެ މޮޅާއެކު ޔުނެއިޓެޑް ވަނީ ލީގުގައި ކުޅުނު ނުވަ މެޗުން ހޯދި 15 ޕޮއިންޓާއެކު ތާވަލުގެ އަށްވަނައަށް ކުރިއަށްޖެހިލާފައެވެ.