އެއްވެސް ޝަރުތަކާ ނުލައި ޔަހޫދީ ދެ އަސީރުން މިނިވަންކުރުމަށް ހުށަހެޅުމުން އެ މީހުންނާ ހަވާލުވާން އިސްރާއީލުގެ ޔަހޫދީ ދަޢުލަތުން ދެކޮޅު ހަދައިފިއެވެ.
ޣައްޒާގައި ވެރިކަންކުރާ ޙަމާސް ޖަމާޢަތުގެ އަސްކަރީ ގޮފިކަމަށްވާ އަލްޤައްސާމް ބްރިގޭޑްސްގެ ތަރުޖަމާން އަބޫ އުބައިދާ ވިދާޅުވީ ޔަހޫދީ ދެ އަސީރުން މިނިވަންކުރުމަށް ނިންމީ އިންސާނިއްޔަތައްޓަކައި ބަދަލުގައި އެއްވެސް ކަމަކަށް އެދުމެއް ނެތިކަމަށެވެ. އަދި އެ ދެ މީހުން މިނިވަންކުރުމަށް ހުށަހެޅީ ޤަޠަރާއެކު ކުރަމުންދާ މަޝްވަރާތަކުގެ ތެރެއިންކަމަށްވެސް އަބޫ އުބައިދާ ވިދާޅުވިއެވެ. ޔަހޫދީ ދެ އަސީރުން މިނިވަންކުރުމަށް ޙަމާސުން ހުށަހެޅީ އެމެރިކާއަށް ނިޞްބަތްވާ ދެ އަސީރުން މިނިވަންކުރިތާ އެއް ދުވަސް ފަހުންނެވެ. އެމެރިކާއަށް ނިޞްބަތްވާ އަންހެނަކާއި އޭނާގެ އަންހެން ދަރިފުޅު މިނިވަންކޮށްފައިވަނީވެސް އެއްވެސް ޝަރުތަކާ ނުލައެވެ.
މީގެ ކުރިން އަބޫ އުބައިދާ ވިދާޅުވެފައިވަނީ ޙަމާސްގެ ބެލުމުގެ ދަށުގައި އެކި ޤައުމުތަކަށް ނިޞްބަތްވާ 250 އަސީރުން ތިބިކަމަށެވެ. ނަމަވެސް ޔަހޫދީ ފައުޖުތަކުން ޣައްޒާއަށް ދެމުންދާ ޙަމަލާތަކުގައި 22 އަސީރުންވަނީ މަރުވެފައެވެ.