އިނގިރޭސި ޕްރިމިއަރ ލީގުގައި ރޭ ބްރައިޓަން އަތުން މޮޅުވެ، އެންމެ ފަހުގެ ޗެމްޕިއަން މެންޗެސްޓާ ސިޓީ ތާވަލުގެ އެއްވަނައަށް ޖެހިލައިފިއެވެ.
އަމިއްލަ ދަނޑުގައި ކުޅުނު މެޗުން ސިޓީ މޮޅުވީ 2-1 ގެ ނަތީޖާއަކުންނެވެ.
މި މެޗުގައި ސިޓީން ކާމިޔާބުކުރި ދެ ލަނޑުވެސް ފެނިގެންގޮސްފައިވަނީ ފުރަތަމަ ހާފުގައެވެ. އެގޮތުން މެޗުގެ ހަތްވަނަ މިނެޓުގައި ސިޓީއަށް ލީޑު ނަގައިދިނީ މި ސީޒަނުގައި ރަނގަޅު ފޯމެއްގައި ހުރި ހޫލިއަން އަލްވަރޭޒްއެވެ. އަދި މެޗުގެ 19 ވަނަ މިނެޓުގައި އާލިން ބްރައުޓް ހާލަންޑް ވަނީ ސިޓީގެ ލީޑު ފުޅާކޮށްދީފައެވެ.
މި މެޗުގެ ދެވަނަ ހާފުގައި ބްރައިޓަންއިން ކުޅުން ރަނގަޅުކުރިއިރު، މެޗުގެ 73 ވަނަ މިނެޓުގައި އެ ޓީމުން ވަނީ ފަރަގު ކުޑަކޮށްފައެވެ. މި ލަނޑު ޖަހައިދިނީ ބާސެލޯނާގެ ލޯން އެއްބަސްވުމެއްގެ ދަށުން އެ ޓީމަށް ކުޅެމުން އަންނަ އަންސޫ ފަޓީއެވެ. މީގެ އިތުރުން ސިޓީން މި މެޗު ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗުގެ އިތުރު ވަގުތުގައި އެ ޓީމުގެ މަނުއެލް އަކަންޖީއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ.
މި މޮޅާއެކު ތާވަލުގެ އެއްވަނައަށް ސިޓީ ޖެހިލިއިރު، އެ ޓީމާއި ތާވަލުގެ ދެވަނައިގައި އޮތް އާސެނަލަށް ވަނީ ކުޅުނު ނުވަ މެޗުން 21 ޕޮއިންޓް ލިބިފައެވެ. ސިޓީއަށް ކުރި ލިބެނީ ލަނޑުގެ ތަފާތުންނެވެ. އަދި ބްރައިޓަން އޮތީ ތާވަލުގެ ހަތްވަނައިގައި ނުވަ މެޗުން 16 ޕޮއިންޓާއެކުއެވެ.