އިނގިރޭސި ޕްރިމިއަރ ލީގުގައި ރޭ އާސެނަލުން ފަހު ވަގުތު ކާމިޔާބުކުރި ދެ ލަނޑާއެކު ޗެލްސީ މޮޅުވިޔަނުދީ ހިފަހައްޓައިފިއެވެ.
ޗެލްސީ ސްޓެންފޯޑް ބްރިޖުގައި ރޭ ކުޅުނު މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ.
ފޯރިގަދަ ކުޅުމެއް ފެނިގެންދިޔަ މެޗުގެ ގިނައިރު ބޯޅަ ގެންގުޅެ ގިނަ ހަމަލާ އުފެއްދީ އާސެނަލުންނެވެ. އެކަމަކު މެޗުގެ ފުރަތަމަ 15 މިނުޓުގެ ތެރޭގައި ޗެލްސީން ލީޑު ނެގީ އެ ޓީމަށް ލިބުނު ޕެނަލްޓީއަކުންނެވެ. މި ޕެނަލްޓީ ކާމިޔާބުކޮށްދިނީ ކޯލް ޕާމާއެވެ. މިއީ އާސެނަލުގެ ޑިފެންޑަރު ވިިލިއަމް ސަލީބާގެ އަތުގައި ބޯޅަ ޖެހުނު ކަމަށް، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.
މި މެޗުގައި ޗެލްސީން ލީޑު ފުޅާކުރީ ދެވަނަ ހާފުގެ ތިންވަނަ މިނެޓުގެ ތެރޭގައި މިކައިލޯ މުޑްރިކް ކާމިޔާބުކުރި ލަނޑުންނެވެ. މިއީ ޗެލްސީ ދަނޑުގައި މުޑްރިކް ކާމިޔާބުކުރި ފުރަތަމަ ލަނޑެވެ.
މި މެޗުން އާސެނަލް ބަލިނުވެ ސަލާމަތްވީ މެޗުގެ ފަހު 15 މިނެޓުގެ ތެރޭގައި ކާމިޔާބުކުރި ލަނޑުތަކުންނެވެ. އެ ގޮތުން މެޗުގެ 77 ވަނަ މިނިޓްގައި އާސެނަލްގެ ފުރަތަމަ ލަނޑު ޖަހައިދިނީ ޑެކްލަން ރައިސްއެވެ. އަދި އޭގެ ހަތް މިނިޓް ފަހުން އާސެނަލުން ނަތީޖާ ހަމަހަމަކުރީ ބުކާޔޯ ސަކާ ދިން ބޯޅައަކުން ލެއަންޑްރޯ ޓްރޮސާޑް ޖަހައިދިން ލަނޑާއެކުއެވެ. މިއީ އެންމެ ފަހުން ކުޅުނު 10 މެޗުގައި ޓްރޮސާޑް އާސެނަލަށް ކާމިޔާބުކޮށްދިން ފަސްވަނަ ލަނޑެވެ.
މި މެޗު އެއްވަރުވުމާއެކު އާސެނަލުން ވަނީ މި ސީޒަނުގެ ލީގުގައި މެޗަކުން ބަލިނުވުމުގެ ރެކޯޑް ދަމަހައްޓާފައެވެ. މި މެޗުން ލިބުނު ޕޮއިންޓަކާއެކު ލީގުގެ އެއްވަނައިގައ އޮތް އެންމެ ފަހުގެ ޗެމްޕިއަން މެންޗެސްޓާ ސިޓީއާ އެއްވަރަށް އާސެނަލްވެސް ވަނީ ޕޮއިންޓް ހޯދާފައެވެ. އެގޮތުން ދެ ޓީމަށްވެސް ވަނީ 21 ޕޮއިންޓް ލިބިފައެވެ. އަދި ތާވަލުގެ 10 ވަނައިގައި ޗެލްސީ އޮތީ ކުޅުނު ނުވަ މެޗުން ލިބުނު 12 ޕޮއިންޓާއެކުއެވެ.