ޒަޔަނިސްޓު އިސްރާޢީލުގެ ސިފައިން ހުޅަނގު އައްސޭރީގެ ޖިނީންގައި ހުންނަ އަލް-އަންޞާރު މިސްކިތަށް ބޮންއަޅައި އެކަކު ޝަހީދު ކޮށްލައިފިއެވެ. ޔަހޫދީ ފައުޖުތަކުން ހަމަލަ ދީފައިވާ އަލް-އަންޞާރު މިސްކިތަކީ ޖިނީން ރެފިއުޖީ ކޭމްޕު ތެރޭގައި ހުންނަ މިސްކިތެކެވެ. މި ހަމަލާގައި ގިނަ ޢަދަދެއްގެ ބަޔަކު ޒަޚަމު ކޮށްލާފައިވާ ކަމުގައި ފަލަސްޠީނުގެ ޞިއްޙީ ޚިދުމަތްތެރިން ބުނެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ސިފައިން ޣައްޒާގައި ހިންގަމުންދާ ލާއިންސާނީ އުދުވާންތަކުގައި މިހާތަނަށް 4,385 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 13,000 އަށްވުރެ އިތުރެވެ. މީގެ އިތުރުން، ރަޙުމު ކުޑަ ހަމަލަތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުންގެ ޢަދަދު 1,000 އަކަށްވުރެ މައްޗަށް އަރާ ކަމުގައި ޣައްޒާގެ އޮފިޝަލުން ވިދާޅުވެއެވެ.
ޖިނީން ރެފިއުޖީ ކޭމްޕަކީ ފަލަސްޠީނުގެ އެތަކެއް ހާސް ރެފިއުޖީން ދަތި ހާލުގައި ދިރިއުޅޭ ކޭމްޕެކެވެ. ޔަހޫދީންގެ ޖައްބާރު ސިފައިން ބުނީ ވައިގެ ހަމަލަތަކުގައި ފަލަސްޠީނުގެ މުޖާޙިދުންގެ ޖަމާޢަތެއް ކަމުގައިވާ އިސްލާމިކް ޖިހާދާއި ޙަމާސް ޖަމާޢަތުގެ ގިނަ ޢަދަދެއްގެ މުޖާހިދުން ޝަހީދު ކޮށްލާފައިވާނެ ކަމުގައެވެ. އެ މިސްކިތަކީ އަސްކަރީ މަރުކަޒެއްގެ ގޮތުގައި ބޭނުން ކުރަމުން ދިޔަ ތަނެއް ކަމުގައިވެސް ޔަހޫދީން ބުނެއެވެ.
ސޯޝަލް މީޑިޔާގައި ދައުރުވަމުންދާ ވީޑިޔޯތަކުން ފެންނަނީ، ޔަހޫދީންގެ އަސްކަރީ މަތިންދާބޯޓަކުން ދިން ވައިގެ ހަމަލާގައި މިސްކިތަށް ވަރަށް ބޮޑެތި ގެއްލުންތަކެއް ލިބިފައިވާ މަންޒަރެވެ. ޢާންމުން ދިރިއުޅޭ ޢިމާރާތްތަކާއި، ހޮސްޕިޓަލްތަކާއި، އަޅުކަންކުރާ ތަންތަނަށް ހަމަލަ ދިނުމަކީ ހަނގުރާމައިގެ ކުށެކެވެ. ނަމަވެސް، ޔަހޫދީންގެ ފައުޖުތަކުން ދަނީ އެއްވެސް ޖެހިލުމެއް އަދި ރަޙުމެއް ނެތި، ފަލަސްޠީނުގެ މުސްލިމުން ގަތުލު ކުރަމުން ކަން ފާހަގަ ކޮށްލަން ޖެހެއެވެ. މިއީ، ފާއިތުވި ހަފުތާއެއްހާ ދުވަހުގެ ތެރޭގައި ޒަޔަނިސްޓު ފައުޖުތަކުން ޖިނީން ރެފިއުޖީ ކޭމްޕަށް ވައިގެ ހަމަލަތައް އަމާޒު ކޮށްފައިވާ ދެވަނަ ފަހަރެވެ.
އޮކްޓޫބަރު 19 ވަނަ ދުވަހު ޔަހޫދީ ފައުޖުތަކުން ޣައްޒާގެ އަލް-އަހްލީ ޢަރަބި ހޮސްޕިޓަލަށް ވެސް ނުރައްކާތެރި ހަމަލައެއްދީ، ފަލަސްޠީނުގެ 470 އަށްވުރެ ގިނަ މީހުން ޝަހީދު ކޮށްލިއެވެ. އެ ހޮސްޕިޓަލަކީ ބަލި މީހުންގެ އިތުރުން، ގެދޮރު ނެތިކޮށްލާފައިވާ ގިނަ ޢަދަދެއްގެ މުސްލިމުން ރައްކާތެރިކަން ހޯދަމުން ދިޔަ ހިޔާވަހިކަމެކެވެ. އޭގެ ފަހުން ޣައްޒާގައި ހުންނަ ނަޞާރާދީނުގެ ފައްޅިއަކަށް ހަމަލަދީ، އިތުރު 18 މީހުންގެ ފުރާނަ ދުއްވައިލިއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.