ޒަޔަނިސްޓު އިސްރާޢީލުގެ ޖަލުތަކުގައި ހައްޔަރު ކޮށްފައިވާ ފަލަސްޠީނުގެ މުސްލިމުންގެ ޢަދަދު 10,000 އަށްވުރެ އިތުރުވެއްޖެއެވެ. އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ އިސްރާޢީލުން ފެށި ގަތުލުއާންމަށް ފަހު އެތަކެއް ހާސް މުސްލިމުންނެއް ވަނީ ހައްޔަރުކޮށް، ޖަލުތަކުގައި ބަންދު ކޮށްފައެވެ. އެ ދުވަހަށް ފަހު ޔަހޫދީންގެ ޖަލުތަކުގައި ހައްޔަރު ކޮށްފައި ތިބި މުސްލިމުންގެ ޢަދަދު މިހާރު ވަނީ ދެގުނައަށް އިތުރުވެފައެވެ.
އޮކްޓޫބަރު 7 ވަނަ ދުވަހުގެ ކުރިން ޔަހޫދީންގެ ޖަލުތަކުގައި ހައްޔަރު ކޮށްފައި ތިބި ފަލަސްޠީނުގެ މުސްލިމުންގެ ޢަދަދަކީ 5,200 އެވެ. ނަމަވެސް، އެ ދުވަހަށް ފަހު ޔަހޫދީން ވަނީ ފަލަސްޠީނުގެ އިތުރު 4,000 އަށްވުރެ ގިނަ މީހުން ހައްޔަރު ކޮށްފައެވެ. އެއީ، ޣައްޒާއިން ހައްޔަރު ކުރި މުސްލިމުންގެ ޢަދަދަށްވާއިރު، ހުޅަނގު އައްސޭރީގައި ހިންގަމުންދާ ލާއިންސާނީ އުދުވާންތަކުގައި ވެސް ފަލަސްޠީނުގެ އިތުރު 1,000 އަކަށްވުރެ ގިނަ މީހުން މިހާރު ވަނީ ހައްޔަރު ކޮށްފައެވެ.
ހުސްވި ދެ ހަފުތާއެއްހާ ދުވަހުގެ ތެރޭގައި ޔަހޫދީން ހައްޔަރަށް ގެންދިޔަ 4,000 އަށްވުރެ ގިނަ މުސްލިމުން މި ވަގުތު ބައިތިއްބާފައި ތިބީ ޔަހޫދީންގެ އަސްކަރީ މަރުކަޒުތަކުގައެވެ. ރާމަاللهގައި ގާއިމު ކޮށްފައިވާ އައްޟަމީރު ޕްރިޒަނަރސް ރައިޓްސް ގްރޫޕުގެ އިސް އޮފިޝަލެއް ކަމުގައިވާ ސަހާރް ފްރާންސިސް ވިދާޅުވީ، ޔަހޫދީ ފައުޖުތަކުން މެދުކެނޑުމެއް ނެތި ޣައްޒާގެ މުސްލިމުން ހައްޔަރު ކޮށްގެން ގެންދަމުންދާ ކަމުގައެވެ.
ޣައްޒާއިން ހައްޔަރަށް ގެންދިޔަ ގިނަ މުސްލިމުން މި ވަގުތު ބައިތިއްބާފައި ތިބީ ބިޢްރު އަލް-ސަބަޢި ކައިރީގައި އޮންނަ ސަދޭ ތައިމެން އަސްކަރީ މަރުކަޒުގައި ކަމުގައި ފްރާންސިސް ވިދާޅުވިއެވެ. އަދި، އެތަކެއް ސަތޭކަ މުސްލިމުން ރާމަالله ކައިރީގައި އޮންނަ އޮފެރް ޖަލާއި، އިރުމަތީ ބައިތުލްމަޤްދިސްގެ އަވަށެއް ކަމުގައިވާ އާނާތާގައިވާ އަސްކަރީ މަރުކަޒަކަށް ގެންގޮސްފައިވާ ކަމުގައި ވެސް އޭނާ ވިދާޅުވިއެވެ.
ފަލަސްޠީނުގައި ވެރިކަން ކުރާ ޕަލަސްޓީނިޔަން އޮތޯރިޓީ (ޕީ.އޭ)ގެ ކޮމިޝަން އޮފް ޑީޓެއިނީސްގެ އިސް އޮފިޝަލެއް ކަމުގައިވާ ޤަދޫރާ ފާރިސް ވިދާޅުވީ، ޔަހޫދީން ހައްޔަރަށް ގެންގޮސްފައިވާ މުސްލިމުން މި ވަގުތު ތިބީ ވަރަށް ނިކަމެތި ހާލުގައި ކަމުގައެވެ. އަދި، ޔަހޫދީން އެ މީހުންނާ މެދު އަމަލު ކުރަމުން ދަނީ ވަރަށް އިހާނެތިކޮށް ކަމުގައި ވެސް އޭނާ ވިދާޅުވިއެވެ.
"ޔަހޫދީން އެ މީހުންނަށް ކާކަށް ނުދޭ. ބޯނެ ފެންފޮދެއް ނުދޭ. އެ މީހުން ވަނީ ބަނޑަށްޖައްސާފައި. ބަލި މީހުންނަށް ބޭސް ފަރުވާގެ ޚިދުމަތްތަކެއް ނުދޭ. ޒަޚަމުވެފައިވާ މީހުންނަށް ވެސް ޞިއްޙީ ފަރުވާއެއް ނުދޭ. ޤަވާޢިދުން ބޭސްކާން ޖެހޭ މީހުންނަށް ވެސް އެއްވެސް ފަރުވާލެއް ނުބަހައްޓާ. ޖަލުތަކުން ފެނާއި ކަރަންޓު ވެސް ވަނީ ކަނޑައިލާފައި،" ފާރިސް ވިދާޅުވިއެވެ.
އައްޟަމީރު ޕްރިޒަނަރސް ރައިޓްސް ގްރޫޕުން ވެސް ވަނީ، ޔަހޫދީންގެ ޖަލުތަކުގައި ހުރި ކުލިނިކުތަކާއި ޞިއްޙީ މަރުކަޒުތައް ބަންދު ކޮށްފައިވާ ކަން ހާމަކޮށްފައެވެ. އަދި، ޞިއްޙީ ފަރުވާއިން މުސްލިމުން މަޙްރޫމު ކުރުވަމުންދާ ކަމަށް ރިޕޯޓު ކޮށްފައެވެ. ބަލި މީހުން ހޮސްޕިޓަލަށް ގެންގޮސް ނުދޭ ކަމުގައި ވެސް އެ ޖަމުޢިއްޔާއިން ބުނެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 4,385 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.