ޣައްޒާގައި ހިންގަމުންދާ ގަތުލުއާންމު ހުއްޓައިލަން "ޤާހިރާ ސުލްޙައިގެ ސަމިޓު"ގައި ގޮވައިލައިފި

އިސްރާޢީލް-ޙަމާސް ހަނގުރާމަ ނިމުމަކަށް ގެނެސް، ފަލަސްޠީނުގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމު ނިމުމަކަށް ގެނައުމާ ގުޅޭ ގޮތުން މަޝްވަރާ ކުރުމަށް މިޞްރުގެ ވެރިރަށް ޤާހިރާގައި "ޤާހިރާ ސުލްޙައިގެ ސަމިޓު" ފަށައިފިއެވެ. އެއް ދުވަހުގެ މި މިސަޓު ފަށާފައި މި ވަނީ މިޞްރުގެ ރައީސް ޢަބްދުލް ފައްތާޙް އަލް-ސީސީގެ އިސްނެންގެވުމަށެވެ.

އަލް-ސީސީއާއި ފަލަސްޠީނުގެ ރައީސް މަޙްމޫދު އައްބާސްގެ އިތުރުން މި ސަމިޓުގައި އުރުދުނާއި، ފަރަންސޭސިވިލާތާއި، ޖަރުމަނުވިލާތާއި، ރަޝިޔާއާއި، ޗައިނާއާއި، އިނގިރޭސިވިލާތާއި، އެމެރިކާއާއި، ޤަޠަރުގެ އިތުރުން ދެކުނު އެފްރިކާގެ އިސް އޮފިޝަލުން ބައިވެރިވެ ވަޑައިގަންނަވައެވެ. މީގެ އިތުރުން އ.ދއާއި ވިލާތުގެ އިއްތިހާދު (އީ.ޔޫ)ގެ އޮފިޝަލުން ވެސް ސަމިޓުގައި ބައިވެރިވެ ވަޑައިގަންނަވައެވެ.

ޣައްޒާގައި ޒަޔަނިސްޓު އިސްރާޢީލުން ހިންގަމުންދާ ގަތުލުއާންމު ހުއްޓުވަން މަސައްކަތް ފަށާފައި މި ވަނީ، ޔަހޫދީންގެ އުދުވާންތަކުގައި ޝަހީދު ކޮށްލާފައިވާ މުސްލިމުންގެ ޢަދަދު 4,200 އަށްވުރެ އިތުރުވެފައިވާ ދަނޑިވަޅެއްގައެވެ. އަދި، ޢާންމުންގެ ގެދޮރާއި ހޮސްޕިޓަލްތަކާއި ޞިއްޙީ މަރުކަޒުތަކަށް ދީފައިވާ ރަޙުމު ކުޑަ ހަމަލަތަކުގައި ޒަޚަމު ކޮށްލާފައިވާ މީހުންގެ ޢަދަދު 13,200 އަށްވުރެ އިތުރެއެވެ.

މިސަޓުގެ ފެށުމުގެ ގޮތުން ވާހަކަފުޅު ދައްކަވަމުން އަލް-ސީސީ ވަނީ ޣައްޒާގައި ދިރިއުޅޭ 3.2 މިލިޔަން މުސްލިމުންނަށް ޔަހޫދީ އިސްރާޢީލުން ކުރިމަތި ކޮށްފައިވާ އިންސާނީ މުޞީބާތުން އެ މީހުން ސަލާމަތް ކުރަން ގުޅިގެން މަސައްކަތް ކުރުމަށް ސަމިޓުގެ ބައިވެރިންނަށް ގޮވައިލައްވާފައެވެ. އަދި، ފަލަސްޠީނާއި ޒަޔަނިސްޓު އިސްރާޢީލާ ދެމެދު ސުލްޙަ ގާއިމު ކުރަން މަސައްކަތް ކުރުމަށް އެދިވަޑައިގަންނަވާފައެވެ. މީގެ އިތުރުން، ޣައްޒާގައި ގެދޮރު ނެތިކޮށްލައި، ހާލުގައި ޖައްސާފައިވާ އެތަކެއް މިލިޔަން މުސްލިމުންނަށް އިންސާނީ އެހީ ފޯރުކޮށްދިނުމުގެ ކަންކަން ހަރުދަނާ ކުރުމަށް ވެސް އަލް-ސީސީ ގޮވައިލެއްވިއެވެ.

"ކޮންމެ އިންސާނެއްގެ ފުރާނައެއް ވެސް މުހިންމު. ޔަހޫދީން ޣައްޒާގެ މުސްލިމުންނާ ދެކޮޅަށް ހިންގަމުން ދަނީ ލާއިންސާނީ ޖަރީމާތަކެއް. ގަތުލުއާންމެއް. ޙަމާސް ޖަމާޢަތް ދެކެ އަންނަ ރުޅީގައި، ޣައްޒާގެ ޢާންމު ރައްޔިތުންނާ ދެކޮޅަށް ގަތުލުއާންމު ހިންގުމަކީ ބަލައިގަނެވޭނެ ކަމެއް ނޫން. ޔަހޫދީން އެ ދަނީ ޣައްޒާގެ މުސްލިމުންގެ އިންސާނީ ހައްޤުތަކަށް އަރައިގަންނަމުން. ހަނގުރާމައިގެ ކުށްތައް ހިންގަމުން،" އުރުދުންގެ ރަސްގެފާނު ޢަބްދުالله ބިން ޙުސައިން (ދެވަނަ) ވިދާޅުވިއެވެ.

"އެހެން އެއްވެސް ޤައުމެއްގެ ރައްޔިތަކަށް މި ފަދަ ހާލެއް ޖައްސާ ނަމަ، ކާބޯތަކެއްޗާއި ބޯފެން ކަނޑައިލާފައިވާ ނަމަ، މުޅި ދުނިޔެއަށް އެ ކަން ވަގުތުން ފެންނާނެ. އެ ކަން ކުށްވެރި ކުރާނެ. ނަމަވެސް، ޣައްޒާގެ މުސްލިމުންނަށް ހަދައިލަމުންދާ ގޮތެއް ނުފެންނާނެ."

މިސަޓުގައި ވާހަކަފުޅު ދައްކަވަމުން އައްބާސް ވަނީ ޣައްޒާގެ ރައްޔިތުންނަށް އިންސާނީ އެހީގެ ސާމާނު ފޯރުކޮށްދެވޭނެ މަގުތައް ވަގުތުން ހުޅުވައިދިނުމަށް ގޮވައިލައްވާފައެވެ. ނަމަވެސް، ޔަހޫދީންނަށް މި ގޮވައިލުމުގެ އަޑެއް ނީވޭނެއެވެ. ސަމިޓުގައި ޒަޔަނިސްޓު އިސްރާޢީލުގެ އެއްވެސް އޮފިޝަލަކު ބައިވެރިވެފައި ނުވާ ކަން ފާހަގަކޮށްލަން ޖެހެއެވެ.

މަސްރަޙު ދިރާސާ ކުރާ ފަރާތްތަކުން ބުނަނީ، މި ސަމިޓުން މާ ބޮޑު ކާމިޔާބީތަކެއް ލިބޭނެ ކަމަށް ގަބޫލު ނުކުރެވޭ ކަމުގައެވެ. އެއް ސަބަބަކީ، ސަމިޓުގައި ޒަޔަނިސްޓުންގެ އެއްވެސް ބައިވެރިވުމެއް ނެތުމެވެ. ސަމިޓުގެ ނިންމުންތަކާއި ބާރުއެޅުމާ އެކު ޔަހޫދީން ޣައްޒާއަށް ދެމުންދާ ހަމަލަތައް މެދުކަނޑައިލާ، އިންސާނީ އެހީގެ ކުޑަ މިންވަރެއް އެތެރެ ކުރަން ފުރުޞަތު ދިން ނަމަވެސް، ޔަހޫދީންގެ އަޅުވެތިކަމުގެ ދަށުގައި ދިރިއުޅޭ ފަލަސްޠީނުގެ މުސްލިމުންނަށް މިނިވަން ކަން ހޯދައިދިނުމަށް ކުރަމުންދާ މަސައްކަތުގައި ކުރިއެރުންތަކެއް ހޯދޭ މަންޒަރު ފެންނަން ނެތް ކަމުގައި ވެސް މަސްރަޙު ދިރާސާ ކުރާ ފަރާތްތަކުން ބުނެއެވެ.