އޭއެފްސީ ކަޕް ފުޓްބޯޅަ މުބާރާތުގެ ގުރޫޕް ޑީގައި އޮޑީޝާ އެފްސީއާ ދެކޮޅަށް ކުޅުމަށް ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން، އިންޑިއާގެ ބުބަނޭޝްވަރަށް ހިނގައްޖެއެވެ.
މި މުބާރާތުގައި މާޒިޔާ ކުޅޭ ތިންވަނަ މެޗުގައި އޮޑީޝާއާ ދެކޮޅަށް ކުޅޭއިރު، އިއްޔެ އެ ޓީމު ވަނީ އިންޑިއާގެ ބުބަނޭޝްވަރަށް ގޮސްފައެވެ. އަދި މިއަދުގެ ހެނދުނުގެ ވަގުތެއްގައި ޓީމުގެ ފުރަތަމަ ފަރިތަކުރުންތައް ކުރިއަށް ގެންގޮސްފައެވެ.
މުބާރާތުގައި ފުރަތަމަ މެޗުގައި މާޒިޔާއިން މާލޭގައި ބަންގްލަދޭޝްގެ ޗެމްޕިއަން ބަޝުންދަރާ ކިންގްސް 3-1 ގެ ނަތީޖާއަކުން ބަލިކޮށްފައެވެ. އެކަމަކު އިންޑިއާގެ ކަލްކަތާގައި ކުޅުނު ދެވަނަ މެޗުން މާޒިޔާ ވަނީ ފަހު ވަގުތު ސަރަހައްދީ ގަދަބާރު މޯހަން ބަގާން ސުޕަ ޖަޔަންޓް އަތުން 2-1 ގެ ނަތީޖާއަކުން ބަލިވެފައެވެ.
މި ފަހަރުގެ އޭއެފްސީ ކަޕުގައި މިހާތަނަށް ކުޅުނު ދެ މެޗުންވެސް މުބާރާތުގައި މުޅިން އަލަށް ވާދަކުރާ އޮޑީޝާ ވަނީ ބަލިވެފައެވެ. އެގޮތުން ފުރަތަމަ މެޗުގައި މޯހަން ބަގާން އަތުން 4-0 ގެ ނަތީޖާއަކުން ބަލިވިއިރު، ދެވަނަ މެޗުން ބަލިވީ ބަޝުންދަރާ އަތުން 3-2 ގެ ނަތީޖާއަކުންނެވެ.
މި ނަތީޖާތަކާއެކު ގްރޫޕް ޑީގެ އެއްވަނައިގައި މޯހަން ބަގާން އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. ދެވަނައިގައި އޮތް މާޒިޔާ އާއި ތިންވަނައިގައި އޮތް ބަޝުންދަރާއަށް ދެ މެޗުން ތިން ޕޮއިންޓް ލިބިފައިވާއިރު، ފުލުގައި އޮތް އޮޑީޝާއަށް މިހާތަނަށް ޕޮއިންޓެއް ލިބިފައެއް ނުވެއެވެ.
އޮޑީޝާ އާއި މާޒިޔާ ވާދަކުރާ މެޗު އޮންނާނީ އަންނަ އަންގާރަ ދުވަހުގެ ހަވީރު 17:00 ގައި، ކަލިންގާ ސްޓޭޑިއަމުގައެވެ.