ދިހަ ދުވަހުގެ ތެރޭގައި ތިންވަނަ ފަހަރަށް ޔަހޫދީން ސޫރިޔާއަށް ވަރުގަދަ ވައިގެ ޙަމަލާދީފިއެވެ.
ޔަހޫދީންގެ މިސައިލް ޙަމަލާތައް ދީފައިވަނީ އިސްތިޢުމާރުކޮށްފައިވާ ޖޯލާންގެ އުސްބިންތަކުންނެވެ. އެ ޙަމަލާތައް ޢަމާޒުވެފައިވަނީ ސޫރިޔާގެ ވެރިރަށް ދިމިޝްޤުގެ ބައިނަލްއަޤްވާމީ ވައިގެ ބަނދަރަށާއި ޙަލަބުގެ ބައިނަލްއަޤްވާމީ ވައިގެ ބަނދަރަށެވެ. ޔަހޫދީން ފޮނުވައިލި ގިނަ ޢަދަދެއްގެ މިސައިލްތައް ވައިގެ ތެރޭގައި ނައްތާލެވުނު ނަމަވެސް އެ ޙަމަލާގައި ވައިގެ ބަނދަރުތަކުގެ ރަންވޭތަކަށްވަނީ ގެއްލުންވެފައެވެ. އޭގެ އިތުރުން ދިމިޝްޤުގެ ބައިނަލްއަޤްވާމީ ވައިގެ ބަނދަރުގެ ދެ މުވައްޒަފަކު ޝަހީދުވެ އިތުރު މީހަކުވަނީ ޒަޚަމުވެފައެވެ.
އޮކްޓޫބަރު މަހުގެ 12ވަނަ ދުވަހުވެސް ޔަހޫދީންވަނީ ދިމިޝްޤާއި ޙަލަބުގެ ބައިނަލްއަޤްވާމީ ވައިގެ ބަނދަރުތަކަށް ޙަމަލާ ދީފައެވެ. އެ ފަހަރުވެސް ރަންވޭތަކަށް ގެއްލުންވެ ވައިގެ ބަނދަރުތަކުގެ ޚިދުމަތް ހުއްޓުނެވެ.
ތަކުރާރުކޮށް ޔަހޫދީން ސޫރިޔާއަށް ވަރުގަދަ ވައިގެ ޙަމަލާތަކެއް ދެމުންދަނީ އަވަށްޓެރި ލުބުނާނުގައި ޙަރަކާތްތެރިވާ ޙިޒްބުﷲ ޖަމާޢަތުން ޔަހޫދީންގެ އަސްކަރީ ޢަމާޒުތަކަށް ޙަމަލާ ދެމުންދާ ދަނޑިވަޅެއްގައެވެ. އޭގެ އިތުރުން ފާއިތުވި ދެ ހަފުތާގެ ތެރޭގައި ޣައްޒާގައި ވެރިކަންކުރާ ޙަމާސް ޖަމާޢަތުންވެސް ދަނީ ޔަހޫދީންނާ ދެކޮޅަށް ވަރުގަދަ ޙަމަލާތަކެއް ދެމުންނެވެ.